Jope 27 - Ai Vola Tabu (Vakadewa Makawa Vakavoutaki 2021)

Sa Vakadeitaka Tikoga ko Jope na Nona Yalodina

¹ A sa tomana na nona i vakamacala ko Jope, ka kaya:

² “Me vaka sa bula na Kalou, o koya ka sa kauta tani na noqu dodonu, kei Koya sa Kaukauwa, o koya ka sa vakararawataka na yaloqu,

³ ni se tiko ga e lomaqu na noqu i cegu, ka se tiko ga e na qara-ni-ucuqu na yalo ni Kalou,

⁴ ena sega dina ni vosataka na ka ca na tebenigusuqu, ka na sega ni cavuta na veivakaisini na yamequ.

⁵ Me yawa tani sara vei au me'u vakadonui kemudou; au na sega ni biuta tani vei au na noqu yalododonu me yacova sara na noqu mate.

⁶ A noqu yalododonu ka'u sa taura matua, ka'u na sega ni biuta; ena sega ni beitaki au na lomaqu e na veisiga kece ni noqu bula.

⁷ “Me vakataki ira na tamata ca ko ira na noqu meca, kei koya sa dauvorati au me vakataki ira na tawa dodonu.

⁸ Ia ka cava na ka me vakanuinui kina ko koya na dauveivakaisini ni sa tagutuvi koya na Kalou, ni sa kauta tani na nona bula na Kalou?

⁹ Ena rogoca beka na Kalou na nona tagi ni sa qai yacovi koya na ka rarawa?

¹⁰ Ena kune marau li vei Koya sa Kaukauwa? Ena daumasu tikoga li vua na Kalou e na veigauna?

¹¹ Au na vakavulici kemudou e na vuku ni liga ni Kalou; au na sega ni vunia na ka sa tu vei Koya sa Kaukauwa.

¹² Raica, koi kemudou kecega dou sa raica oti; ka qai cava ga dou sa qai sega tu kina ni macala?

¹³ “Oqo na nona i votavota na tamata ca mai vua na Kalou, kei na ka era na taukena ko ira nai valavala vakaukauwa mai vei Koya sa Kaukauwa.

¹⁴ Kevaka sa vakalewevuqataki mai na luvedra, eratou na mate e nai seleiwau; era na sega talega ni mamau e na madrai ko ira na nona kawa.

¹⁵ Ko ira era vo tiko vua era na buluti e na mate, ena sega talega ni tagicaki ira na nodra yada.

¹⁶ E dina ga ni ra sa binia vata na siliva me vaka na kuvu-ni-soso, ka binibinia cake nai sulu me vaka na qele—

¹⁷ era na binibinia cake, ia era na vakaisulu ga kina na yalododonu, ka ra na vota na siliva ko ira sa sega ni cala.

¹⁸ Era sa tara na nodra veivale me vaka na sova ni manumanu, ka vaka na vale tabanikau sa cakava nai vakatawa.

¹⁹ Era sa koto sobu kei na nodra vutuniyau, ia era na sega tale ni kumuna vata; era dolava na matadra, ka sa yali nai yau.

²⁰ Sa vauci ira na domobula me vaka na waluvu; sa butakoci ira tani e na bogi na cava.

²¹ Sa kauti ira tani na cagi ni tokalau ka sa lako tani sara ko koya; sa caginataki ira tani vakaukauwa mai na nona vanua.

²² Sa biliraki ira ka sega ni loloma; era sa dro tani vakatotolo sara mai na nona kaukauwa.

²³ Ena vakasausau vua ko ira na tamata, ka vakasiusiutaki koya tani mai na nona i tikotiko.