Jope 20 - Ai Vola Tabu (Vakadewa Makawa Vakavoutaki 2021)

Sa Vosa ko Sofa: Na Caka Cala e na Ciqoma na Kena i Sau

¹ Sa qai vosa ko Sofa na kai Neama, ka kaya:

² “Vakarorogo mada! Sa uqeti au na nanuma ni lomaqu me'u vosa, e na vuku ni veivakayavalati ni yaloqu.

³ Au sa rogoca nai vunau ka'u sa sega na taleitaka, ka sa sauma vei au e dua na yalo sa sega ni'u tugana rawa.

⁴ Ko sa sega beka ni kila makawa na ka oqo, mai na gauna sa vakatikori kina na tamata e vuravura,

⁵ ni sa ka lekaleka na nodra marau nai valavala ca, ka sa oti rawarawa sara na reki ni dauveivakaisini?

⁶ E dina ga ni sa laveti na nona totoka ki lomalagi, ka sa yaco ki na o na uluna,

⁷ ena rusa laivi sara ga me vaka na nona benu; ko ira era sa raica era na kaya, ‘Evei ko koya?’

⁸ Ena vuka tani yani ko koya me vaka na tadra, ka na sega ni kune tale; ena vakasevi tani ko koya me vaka na raivotu e na bogi.

⁹ A mata i koya talega ka kunea ena sega ni kunea tale, ena sega ni raici koya tale na nona i tikotiko.

¹⁰ A luvena era na via vakayalovinakataki ira na dravudravua, ena vakasuka talega na ligana na nodra i yau.

¹¹ A suina sa sinai tu e nona i valavala ca ni sa cauravou, ia ena koto sobu kaya e na kuvu-ni-soso.

¹² “Kevaka sa kamikamica e na gusuna nai valavala ca, ka sa vunia e ruku ni yamena,

¹³ ka sa domica, ka sega ni via tiloma, ka sa mama tikoga e na gusuna,

¹⁴ ena duatani mai na kenai kanakana e ketena; ka sa weli gaga ni gata mai e lomana.

¹⁵ Sa tiloma sobu ko koya nai yau talei ka sa luaraka cake tale; sa biuta tani mai na ketena na Kalou.

¹⁶ Ena sucuma na poisoni ni gata; ena vakamatei koya na yame ni gata loa.

¹⁷ Ena sega ni raica na veiuciwai, na veisoniwai sa dave kina na oni kei na uro ni sucu.

¹⁸ A ka sa oca kina ena vakasuka tale ka na sega ni tiloma; me vaka nai yau sa rawata ko koya ena solia vaka talega kina, ka na sega ni rekitaka.

¹⁹ Ni sa vakasaurarataka ka biuta na dravudravua; a sa kovea na vale sa sega ni tara ko koya.

²⁰ “Ena sega dina ni vakacegu na ketena; ena sega ni maroroya ko koya na ka sa domona.

²¹ Sa sega na ka e vo ni sa kana oti ko koya; o koya oqo ena sega kina ni tudei na nona vuavuai.

²² Ni sa vutuniyau sara tiko ena qai dravudravua mai; ena tarai koya na ligadra kecega nai valavala ca.

²³ Me la'ki vakamamautaka na ketena, ena vakatala vua na Kalou na nona cudru katakata ka vakatauca vua me vaka sa kena kakana.

²⁴ Ena dro tani mai nai yaragi kaukamea; ia na gasau ni dakaititi parasa ena lauti koya.

²⁵ Sa ucuni mai, sa suaka basika na yagona, io na matana makamakalivata ena suaka basika na mina; sa kani koya na domobula.

²⁶ A butobuto kecega ena vuni tu e nona yasana vuni; a bukawaqa sa sega ni irivi ena kati koya; ena ca ko koya sa vo tiko e nona vale.

²⁷ Ena tukuna na nona i valavala ca ko lomalagi, ena veimecaki kaya talega ko vuravura.

²⁸ Ena lako tani nai yau sa tubu e nona vale, ena dave yani e na siga ni nona cudru.

²⁹ Oqo nai votavota ni tamata i valavala ca mai vua na Kalou, kei na ka sa lesia na Kalou me nona.”