Jope 16 - Ai Vola Tabu (Vakadewa Makawa Vakavoutaki 2021)

Vakadeitaka ko Jope ni Sega na Nona Cala

¹ Sa qai vosa ko Jope ka kaya:

² “E vuqa na ka vakaoqo ka'u sa rogoca; na dauveivakacegui dauveivakararawataki koi kemudou kecega.

³ Ena oti ninaica na vosa wale? Se na cava beka sa vakayavalati iko mo vosa tikoga mai kina?

⁴ Sa rawa vei au me'u vosa talega me vakataki kemudou, kevaka dou sa vakataki au; Sa rawa vei au me'u veitokonitaka na vosataki kemudou, ka kurea na uluqu vei kemudou.

⁵ Sa rawa vei au me'u vakaukauwataki kemudou e na gusuqu, kei na veivakacegui ni tebenigusuqu ena vakamalumutaka na nomudou rarawa.

⁶ “Ke'u sa vosa, sa sega ni malumu kina na noqu rarawa, ka kevaka ka'u sa cegu ni vosa, na mosi cava e na takali li vei au?

⁷ Ia oqo sa qai vakaocai au vakaidina na Kalou; ka sa vakatara me'u vakayalia na wekaqu kecega.

⁸ Ka sa vakasalulutaki au ko koya, ka oqori sai tukutuku me baleti au; na noqu suivotu sa rairai mai, ka sa vakatakilai au ki mataqu.

⁹ Sa dresulaki au e na nona cudru, ka sa cati au; sa vakasequruquru bati vei au; ko koya na noqu meca sa mata cudrucudru mai vei au.

¹⁰ Era sa vakadudu gusu vei au na tamata; era sa sabica na baluqu e na veivakalialiai; era sa yalovata me vakacacani au mai.

¹¹ Sa soli au yani na Kalou vei ira na tamata ca ka sa biuti au yani ki na ligadra nai valavala ca.

¹² Au a tiko vakacegu, ka sa qai musuki au ko koya; sa taura talega na domoqu, ka vorolaki au vakalalai; sa vakaturi au me'u nona takete;

¹³ sa vakavolivoliti au ko ira na nona dauvanavana. Sa seleta tadola na noqu ivi ko koya, ka sega ni yalololoma; sa livia yani na miqu ki na qele.

¹⁴ Sa dauvorolaki au wasoma; sa daucicivi au mai vakusakusa me vaka e dua na tuwawa.

¹⁵ Au sa cula nai sulu taga ki na kuliqu, ka vakadavora sobu na noqu kaukauwa ki na kuvu-ni-soso.

¹⁶ A mataqu sa damudamu e na tagi, ka sa tauca na dakudaku-ni-mataqu na yaloyalo ni mate,

¹⁷ ka dina ga ni sa sega ni tu e ligaqu nai valavala kaukauwa, ka sa savasava na noqu masumasu.

¹⁸ “O iko na qele, mo kakua ni vunia na noqu dra, laiva ga na noqu tagi me kakua ni kune vakacegu.

¹⁹ Oqo talega, raica, sa tiko mai lomalagi na noqu i vakadinadina, ka sa tiko mai cake ko koya sa dauveitokoni e na vukuqu.

²⁰ Sa vakalialiai au ko iratou na noqu i tokani; sa tuturu tikoga na wai ni mataqu vua na Kalou,

²¹ ka me tara mada vua na tamata me veilewai kaya na Kalou, me vaka na tamata sa veilewai kaya na wekana!

²² Ni sa na oti mada e vica ga na yabaki, ka'u na qai lako yani e na sala ka'u na sega ni lesu tale mai kina.