Joni 8 - Ai Vola Tabu (Vakadewa Makawa Vakavoutaki 2021)

Na Yalewa sa Kune ni sa Veibutakoci

¹ Ia sa lako ko Jisu ki na ulunivanua ni veiolive.

² Ia e na mataka caca sa lako tale mai ko koya ki na vale-ni-soro. A ra sa lako mai vei koya ko ira kecega na tamata, a sa tiko sobu ko koya, ka vakavulici ira.

³ Ia ko ira na vunivola kei ira na Farisi era sa kauta mai vei koya e dua na yalewa sa kune ni sa veibutakoci, a ra sa vakaturi koya e na kedra maliwa,

⁴ ka kaya vua, “Vakavuvuli, sa kune na yalewa oqo ni se ia tiko na veibutakoci.

⁵ A sa vosa vei keda ko Mosese e na vunau, me ra vakaviriki e na vatu ko ira sa vakaoqo. Ia ka cava ko sa kaya?”

⁶ Era sa vosa vakaoqo me ra veretaki koya kina, me ra beitaki koya rawa. Ia sa cuva sobu ko Jisu, ka vola na soso e na nona i qaqalo.

⁷ Ia ni ra sa tarogi koya tikoga, sa tucake ko koya, ka kaya vei ira, “O koya vei kemudou sa sega ni valavala ca, me viriki koya mada eliu e na vatu.”

⁸ Sa qai cuva sobu tale ko koya, ka volavola e na soso.

⁹ Ia ni ra sa rogoca, era sa lako yadua ki tuba, sa liu na qase ka muri kecega na tamata, ka tiko duaduaga ko Jisu, a sa tu na yalewa e matana.

¹⁰ Ia ni sa tucake ko Jisu, ka sega ni raica e dua, na yalewa duaduaga, sa kaya vua, “Yalewa, sa evei ko ira oqori? Sa sega e dua sa lewai iko mo cudruvi, ne?”

¹¹ A sa kaya ko koya, “Sa sega e dua, Turaga.” A sa kaya vua ko Jisu, “Au sa sega talega ni lewai iko mo cudruvi. Mo lako, ka mo kakua ni valavala ca tale.”

Ko Jisu na Rarama kei Vuravura

¹² Sa qai vosa tale vei ira ko Jisu, ka kaya, “Koi au na rarama kei vuravura. Ko koya sa muri au ena sega ni lako e na butobuto, ena tu ga vei koya na rarama ni bula.”

¹³ O ira na Farisi era sa qai kaya vua, “O sa tukuni iko; sa sega ni dina na nomu i tukutuku.”

¹⁴ Sa vosa ko Jisu, ka kaya vei ira, “Ia, kevaka ka'u sa tukuni au, sa dina na noqu i tukutuku, ni'u sa kila na vanua ka'u sa lako mai kina, ka lako yani kina, ia dou sa sega ni kila seu lako mai vei, seu lako kivei.

¹⁵ Dou sa lewa me vaka na ka sa rairai; au sa sega ni lewa e dua na tamata.

¹⁶ Ia kevaka ka'u sa lewa, sa dina na noqu lewa, ni'u sa sega ni tiko duaduaga, ia koi au kei Tamaqu, ko koya sa talai au mai.

¹⁷ Sa volai talega e na nomudou vunau, ni sa dina nai tukutuku ni tamata e lewe rua.

¹⁸ E dua koi au ka'u sa tukuni au, a sa tukuni au ko Tamaqu, ko koya sa talai au mai.”

¹⁹ Era sa qai kaya vua, “Evei ko Tamamu?” Sa kaya ko Jisu, “Dou sa sega ni kilai au se Tamaqu. Kevaka dou sa kilai au, dou sa kilai Tamaqu talega.”

²⁰ Sa cavuta na vosa oqo ko Jisu e na valeniyau, ni sa vakatavuvuli e na vale-ni-soro; a sa sega e dua sa tauri koya, ni sa sega ni yaco na nona gauna.

Dou na Sega ni Lako Rawa ki na Vanua Au sa Lako Tiko Kina

²¹ Sa qai kaya tale vei ira ko koya, “Au sa lako yani, ka dou na vakasaqarai au, ia dou na mate e na nomudou i valavala ca. Ia na vanua ka'u sa lako kina, dou sa sega ni lako rawa kina.”

²² Era sa qai kaya na Jiu, “Ena vakamatei koya beka vakai koya? Ni sa kaya, ‘Na vanua ka'u sa lako kina, dou sa sega ni lako rawa kina.’?”

²³ A sa kaya vei ira ko koya, “Dou sa lako mai ra, au sa lako mai cake. Dou sa vakavuravura, au sa sega ni vakavuravura.

²⁴ O koya oqo ka'u a kaya kina vei kemudou, dou na mate e na nomudou i valavala ca, ka kevaka dou sa sega ni vakadinata ni Sai Au, dou na mate e na nomudou i valavala ca.”

²⁵ Era sa qai kaya vua, “Ko cei ko iko?” A sa kaya vei ira ko Jisu, “Sai koya ga ka'u a tukuna vei kemudou mai nai vakatekivu.

²⁶ Sa vuqa na ka me'u vosataka ka lewai kemudou kina, ia sa dina ko koya sa talai au mai, ia ka'u sa tukuna vei ira na kai vuravura na veika ka'u a rogoca mai vei koya.”

²⁷ Era sega ni kila ni sa tukuna tiko na veika me baleta na Tamana vei ira ko koya.

²⁸ Sa qai kaya vei ira ko Jisu, “Ni dou sa laveta cake oti na Luve ni Tamata, dou na qai kila ni sai au, ni'u sa sega talega ni kitaka e dua na ka vakai au; ia na ka ga sa vakatavulici au kina ko Tamaqu, sai koya ka'u sa vosataka.

²⁹ Ia sa tiko vata kei au ko koya sa talai au mai. Sa sega ni biuti au ko Tamaqu me'u tiko duaduaga, ni'u sa kitaka tikoga na ka sa vinakata ko koya.”

³⁰ Ni sa cavuta tiko na vosa oqo ko koya, era sa lewe vuqa era sa vakabauti koya.

Na Ka Dina ena Sereki Kemudou

³¹ Sa qai kaya ko Jisu vei ira na Jiu era sa vakabauti koya, “Kevaka dou sa muria tikoga na noqu vosa, dou sa qai noqu tisaipeli dina,

³² ia dou na kila na ka dina, ia na ka dina ena sereki kemudou.”

³³ Era sa kaya vua, “Oi keimami na kawa i Eparaama, ka sega e dua keimami a bobula kina e na dua na gauna. Ko sa kaya vakacava, ‘Dou na sereki’?”

³⁴ Sa kaya vei ira ko Jisu, “E dina, e dina, au sa kaya vei kemudou, o koya yadua sai valavala ca sa bobula ki nai valavala ca.

³⁵ A sa sega ni tiko vakadua e vale na bobula; na luvena sa tiko vakadua.

³⁶ Ia kevaka ena sereki kemudou na Luvena dou na qai sereki dina kina.

³⁷ Au sa kila dou sa kawa i Eparaama; ia dou sa via vakamatei au, ni sa sega ni tiko e na lomamudou na noqu vosa.

³⁸ Au sa tukuna na ka ka'u a raica vei Tamaqu, ia dou sa kitaka na ka dou a rogoca mai vei koya na tamamudou.”

³⁹ Era sa vosa, ka kaya vua, “A tama i keimami ko Eparaama.” Sa kaya vei ira ko Jisu, “Kevaka dou sa luve i Eparaama, dou na kitaka nai valavala i Eparaama.

⁴⁰ Ia dou sa qai via vakamatei au, a tamata sa tukuna vei kemudou na ka dina, o koya ka'u a rogoca mai vua na Kalou; sa sega ni kitaka na ka vakaoqo ko Eparaama.

⁴¹ Dou sa kitaka na nona cakacaka na tamamudou.” Era sa qai kaya vua, “Keimami sa sega ni sucu e na dauyalewa. E dua bau na tama i keimami, na Kalou.”

⁴² Sa qai kaya vei ira ko Jisu, “Kevaka sa Tamamudou na Kalou, dou na lomani au, ni'u sa tubu mai vua na Kalou, ka lako mai kina. Au sa sega ni lako walega mai vakai au, ia sai koya sa talai au mai.

⁴³ A cava dou sa sega kina ni kila na noqu vosa? Ni dou sa sega ni vakabauta rawa na noqu vosa.

⁴⁴ A tamamudou na tevoro, ia dou sa via kitaka na gagadre ca ni tamamudou. Ko koya na dauveivakamatei mai nai vakatekivu, a sa sega ni vakabauta na ka dina, ni sa sega vei koya na ka dina. Ni sa vosa lasu ko koya, sa vosataka na ka sa tu vua, ni sa daulasulasu ko koya, ka sa vu ni ka oqo.

⁴⁵ Ia koi au, e na vuku ni'u sa tukuna vei kemudou na ka dina, dou sa sega ni vakadinati au.

⁴⁶ Ko cei vei kemudou sa vakadinadinataka ni'u sa cala? Ia kevaka ka'u sa vosa dina, dou sa sega ni vakadinati au e na vuku ni cava?

⁴⁷ O koya sa nona na Kalou sa rogoca na vosa ni Kalou. Oqo dou sa sega kina ni rogoca, ni dou sa sega ni nona na Kalou.”

Ko Jisu kei Eparaama

⁴⁸ Era sa qai vosa ko ira na Jiu, ka kaya vua, “Sa sega li ni keimami kaya dina, ni ko sa kai Samaria, ka sa curumi iko e dua na tevoro?”

⁴⁹ Sa kaya ko Jisu, “Sa sega ni curumi au e dua na tevoro, ia ka'u sa vakarokorokotaka na Tamaqu, ia dou sa vakalialiai au ga.

⁵⁰ Ia ka'u sa sega ni vakasaqara me'u vakarokorokotaki; sa dua sa vakasaqara ka lewa.

⁵¹ E dina, e dina, au sa kaya vei kemudou, kevaka e dua sa vakabauta tikoga na noqu vosa, ena sega sara ni mate.”

⁵² Era sa qai kaya vei koya ko ira na Jiu, “Keimami sa qai kila sa curumi iko e dua na tevoro. Sa mate ko Eparaama kei ira talega na parofita; ia ko sa kaya, ‘Kevaka e dua sa vakabauta tikoga na noqu vosa, ena sega sara ni mate.’

⁵³ Ko sa levu cake beka, ka lailai sobu ko Eparaama na tamada, ko koya sa mate? A ra sa mate talega ko ira na parofita! Ko sa qisi iko mei cei?”

⁵⁴ Sa kaya ko Jisu, “Kevaka ka'u sa vakarokorokotaki au, sa ka wale na noqu veivakarokorokotaki. Sai koya na Tamaqu sa vakarokorokotaki au, ko koya dou sa kaya ‘sa nomudou Kalou.’

⁵⁵ Ia dou sa sega ni kilai koya, ia ka'u sa kilai koya koi au. Ia kevaka ka'u sa kaya, au sa sega ni kilai koya, au na lasulasu ga me vakataki kemudou, ia ka'u sa kilai koya ga ka vakabauta tikoga na nona vosa.

⁵⁶ Sa gadreva vakalevu sara ko Eparaama na tamamudou me raica na noqu gauna. A sa raica, ka reki.”

⁵⁷ Era sa qai kaya vei koya ko ira na Jiu, “E se sega ni limasagavulu na nomu yabaki, ka ko sa raici Eparaama oti?”

⁵⁸ Sa kaya vei ira ko Jisu, “E dina, e dina, au sa kaya vei kemudou, ni se bera ni sucu ko Eparaama, au sa bula.”

⁵⁹ Era sa qai tomika eso na vatu me ra vakaviriki koya, ia sa vunitaki koya ko Jisu ka sa lako tani mai na vale-ni-soro.