Jope 12 - Ai Vola Tabu (Vakadewa Makawa Vakavoutaki 2021)

Sa Sauma ko Jope: Sa Levu na Noqu Vakalialiai

¹ A sa vosa ko Jope, ka kaya,

² “Sai kemudou dina ga na tamata, ia na vuku ena mate vata kei kemudou.

³ Ia sa tu talega vei au na lomavuku me vaka sa tu vei kemudou; ka'u sa sega ni uasivi sobu vei kemudou. Ia ko cei sa sega ni kila na veika vakaoqori?

⁴ Au sa ka ni veiwali ga vei iratou na noqu i tokani; koi au, sa masu vua na Kalou ka sa rogoci koya ko koya, a tamata dodonu ka sega ni cala, ka'u sa ka ni veiwali ga.

⁵ O koya sa tiko vakacegu sa raica sobu na veika ca, ia sa vakarau tu me sota kaya ko koya sa sega ni tudei na yavana.

⁶ Sa sautu na nodra i tikotiko na daubutako, a ra sa tiko dei ko ira era sa vakacudruya na Kalou, io na tamata sa dausoli-ka kina na Kalou.

⁷ “Ia mo taroga mada na manumanu ni vanua, era na vakavulici iko; kei na manumanu vuka, ka ra na tukuna vei iko;

⁸ se vosa ki na vanua, ka na vakavulici iko; ia na ika talega ni waitui ena vakatusa vei iko.

⁹ Ko cei me sega ni kila e na ka kecega oqo ni sa cakava na ka oqo na liga i Jiova?

¹⁰ Sa tiko e ligana na nodra i cegu na ka kecega sa bula kei na yalodra na tamata kecega.

¹¹ Sa sega beka ni vakatovolea na vosa na daliga ka sega talega ni tovolea na kena kakana na gusu?

¹² Sa tu beka na vuku vei ira na qase, kei na yalomatua vei ira sa vuqa na nodra siga?

¹³ “Sa tu vei Koya na vuku kei na kaukauwa; sa nona na lewa dina kei na yalomatua.

¹⁴ Raica, sa basuka sobu ko koya, a sa dredre me tara tale e dua; sa sogolatia na tamata, ka sa sega e dolava rawa.

¹⁵ Raica, sa tarova na wai, ka sa mamaca; sa vakatauca tale, a sa la'ki luvuci vuravura.

¹⁶ Sa tu vei koya na kaukauwa kei na vuku; sa nona ko koya sa vakacalai kei koya sa vakacala.

¹⁷ Sa kauti ira tani vakabobula na daubose, a sa vakasesei ira na mataveilewai.

¹⁸ Sa sereka na kedrai vesu na tui, ka sa vauca na tolodra e nai vau.

¹⁹ Sa kauti ira tani vakabobula na turaga, ka sa vakabalei ira na qaqa.

²⁰ Sa vakatakalitaka na nodra vosa na daudina, ka sa kauta tani na nodra yalomatua na qase.

²¹ Sa vakaisini ira na turaga, ka sa sereka nai vau ni tolodra na qaqa.

²² Sa vakarairaitaka na ka titobu mai na butobuto, a sa kauta mai ki na rarama na yaloyalo ni mate.

²³ Sa vakalewevuqataki ira na veimatanitu, ka qai vakarusai ira tale; sa vakalevulevuya na veimatanitu, ka sa vakalailaitaka tale.

²⁴ Sa vakatakalitaka na nodra yalomatua na turaga ni kai vuravura, a sa vakasesei ira voli e na vanua lala sa sega kina na sala.

²⁵ Era vakayayamo voli e na butobuto ka sa sega na rarama; a sa cakava ko koya me ra tatabalebale tu me vakataki koya sa mateni.