Joni 6 - Ai Vola Tabu (Vakadewa Makawa Vakavoutaki 2021)

E Vakani Ira na Lima na Udolu ko Jisu

¹ Sa oti na veika oqo, sa qai lako ko Jisu ki tai kadua ni wasawasa mai Kalili, mai Taiperia.

² A sa lewe vuqa sara na tamata era sa muri koya, ni ra raica na veika-mana sa kitaka ko koya vei ira sa tauvi-mate.

³ A sa cabeta na ulunivanua ko Jisu, a sa tiko sobu mai kina kei ira na nona tisaipeli.

⁴ A sa voleka na solevu ni Lako-sivia era sa dauia na Jiu.

⁵ Ni sa qai ta cake ko Jisu, ka raica ni ra sa lewe vuqa sara sa lako mai vua, sa kaya vei Filipe, “Eda na volia mai vei na madrai, me ra kana kina ko ira oqo?”

⁶ Sa kaya na ka oqo me vakatovolei koya, ni sa kila ko koya na ka sa nakita me kitaka.

⁷ Sa kaya vua ko Filipe, “Ena sega ni rauti ira na madrai sa voli e na pene e rua na drau, me ra tauyadua vakalailai ga.”

⁸ E dua vei ira na nona tisaipeli, ko Adriu, a taci Saimoni Pita, sa kaya vei koya,

⁹ “Sa tiko eke e dua na gonetagane sa tu vua e lima nai buli madrai barile, ka rua na ika, ia ka yaga vakacava oqo vei ira na lewe vuqa vakaoqo?”

¹⁰ A sa kaya ko Jisu, “Vosa vei ira na tamata me ra tiko sobu.” Ia sa levu na co e na yasana ko ya. A ra sa tiko sobu na tamata, era sa lewe lima beka na udolu.

¹¹ A sa taura na veibuli madrai ko Jisu, ka vakavinavinaka, ka vota vei ira na tisaipeli, ia ko ira na tisaipeli, vei ira sa tiko sobu; ka vaka talega kina na ika me rauti ira.

¹² Ia ni ra sa mamau, sa kaya ko koya vei ira na nona tisaipeli, “Kumuna vata na tikina lalai sa vo, me kakua ni yali e dua na ka.”

¹³ Era sa qai tomika vata, ka vakasinaita nai su e tinikarua e na tikina lalai ni buli madrai barile e lima, sa vo vei ira sa kana.

¹⁴ Ia ko ira na tamata, ni ra sa raica na cakacaka-mana sa kitaka ko Jisu, era sa kaya, “Sai koya dina oqo na parofita ko ya e dodonu me lako mai ki vuravura.”

¹⁵ Ia ni sa kila ko Jisu era sa nakita me lako mai ka tauri koya vakaukauwa me ra bulia me tui, sa lako duadua tale yani ki na ulunivanua.

Sa Lako e Dela ni Wai ko Jisu

¹⁶ Ia ni sa qai yakavi mai, sa lako sobu ko ira na nona tisaipeli ki matasawa,

¹⁷ ka vodoka na waqa, ka lakova na wasawasa ki Kapenaumi. A sa qai butobuto mai na vanua, a sa sega ni yaco vei ira ko Jisu.

¹⁸ A sa vakabiau na wai e na vuku ni cagi levu sa liwa.

¹⁹ Ia ni ra sa voce yani e tolu na maile ka vakacaca, era sa raici Jisu ni sa lako voli e dela ni wai, ka torova na waqa, a ra sa rere.

²⁰ A sa kaya vei ira ko koya, “Koi au oqo; kakua ni rere.”

²¹ Era sa qai vinakata me vodo ki waqa ko koya, a sa qai udu vakasauri na waqa ki na vanua era sa lako kina.

Koi Au na Madrai ni Bula

²² E na mataka, ko ira na lewe vuqa era sa tu e na tai kadua ni wai, ni ra sa raica sa sega mai kea e dua tale na velovelo, ko ya ga ka vodoka ko ira na nona tisaipeli, a sa sega ni vodo vata ki na velovelo kei ira na nona tisaipeli ko Jisu, ia ko ira na nona tisaipeli era a soko yani vakai ira ga;

²³ (ia ka sa lako mai eso na velovelo mai Taiperia, sa voleka ki na yasana era a kana madrai kina, ni sa vakavinavinaka oti na Turaga.)

²⁴ Ni ra sa raica na lewe vuqa sa sega ni tiko mai kea ko Jisu, se ko iratou na nona tisaipeli, era sa vodo talega ki waqa, ka lako yani ki Kapenaumi, me vakasaqarai Jisu.

²⁵ Ia ni ra sa kunei koya mai tai kadua, era sa kaya vua, “Vakavuvuli, ko sa lako mai ki ke ninaica?”

²⁶ Sa vosa vei ira ko Jisu, ka kaya, “E dina, e dina, au sa kaya vei kemudou, dou sa sega ni vakasaqarai au ni dou sa raica na veika-mana, ni dou a kania ga na veibuli madrai, ka sa mamau kina.

²⁷ Dou kakua ni oca me kemudou na kakana sa oti rawa, ia me kemudou ga na kakana sa tu ki na bula tawa mudu, o koya ena solia vei kemudou na Luve ni Tamata. Ni sai koya sa vakadinadinataka na Kalou ko Tamana.”

²⁸ Era sa qai kaya vua, “A cava me keitou cakava, me keitou kitaka kina na cakacaka sa vinaka vua na Kalou?”

²⁹ Sa vosa ko Jisu, ka kaya vei ira, “Sai koya oqo na cakacaka sa vinaka vua na Kalou, mo dou vakabauti koya sa tala mai ko koya.”

³⁰ Era sa qai kaya vua, “A cava nai vakadinadina ko sa cakava, me keitou raica ka vakabauti iko? A cava ko sa kitaka?

³¹ A noda qase era a kania na mana e na loma ni vanua dravuisiga; me vaka sa volai, ‘Sa solia vei ira ko koya na madrai mai lomalagi me ra kania.’ ”

³² Sa qai kaya vei ira ko Jisu, “E dina, e dina, au sa kaya vei kemudou, sa sega ni ko Mosese ka solia vei kemudou na madrai ko ya mai lomalagi, ia ko Tamaqu ga sa solia vei kemudou na madrai dina mai lomalagi.

³³ Ni sai koya oqo na madrai mai vua na Kalou, ko koya sa lako sobu mai lomalagi, ka sa solia na bula vei ira na kai vuravura.”

³⁴ Era sa qai kaya vua, “Kemuni na Turaga, solia tikoga mai vei keimami na madrai oqo.”

³⁵ A sa kaya vei ira ko Jisu, “Koi au na madrai ni bula. Ko koya sa lako mai vei au ena sega ni viakana, ia ko koya sa vakabauti au ena sega ni viagunu tale.

³⁶ Ia ka'u a kaya vei kemudou ni dou sa raici au, ia dou sa sega ga ni vakabauta.

³⁷ Ko ira kecega sa solia mai vei au ko Tamaqu era na lako mai vei au, ia ko koya ena lako mai vei au, au na sega sara ni biuta tani.

³⁸ Ni'u sa sega ni lako sobu mai lomalagi me'u kitaka na lomaqu, me'u kitaka ga na loma i koya sa talai au mai.

³⁹ Ia sai koya oqo na loma i Koya sa talai au mai, me'u kakua ni vakayalia e dua vei ira sa solia mai vei au ko koya, ka me'u vakatura cake tale e na siga mai muri.

⁴⁰ Ia sai koya oqo na loma i Tamaqu, me ra rawata yadua na bula tawa mudu ko ira sa raica na Luvena, ka vakabauti koya; ia ka'u na vakaturi koya cake e na siga mai muri.”

⁴¹ Sa qai vosakudrukudrutaki koya ko ira na Jiu, ni sa kaya, “Oi au na madrai sa lako sobu mai lomalagi.”

⁴² A ra sa kaya, “Sa sega li ni ko Jisu ko koya oqo, a luve i Josefa, a tamana kei na tinana eda kila? Sa qai kaya vakacava mai ko koya, ‘Au sa lako sobu mai lomalagi’?”

⁴³ Sa vosa ko Jisu, ka kaya vei ira, “Dou kakua ni vosakudrukudru.

⁴⁴ E sega ni lako rawa mai vei au e dua na tamata, kevaka sa sega ni vakayarayarataki koya ko Tamaqu sa talai au mai. Ia ka'u na vakaturi koya cake e na siga mai muri.

⁴⁵ Sa vola na parofita eso, ‘Ena vakavulici ira kecega na Kalou.’ A ra sa lako mai kina vei au ko ira yadua era sa rogoci Tamaqu, ka sa vakavulici.

⁴⁶ Ia ka sega ni raici Tamaqu e dua na tamata; ko koya duaduaga sa lako mai vua na Kalou, sa raici Tamaqu ko koya.

⁴⁷ E dina, e dina, au sa kaya vei kemudou, o koya sa vakabauti au sa rawata na bula tawa mudu.

⁴⁸ Koi au na madrai ni bula.

⁴⁹ Sa kania na mana mai na loma ni vanua lala ko ira na nomudou qase, ka ra sa mate ga.

⁵⁰ Sai koya oqo na madrai, sa lako sobu mai lomalagi, me ra kania na tamata, ka sega ni mate.

⁵¹ Koi au na madrai bula sa lako sobu mai lomalagi. Kevaka sa dua e kania na madrai oqo, ena bula ka tawa mudu. Ia na madrai ka'u na solia sa lewequ, o koya ka'u na solia me bula kina ko ira na kai vuravura.”

⁵² Era sa qai veileti vakai ira na Jiu, ka kaya, “Sa solia rawa vakacava na tamata oqo na lewena me da kania?”

⁵³ Sa qai kaya vei ira ko Jisu, “E dina, e dina, au sa kaya vei kemudou, kevaka dou sa sega ni kania na lewe ni Luve ni Tamata, ka gunuva na nona dra, sa sega vei kemudou na bula.

⁵⁴ O koya sa kania na lewequ, ka gunuva na noqu dra, sa rawata na bula tawa mudu, ia ka'u na vakaturi koya cake e na siga mai muri.

⁵⁵ Ni sa kakana dina na lewequ, a sa ka-ni-gunu dina na noqu dra.

⁵⁶ O koya sa kania na lewequ, ka gunuva na noqu dra, sa tu vei au, koi au talega au sa tu vei koya.

⁵⁷ Me vaka sa bula tiko ko Tamaqu sa talai au mai, au sa bula talega e na vuku i Tamaqu; sa vaka talega kina ko koya sa kani au, ena bula e na vukuqu.

⁵⁸ Sai koya oqo na madrai sa lako sobu mai lomalagi, sa sega ni tautauvata kei na mana sa kania ko ira na nomudou qase, a ra sa mate ga. Ko koya sa kania na madrai oqo, ena bula ka tawa mudu.”

⁵⁹ Sa vosataka na veika oqo ko koya e na valenilotu, ni sa vakatavuvuli tiko mai Kapenaumi.

Na Vosa ni Bula Tawa Mudu

⁶⁰ Era lewe vuqa vei ira na nona tisaipeli ni ra rogoca era sa kaya, “A vosa dredre oqo; ko cei sa vakabauta rawa?”

⁶¹ Ni sa kila ko Jisu e na lomana, ni ra sa vosakudrukudru na nona tisaipeli e na ka oqo, sa kaya vei ira, “Sa vakatarabetaki kemudou na ka oqo, ne?

⁶² Ena vaka beka evei kevaka dou na raica na Luve ni Tamata ni sa lako cake ki na tikina ka tiko kina eliu?

⁶³ Na yalo sa solia na bula; na yago sa sega ni yaga. A vosa ka'u vosataka vei kemudou sa vakayalo ka sa vu-ni-bula.

⁶⁴ Ia ka so vei kemudou sa sega ni vakabauta.” (Ni sa kilai ira mai nai vakatekivu ko Jisu era sa sega ni vakabauti koya, kei koya ena soli koya yani.)

⁶⁵ A sa kaya, “O koya oqo ka'u a kaya kina vei kemudou, ni sa sega e dua na tamata sa lako rawa mai vei au kevaka sa sega ni solia vua ko Tamaqu.”

⁶⁶ A ka oqo era sa suka tani kina e le vuqa vei ira na nona tisaipeli, ka ra sa sega tale ni lako vata kaya.

⁶⁷ Sa qai kaya ko Jisu vei ira na lewe tinikarua, “Dou sa via lako tani talega koi kemudou?”

⁶⁸ Sa qai kaya vua ko Saimoni Pita, “Kemuni na Turaga, me keitou na lako tale vei cei? Sa tu ga vei kemuni na vosa ni bula tawa mudu,

⁶⁹ ka keitou sa vakabauta ka kila, ni sai kemuni na Karisito, na Luve ni Kalou bula.”

⁷⁰ Sa kaya vei ira ko Jisu, “Au a sega li ni digitaki kemudou na lewe tinikarua, ia ka sa dua vei kemudou sa nona i to na tevoro?”

⁷¹ Sa vosataki Jutasa Isikarioti, na luve i Saimoni, ni sai koya oqo ena soli koya yani, a sa dua vei ira na le tinikarua ko koya.