Jope 13 - Ai Vola Tabu (Vakadewa Makawa Vakavoutaki 2021)

¹ “Raica, a ka kecega oqo sa kunea na mataqu, sa rogoca na daligaqu ka sa kila.

² A ka dou sa kila, ka'u sa kila talega; ka'u sa sega ni lolovira sobu vei kemudou.

³ Ia ka'u sa via vosa vei Koya sa Kaukauwa, au sa vinakata me keirau veitarogi kaya na Kalou.

⁴ Ia koi kemudou, dou sa dautulia na lasu; dou sa vuniwai sa sega ni yaga kecega.

⁵ Ke dou a bau tiko lo mada ga, sa na qai nomudou vuku sara ga oqori!

⁶ Dou rogoca mada oqo na noqu i vakamacala, ka dou rogoca na vakamamasu ni tebenigusuqu.

⁷ Dou na vosa vakailasu beka me baleta na Kalou ka vosa vakaveivakaisini e na vukuna?

⁸ Dou na cakacaka vakatawadodonu beka e matana, ka ia na veileti e na vuku ni Kalou?

⁹ Sa vinaka beka me vakatarogi kemudou ko koya? Se dou sa vakalialiai koya, me vaka sa ia na veivakalialiai na tamata?

¹⁰ Ena vunauci kemudou vakaidina ko koya kevaka dou sa vakadonui ira lo na tamata.

¹¹ Ena sega beka ni vakarerei kemudou na nona i tovo vakaturaga, ka sega ni kani kemudou na rerevaki koya?

¹² A nomudou vosa vakavuku sai bole dravusa, a nomudou i vakamacala sai vakamacala malumalumu vaka na qele.

¹³ “Dou vakagagalu mada, ka me'u vosa koi au, me qai veitalia se cava ena yacovi au.

¹⁴ A cava me'u taura kina na lewequ e batiqu, ka taura e ligaqu na noqu bula?

¹⁵ Raica, kevaka sa vakamatei au ko koya, ka'u na vakararavi ga vua; ia na noqu i valavala ka'u na vakadinadinataka e matana.

¹⁶ Sai koya talega ka'u na vakabulai kina, ni sa sega na tamata dauveivakaisini me toro yani vua.

¹⁷ Dou rogoca vakavinaka na noqu vosa, ka me tiko sara na noqu i tukutuku e na daligamudou.

¹⁸ Raica, ka'u sa qai vakarautaka tu na veika me baleti au; ka'u sa kila ni'u na vakadonui.

¹⁹ Ko cei sa tiko oqori me na beitaki au? Ke sa vakakina, ia ka'u na qai galu kina ka ciba.

Na Masu Malumalumu i Jope

²⁰ E rua ga na ka mo ni kakua ni kitaka vei au, ka'u na qai sega ni vunitaki au vei kemuni:

²¹ mo ni kauta vakayawa tani vei au na ligamuni, ka me kakua talega ni vakarerei au na ka rerevaki mai vei kemuni.

²² Mo ni qai kaci mai, ka'u na qai sauma yani; se'u vosa mada koi au, mo ni qai sauma mai vei au.

²³ E vakavica beka na noqu caka cala kei na noqu i valavala ca? Mo ni vakatakila vei au na noqu talaidredre kei na noqu i valavala ca.

²⁴ A cava ko ni sa vunia kina na matamuni ka okati au me'u nomuni meca?

²⁵ Ko ni na vurulaka beka na drau-ni-kau sa cagina ka vakasava na vu-ni-sila malai?

²⁶ Ni ko ni sa vola na ka vakararawa sara vei au ka votai au e na noqu i valavala ca ni'u a cauravou.

²⁷ Ko ni sa vesuka talega na yavaqu e nai vesu kau ka vakaraica matua na noqu i lakolako kecega; ko ni sa lesia nai yalayala ni qeteqete ni yavaqu.

²⁸ A sa malai yani ko koya me vaka na ka sa vuca, me vaka nai sulu sa kania na sarasara.