Jope 19 - Ai Vola Tabu (Vakadewa Makawa Vakavoutaki 2021)

Sa Sauma ko Jope: Au Kila ni Bula Tiko na Noqu i Vakabula

¹ A sa vosa ko Jope, ka kaya:

² “A cava na kena dede mo dou vakararawataki au tiko kina ka vorolaki au vakalalai e na vosa?

³ Sa vakatini oqo na nomudou vosavakacacataki au; dou sa sega li ni madualaka na nomudou vakacalai au?

⁴ Ia kevaka e mani dina ni'u sa cala koi au, sa tiko ga vei au na noqu cala.

⁵ Kevaka e dina ni dou sa vakalevulevui kemudou kivei au ka beitaka vei au na ka ka'u sa rogo ca kina,

⁶ mo dou kila sara oqo ni sai koya na Kalou sa vakabalei au, ka sa sogolati au e nona lawa.

⁷ Raica, ka'u sa qolouvaka mai, ‘Nai valavala kaukauwa!’ ia ka'u sa sega ni rogoci; au sa kaci vakadomoilevu, ia sa sega ni yaco na lewa matau.

⁸ Sa sogolatia na noqu sala ko koya, me dredre kina ni'u lako, ka sa vakabutobutotaka na noqu gaunisala.

⁹ Sa luvata tani vei au na noqu i ukuuku, ka sa kauta tani nai sala vakaturaga mai na uluqu.

¹⁰ Sa basuraki au sobu e na veitikina, ka'u sa yali kina, ka sa cavuivuvutaka na ka ka'u sa vakararavi kina me vaka na vunikau.

¹¹ Sa vakawaqa talega vei au na nona cudru ka sa okati au me'u vaka e dua vei ira na nona meca.

¹² Sa lako vata mai ko ira na nona mataivalu, ka ra caramaka na nodra sala me rawai au, ka ra sa vakavolivolita vakaivalu na noqu i tikotiko.

¹³ “Sa vakaveiyawakitaki ira na wekaqu vei au, ka ra sa qai lomavakatani vei au ko ira nai kai noqu.

¹⁴ Sa ra yali na wekaqu, ka ra sa guilecavi au ko ira na noqu i tokani.

¹⁵ Ko ira era tiko e noqu vale era sa guilecavi au; na noqu vada dauveiqaravi sa okati au me'u vulagi; au sa vaka na kai tani e matadra.

¹⁶ Au a kaciva na noqu tamata, ia sa sega ni rogo mai; sa dodonu me'u vakamasuta e na gusuqu me yalololoma.

¹⁷ Sa ka tani vua na watiqu na noqu i cegu, ka ra sa vakasisilataki au ko ira na noqu lewe ni matavuvale.

¹⁸ Ko ira mada ga na lalai era sa beci au; ni'u sa vakanamata cake, era sa vosacataki au.

¹⁹ Sa cati au vakaukauwa ko ira kece nai tokani voleka, kei ira ka'u sa lomana era sa vuki ka saqati au.

²⁰ A suiqu sa kabita na kuliqu kei na lewequ, ka'u sa dro bula ga e na kuli ni batiqu.

²¹ Dou lomani au mai, dou lomani au mai, koi kemudou na noqu i tokani, ni sa tarai au na liga ni Kalou!

²² A cava dou sa vakacacani au kina me vaka sa cakava na Kalou? A cava dou sa sega ni yalo vakacegu kina e na vuku ni yagoqu?

²³ “Isa me bau volai mada na noqu vosa! Isa me ra bau a toqai mada e na dua nai vola!

²⁴ Isa me ceuti e na peni kaukamea kei na uma ki na vatu me tudei ka tawa mudu!

²⁵ Ni'u sa kila sa bula tiko na noqu i Vakabula, ka na tucake tu ko koya e delai vuravura e na siga mai muri;

²⁶ ka gauna sa rusa oti kina na kuli ni yago oqo, ka'u na qai kunea ga na Kalou e na yago oqo,

²⁷ ko koya ka'u na raica dina sara koi au, ka kunea e na mataqu, ka sega ni dua tani tale. Sa malumu ga e lomaqu na yaloqu!

²⁸ Kevaka mo dou kaya, ‘Me keitou qai vakacacani koya vakacava!’ kei na, ‘Sa kune ni tiko ga vua na vu ni ka kece’;

²⁹ dou rerevaka nai seleiwau, ni sai sau ni cudru nai seleiwau, ka mo dou kila kina ni sa tiko na veilewai.”