Jope 14 - Ai Vola Tabu (Vakadewa Makawa Vakavoutaki 2021)

Tomana ko Jope na Vosa: Sa Toro Voleka ko Mate ki na Tamata Yadua

¹ “A tamata ka sa sucu mai vua na yalewa sa vica walega na nona siga ka sa ni sinai e na rarawa.

² Sa se cake mai ko koya me vaka na senikau ka sa mira tale yani, sa dro talega me vaka nai yaloyalo, ka sa sega ni tudei.

³ Sa daugoleva beka na matamuni e dua sa vakaoqo? Ko ni sa ka kauti au mai me'u veilewai vata kei kemuni?

⁴ Ko cei e na rawa ni kauta mai e dua na ka savasava mai na ka sa sega ni savasava? Sa sega sara e dua.

⁵ Ni sa lokuci tu na nona siga, ka sa tu vei kemuni nai wiliwili ni nona vula, ka kemuni sa lesia oti talega na kenai yalayala me kakua ni sivia,

⁶ mo ni gole tani mada mai vua, me vakacegu ko koya, me vakaotia mada na nona siga, me vaka na tamata sa voli na nona cakacaka.

⁷ “Ni sa tiko na nona i nuinui na kau, kevaka sa ta sobu, ena tubu tale, ena sega talega ni mudu na kena tubucoke mai.

⁸ E dina ga ni daubula dede na wakana e na qele, ka daumate na vuna e na soso,

⁹ ia ena tubu cake tale mai ni sa boica na wai ka vakatubura na tabana me vaka na kau sa tei.

¹⁰ Ia sa mate ga na tamata, ka sa takali yani; io sa ciba na tamata, ka sa evei ko koya?

¹¹ Me vaka sa dauyali na wai mai na drano, ka sa dau-di ka maca na uciwai,

¹² sa vakakina na tamata era sa dui koto sobu ka sega ni tucake tale; me yacova mada ni sa yali ko lomalagi, era na sega ni yadra se vakaturi cake mai na nodra moce.

¹³ Mo ni vunitaki au mada e nai bulubulu, ka tabonaki au, me oti mada na nomuni cudru, ka lokuca vei au e dua na siga, ka nanumi au!

¹⁴ Kevaka sa ciba na tamata, ena bula tale ko koya? Au na waraka na siga kecega sa loku vei au, me yaco mada na noqu vakamataliataki.

¹⁵ Ko ni na kaci mai, ka'u na rogo yani vei kemuni; ko ni na vinakata na cakacaka ni ligamuni.

¹⁶ Ia oqo ko ni sa wilika nai cavucavu ni yavaqu, ka sega ni daunanuma na noqu i valavala ca.

¹⁷ Sa dregati e loma ni taga na noqu talaidredre, ia ko ni sa cula kina na noqu i valavala ca.

¹⁸ “Sa yaco dina me ka wale na ulunivanua sa lutu sobu; a vatu talega, sa biu tani mai na kena yasana;

¹⁹ sa solota na vatu na wai; na kui kaukauwa sa savata tani na ka sa tubu mai na kuvu-ni-qele; ko ni sa vakarusa kina na vakanuinui ni tamata.

²⁰ Ko ni sa gumatua tikoga vua, ka sa takali ko koya; ko ni sa vakatanitaka na matana, ka vakatalai koya yani.

²¹ Sa vakarokorokotaki mai ko iratou na luvena, ka sa sega ni kila ko koya; a ratou sa vakasivoi, ka sa sega ni kila ko koya.

²² A sa vakila ga ko koya na mosi ni yagona, ka sa tagi walega e na vukuna.”