Joni 9 - Ai Vola Tabu (Vakadewa Makawa Vakavoutaki 2021)

Sa Vakabula ko Jisu e Dua ka Sucu Mataboko

¹ Ia ni sa lako yani ko koya, sa raica e dua na tamata sa sucu mataboko.

² A sa tarogi koya ko ira na nona tisaipeli, ka kaya, “Vakavuvuli, ko cei sai valavala ca, na tamata oqo se ko tamana kei tinana, sa sucu mataboko kina ko koya?”

³ Sa kaya ko Jisu, “Sa sega ni valavala ca ko koya oqo, se tamana kei tinana, me vakatakilai ga na cakacaka ni Kalou e na vukuna.

⁴ Sa dodonu me da kitaka na cakacaka i koya sa talai au mai, ni sa siga toka; sa voleka mai na bogi, sa sega ni cakacaka rawa kina e dua na tamata.

⁵ Ni'u sa tiko e vuravura, au sa rarama kei vuravura.”

⁶ Ni sa vosa vakaoqo ko koya, sa kasivita na qele, ka ulia vata na soso kei na kasivi, a sa boroya kina na mata ni tamata mataboko,

⁷ a sa kaya vua, “Laki tavoi e nai silisili ko Sailoama” (a kenai balebale, Sa talaki). A sa lako yani, ka tavoi, ka lesu mai ka rai rawa.

⁸ Era sa qai kaya kina na lewe ni koro kei ira sa raici koya eliu ni sa daukerekere, “Sa sega li ni koya oqo sa dautiko ka daukerekere?”

⁹ Sa kaya eso, “Sai koya oqo.” Eso tale era kaya, “E segai, ia sa vakataki koya.” Sa kaya ko koya, “Sai au ga.”

¹⁰ Era sa qai kaya vua, “Sa rai rawa vakaevei na matamu?”

¹¹ Sa kaya ko koya, “Na tamata sa vakatokai ko Jisu sa ulia na soso, ka boroya na mataqu, ka kaya vei au, ‘Lako ki Sailoama, ka tavoi.’ Ia ka'u a laki tavoi, ka'u sa qai rai rawa.”

¹² Era sa qai ka kaya vua, “Evei ko koya?” Sa kaya ko koya, “Au sa sega ni kila.”

Era Vaqaqa Matua na Farisi na Nona Vakabulai

¹³ Era sa qai kauti koya ka mataboko eliu vei ira na Farisi.

¹⁴ Ia sa Siga ni Vakacecegu sa ulia kina na soso ko Jisu, ka dolava na matana.

¹⁵ Era sa qai tarogi koya tale na Farisi, se sa rai rawa vakaevei. A sa kaya vei ira ko koya, “Sa boroya na mataqu ko koya e na soso, ka'u sa tavoi, ka'u sa qai rai rawa.”

¹⁶ Eso vei ira na Farisi era sa qai kaya, “A tamata oqo sa sega ni tamata ni Kalou, ni sa sega ni vakatabuya na Siga ni Vakacecegu.” Eso tani sa kaya, “E cakava rawa vakaevei na cakacaka-mana vakaoqo e dua na tamata i valavala ca?” A ra sa sega ni lomavata.

¹⁷ Era sa kaya tale vua na tamata ka mataboko, “A cava ko sa kaya e na vukuna, ni sa dolava na matamu?” A sa kaya ko koya, “A parofita ko koya.”

¹⁸ Ia ko ira na Jiu era sa sega ni vakadinata, ni sa mataboko eliu ko koya, ka sa rai rawa, ka ra sa kacivi rau mada na tama i koya sa rai rawa, kei na tinana.

¹⁹ A ra sa tarogi rau, ka kaya, “A luvemudrau oqo, drau sa kaya sa sucu mataboko, ne? Sa qai rai rawa vakaevei oqo?”

²⁰ Erau sa vosa vei ira ko tamana kei tinana, ka kaya, “Keirau sa kila ni sa luve i keirau oqo, ka sa sucu mataboko.

²¹ Ia keirau sa sega ni kila se sa rai rawa vakaevei, se ko cei sa dolava na matana. Sa tamata bula ko koya. Taroga vua; ena tukuna ko koya.”

²² Erau sa vosa vakaoqo ko tamana kei tinana, ni rau sa rerevaki ira na Jiu, ni ra sa qai loma vata na Jiu, me vakatatabui mai na valenilotu ko koya yadua sa vakatusa ni sa Karisito ko koya oqo.

²³ A ka oqo erau sa kaya kina ko tamana kei tinana, “Sa tamata bula ko koya, tarogi koya.”

²⁴ Era sa qai kaciva tale na tamata ka mataboko, ka kaya vua, “Vakarokorokotaka na Kalou. Keitou sa kila sa tamata i valavala ca ko koya oqori.”

²⁵ Sa vosa ko koya, ka kaya, “Au sa sega ni kila, se sa tamata i valavala ca ko koya, se segai. E dua na ka ka'u sa kila ni'u a mataboko eliu, au sa qai rai rawa.”

²⁶ Era sa qai kaya tale vua, “A cava ka kitaka vei iko ko koya? Ka dolava vakaevei na matamu?”

²⁷ Sa kaya vei ira ko koya, “Au sa tukuna walega oqo vei kemudou, ia dou a sega ni vakarogoca. Dou sa via rogoca tale e na vuku ni cava? Dou sa vinakata beka mo dou yaco talega mo dou nona tisaipeli?”

²⁸ Era sa qai vakalialiai koya, ka kaya, “O iko sa nona tisaipeli, ia koi keimami na tisaipeli i Mosese.

²⁹ Keimami sa kila ni sa vosa vei Mosese na Kalou, ia na tamata oqo, keimami sega ni kila se sa lako mai vei ko koya.”

³⁰ Sa vosa na tamata, ka kaya vei ira, “Sa qai dua na ka vakurabui oqo, ni dou sa sega ni kila se sa lako mai vei ko koya, ia sa dolava na mataqu ko koya.

³¹ Eda sa kila sa sega ni rogoci ira na tamata i valavala ca na Kalou, ia kevaka sa daulotu vua na Kalou e dua na tamata, ka kitaka na nona lewa, sa rogoci koya oqo ko koya.

³² Sa sega ni rogo mai nai vakatekivu kei vuravura, ni sa dua sa dolava na matana e dua sa sucu mataboko.

³³ Kevaka sa sega ni lako mai vua na Kalou ko koya oqo, sa sega ni rawata e dua na ka.”

³⁴ Era sa vosa, ka kaya vua, “O iko la ko sa sucu sara e nai valavala ca, ia ko sa via vakatavulici keimami, oi?” A ra sa biuti koya ki tautuba.

Na Mataboko Vakayalo

³⁵ Sa rogoca ko Jisu ni ra sa biuti koya ki tautuba, ia ni sa kunei koya, sa kaya vua, “O sa vakabauta na Luve ni Kalou, ne?”

³⁶ Sa vosa ko koya, ka kaya, “O cei ko koya, Turaga, me'u vakabauti koya?”

³⁷ A sa kaya vua ko Jisu, “O sa raici koya oti, ia sai koya drau sa veivosaki kaya.”

³⁸ Sa qai kaya ko koya, “Noqu Turaga, au sa vakabauta,” ka sa cuva vua.

³⁹ A sa kaya ko Jisu, “Au sa lako mai ki vuravura oqo me'u lewa, me ra rai rawa ko ira sa sega ni rai rawa, ia me ra mataboko ko ira sa rai.”

⁴⁰ Ko ira na Farisi ka tiko kaya era sa rogoca na veika oqo, ka ra sa kaya vua, “Sa mataboko beka koi keitou talega?”

⁴¹ Sa kaya vei ira ko Jisu, “Kevaka dou sa mataboko, sa sega na nomudou cala. Ia oqo dou sa qai kaya, ‘Keitou sa rai,’ o koya sa tu ga kina na nomudou cala.