Jope 15 - Ai Vola Tabu (Vakadewa Makawa Vakavoutaki 2021)

Sa Vunauci Jope ko Elifasi

¹ Sa qai vosa ko Elifasi na kai Temani, ka kaya:

² “Me cavuta li na vuku e sega ni yaga ko koya na tamata vuku, ka vakamamautaka na ketena e na cagi ni tokalau?

³ Me totaka beka na ka e na vosa e sega ni yaga, se e nai vakavuvuli sa sega na betena?

⁴ Ia ko iko, ko sa biuta tani na rerevaka na Kalou, ka tarova na masu e na mata ni Kalou.

⁵ Ni sa tukuna na gusumu na nomu i valavala ca, ko sa digitaka na vosa ni daulawaki.

⁶ A gusumu ga sa vakacalai iko, ka segai koi au; io, na tebenigusumu ga sa tukuni iko.

⁷ “Ko iko beka nai matai ni tamata ka sucu? Se ko buli mada eliu ko iko ka qai buli e muri na veiulunivanua?

⁸ Ko sa vakarorogo beka ki nai vakasala ni Kalou? Ka ko dauyalana li na vuku me nomu ga?

⁹ A cava ko sa kila ka keitou sa sega ni kila? Se cava ko sa tugana rawa ka sa sega ni matata vei keitou?

¹⁰ Sa tiko vei keitou na ulu sika kei ira sa qase sara, ko ira sa qase cake vei tamamu.

¹¹ Sa ka lailai beka vei iko na veivakacegui ni Kalou, se na vosa sa tau vakamalua vei iko?

¹² A cava sa kauti iko vakatani kina na lomamu, ka cava sa sausauriva kina na matamu,

¹³ mo vakatanitaka kina na yalomu vua na Kalou ka vosataka kina mai gusumu na vosa vakaoqori?

¹⁴ A cava na tamata, me sa savasava ko koya? Se ko koya sa sucu mai vua na yalewa, me yalododonu ko koya?

¹⁵ Raica, na Kalou sa sega ni vakadinati ira na nona era yalosavasava, ka sa sega ni savasava e matana na lomalagi;

¹⁶ ena lailai sobu vua na tamata vakasisila ka dukadukali, ko koya sa dau gunuva na ca me vaka na wai!

¹⁷ “Au na vakatakila vei iko; rogoci au mai; na ka ka'u sa raica ka'u na tukuna—

¹⁸ na veika era sa tukuna na tamata vuku, ka sega ni vunia mai vei ira na nodra qase,

¹⁹ ko ira ga ka soli kina na vanua, ka sega ni kai tani me lako vata kei ira.

²⁰ Sa kana rarawa ko koya na tamata ca e na nona siga kecega, ka sa vunitaki vua na dauivalavala kaukauwa se na vica beka na nona yabaki.

²¹ Sa rorogo tu e daligana na ka rerevaki; ni sa sautu tiko, ena yatovi koya na dauveivakarusai.

²² Sa sega ni dinata ni na lesu tale mai na butobuto, a sa waraki koya tu nai seleiwau.

²³ Sa qara sese voli tu na kena, ka kaya, ‘Sa evei?’ Sa kila ko koya ni sa voleka sara vua na siga ni butobuto;

²⁴ sa vakarerei koya na rarawa kei na yaluma; era gumatua vua, me vaka na tui sa vakarau ki nai valu.

²⁵ E na vuku ni nona sa dodoka na ligana vua na Kalou, ka sa beci Koya sa Kaukauwa,

²⁶ sa cici vakadomoqa vei koya kei na dua nai sasabai sukusukura;

²⁷ E na vuku ni nona sa ubia na matana e nona uro, ka sa levulevu mai na tolona,

²⁸ ena tiko ga kina ko koya e na veikoro lala, e na veivale sa sega e tiko kina, ka ra sa voleka ni rusa;

²⁹ ena sega ni vutuniyau ko koya, ena sega ni tiko dei na nona i yau, ena sega talega ni vakadedetaka na kena vinaka e vuravura;

³⁰ ena sega ni lako tani mai na butobuto; ena malai yani na tabana e na yameyame ni buka, ena takali talega ko koya e nai cegu ni gusuna.

³¹ Me kakua na dauvakacalai me vakararavi e na ka sa sega ni yaga; ni na sega ni yaga na kenai sau.

³² Ni se bera na kena gauna sa na yaco ga, ena sega talega ni bulabula na tabana.

³³ Ena kureitaki sobu na vuana vou me vaka na vaini, ena mimira na sena me vaka na olive.

³⁴ Ni na lala na nodra i soqosoqo na dauveivakaisini, ia na bukawaqa sa kania na valelaca ni veivaqumi.

³⁵ Era sa kunekunetaka na ca, ka vakasucuma na lasu, ka sa vakarautaka na veivakaisini na lomadra.”