Jope 28 - Ai Vola Tabu (Vakadewa Makawa Vakavoutaki 2021)

Tomana ko Jope: Evei na Sala ki na Vuku kei na Yalomatua?

¹ “E dina sara ni sa tiko na qara ni siliva, kei na vanua me vakasavasavataki kina na koula.

² Sa kau mai na qele na kaukamea, ka sa vakawaicalataki na kopa mai na kena vatu.

³ Sa muduka na butobuto na tamata daukelikeli, ka sa vakasaqaqara me yacova na kena i yalayala na vatu ni butobuto kei na yaloyalo ni mate.

⁴ Era keli qara e na buca sa yawa mai nai tikotiko ni tamata; era sa guilecavi mai vei ira era sa lako voli; era sa lili tu e macawa, ka yawa mai na tamata; ka veisuwayaki.

⁵ E na vuku ni qele [vuravura], sa tubu mai kina na kakana; ia sa cukiraki ga na rukuna me vaka sa kama.

⁶ A kena veivatu sa vanua ni safaia, ka sa tu kina na kuvu ni koula.

⁷ “Na kena sala sa sega ni bau kila e dua na manumanu vuka, ka se sega ni kunea na mata ni vulituri.

⁸ Era se bera ni butuka na manumanu kila dokadoka; ka se sega ni lako kina na laione daukata.

⁹ “Sa dodoka na ligana ko koya ki na uluvatu, ka sa vukica na veiulunivanua mai vuna.

¹⁰ Sa kelia na dreke ni wai e na maliwa ni veivatu, ka sa kunea na ka talei kecega na matana.

¹¹ Sa bonota na uciwai ko koya, me kakua ni vuabale; ka sa kauta mai ki na rarama na ka sa vuni.

¹² “Ia ena kune li evei na vuku? Ka evei li na i tikotiko ni yalomatua?

¹³ Sa sega na tamata me kila na kena bibi, ka sa sega ni kune e na vanua ni bula.

¹⁴ Sa kaya na vanua titobu, ‘Sa sega vei au,’ ka sa kaya na wasawasa, ‘Sa sega vei au.’

¹⁵ Ena sega ni voli rawa e na koula, kei na siliva ena sega ni rawa ni vakarautaki me kenai voli.

¹⁶ Ena sega ni vakatauvatani na kenai voli kei na koula mai Ofa, se na onikisa talei, se na safaia.

¹⁷ Na koula kei na karisitala sa sega ni tautauvata kaya, ka na sega ni rawa ni veisautaki kei nai yaya koula dina.

¹⁸ Me kakua ni cavuti na lase se na karisitala; nai sau ni yalomatua sa cecere cake mai na mata-ni-civa.

¹⁹ A topasa ni Eciopea sa sega ni tautauvata kaya, ena sega talega ni vakatauvatani kei na koula dina.

²⁰ “Ia sa na qai vu beka mai vei na vuku? Ka sa evei na vanua me kune kina na yalomatua?

²¹ Ni sa vunitaki ga mai na matadra kecega era bula tiko, ka sa tabonaki mai vei ira na manumanu vuka.

²² Ko Rusa kei Mate erau sa kaya, ‘Keirau sa rogoca na kenai rogorogo e na daliga i keirau.’

²³ “Na Kalou ga sa kila na kenai lakolako, ka sa kila ko koya na kena vanua.

²⁴ Baleta ni sa rai yani ko koya ki nai yalayala kei vuravura ka sa kunea na veika kecega e ruku i lomalagi.

²⁵ Ni gauna sa solia kina ko koya ki na cagi na kena kaukauwa ka vakatovolea na wai e na dua na kena i vakarau,

²⁶ ka lesia na kenai valavala ni uca kei na sala ni livaliva kei na kurukuru,

²⁷ sa qai kunea na ka oqori ko koya ka kacivaka; a sa vakataudeitaka, ka sa vakadikeva talega.

²⁸ Ka sa kaya vua na tamata, ‘Raica, na rerevaka na Turaga, sai koya na vuku; kei na biuta na ka ca sai koya na yalomatua.’ ”