Jope 17 - Ai Vola Tabu (Vakadewa Makawa Vakavoutaki 2021)

Sa Masulaka ko Jope na Veivakacegui

¹ Sa mavoa na yaloqu; sa oti yani na noqu siga; sa vakarau tu vei au nai bulubulu.

² Ko ira na dauveivakalialiai era sa tiko kei au, kei na mataqu sa tiko vata kei na nodra veivakararawataki.

³ “Me dua mada na ka me daru veivakadinadinataka; ko cei mada ko koya ena veivakataudeitaki kivei au?

⁴ Ni kemuni sa tabonaka na lomadra me ra kakua ni kila-ka, o koya oqo ko ni na sega kina ni vakalaiva me ra qaqa.

⁵ Ko koya sa vosaveicavilaki vei ira na nona i tokani baleta nai yau— ena cala na matadratou na luvena.

⁶ “Sa soli au talega ko koya me'u vosabecitaki vei ira na tamata, ia ka'u sa ka vakasisila e matadra.

⁷ Sa buawa na mataqu e na vuku ni rarawa, ka sa vaka nai yaloyalo na tikiqu kecega.

⁸ Ena kurabui ko ira na yalododonu e na ka oqo, ena yavala ko koya na tawa cala me vorati koya na dauveivakaisini.

⁹ Ia na yalododonu ena lako dei tiko e nona sala, kei koya sa liga savasava ena kaukauwa cake tikoga.

¹⁰ Ia koi kemudou kecega, dou lesu mada mai, ni'u sa sega ni kunea vei kemudou e dua na tamata yalomatua.

¹¹ Sa oti yani na noqu siga; sa muduki tani na noqu i naki, io, na vakanananu ni lomaqu.

¹² Era sa vukica na bogi me siga; ‘Na rarama,’ era kaya, ‘Sa voleka ki na butobuto.’

¹³ Ke'u sa waraka nai bulubulu me noqu vale, ke'u sa cakava na noqu i mocemoce e na butobuto,

¹⁴ ke'u sa kaya yani ki na qara, ‘Ko iko na tamaqu,’ ka kaya ki na baca, ‘Na tinaqu,’ se ‘Na ganequ,’

¹⁵ sa qai evei na ka me'u nuitaka? Ko cei ena kunea na ka ka'u sa nuitaka?

¹⁶ Ena lako sobu li ki nai sogo ni bulubulu? Eda na lako sobu vata beka ki na kuvu-ni-soso?”