Jope 11 - Ai Vola Tabu (Vakadewa Makawa Vakavoutaki 2021)

Sa Vunauci Jope ko Sofa: Na Cala i Jope e Ganita me Totogitaki

¹ Sa qai vosa ko Sofa na kai Neama, ka kaya,

² “Me sega beka ni saumi yani na vosa e vuqa, se me vakadonui beka na tamata dauvosa?

³ Me ra tiko lo beka na tamata e na vuku ni nomu lasu, ka me sega beka ni vakamaduataki iko e dua ni ko sa ia na veivakaisini?

⁴ Ia ko sa kaya, ‘Sa dodonu na noqu i vakavuvuli, ka'u sa savasava talega e na mata ni Kalou.’

⁵ Ia me vosa mada na Kalou, ka dolava na tebenigusuna vei iko,

⁶ ka vakatakila vei iko na ka vuku e vuni tu! Ni sa levu cake, ka lailai na kena sa kilai. Mo qai kila ni sa ka lailai e taroga vei iko na Kalou ka levu cake na nomu i valavala ca.

⁷ “Ni ko sa dikeva, ko na kilai koya rawa beka kina na Kalou? Ko na kilai koya deivaki rawa sa Kaukauwa?

⁸ Sa cecere cake vei lomalagi—a cava ko na cakava? Sa titobu cake vei Bulu—a cava ko na kila?

⁹ A kenai vakarau sa balavu ka lekaleka ko vuravura, ka sa rabailevu cake mai na wasawasa.

¹⁰ Kevaka sa lako tu ka sogolatia, ka vakasoqona vata, ko cei me tarovi koya?

¹¹ Ni sa kilai ira na tamata lasulasu; sa kunea talega na caka ca, ia ena sega beka ni vakanananu kina?

¹² Ni sa viavia vuku na tamata lialia, ia ka sa sucu ga me vaka na luve ni asa kila.

¹³ “Kevaka ko sa vakarautaka na yalomu, ko na dodoka na ligamu vei koya.

¹⁴ Kevaka sa tu na ca e ligamu, mo biuta vakayawa, ia me kakua ni tiko nai valavala ca e na nomu veivale.

¹⁵ Ni ko na qai ta cake ka na sega ni tauvi duka na matamu; ia ko na tudei ga, ka na sega ni rere.

¹⁶ Ni ko na guilecava na nomu vakaloloma; ka dau nanuma kina ni sa vaka na wai sa lako tani yani.

¹⁷ Ia na nomu bula ena uasivi cake mai na rarama ni siga levu; ko na cila yani, ko na tautauvata kei na kida ni mataka.

¹⁸ Ia ena tiko dei na lomamu, ni sa nuitaka na vinaka; ia ko na vakararai voli ga, ka koto sobu e na vakacegu.

¹⁹ Ia ko na koto sobu, ka na sega e dua me vakarerei iko; a ra na vakamasuti iko na lewe vuqa.

²⁰ Ia ena oca wale na matadra nai valavala ca; ena yali na nodra i drodro, ia na nodra i nuinui sai koya me ra ciba yani.”