Joni 18 - Ai Vola Tabu (Vakadewa Makawa Vakavoutaki 2021)

Sa Bukiveretaki ka Vesu ko Jisu

¹ Ni sa vosataka oti na veika oqo ko Jisu, sa lako yani ko koya kei ira na nona tisaipeli ki tai kadua ni soniwai ko Kitironi, a sa dua kina na were, a sa curu kina ko koya, kei ira na nona tisaipeli.

² Ia ko Jutasa, ko koya sa soli koya yani, sa kila na tikina: ni sa lako wasoma kina ko Jisu kei ira na nona tisaipeli.

³ Ia ni sa rawata ko Jutasa na mata sotia kei na ovisa eso, mai vei ira na bete levu kei ira na Farisi, sa yaco kina, a ra sa kauta eso na tabucagi kei na cina kei nai yaragi ni valu.

⁴ Ia ni sa kila ko Jisu na ka kecega ena yaco vei koya, sa lako yani, ka kaya vei ira, “Dou sa vakasaqarai cei?”

⁵ Era sa kaya vua, “Ko Jisu na kai Nasareci.” Sa kaya vei ira ko Jisu, “Koi au.” A sa tu vata kei ira ko Jutasa, ko koya sa soli koya yani.

⁶ Ni sa qai kaya vei ira ko koya, “Koi au”, era sa suka vakanadaku ka bale sobu ki na qele.

⁷ Sa qai taroga tale ko koya, “Dou sa vakasaqarai cei?” A ra sa kaya, “Ko Jisu na kai Nasareci.”

⁸ Sa kaya ko Jisu, “Au sa tukuna oti vei kemudou ni sai au. Ia kevaka dou sa vakasaqarai au, laivi ira oqo me ra lako yani.”

⁹ Oqo me vakayacori kina na vosa sa tukuna ko koya: “Au sa sega ni vakayalia e dua vei ira ko a solia mai vei au.”

¹⁰ Sa qai ucuna ko Saimoni Pita nai seleiwau sa tu vua, ka yavita kina na tamata ni bete levu, ka taya laivi na daligana i matau. (Na yaca ni tamata ko Maliko.)

¹¹ Sa qai kaya vei Pita ko Jisu, “Daramaka na nomu i seleiwau ki na kena taga. A bilo sa solia mai vei au ko Tamaqu, ka'u na sega beka ni gunuva?”

Ko Jisu ena Mata i Anasa

¹² Ko ira na mataivalu, kei na kena turaga, kei ira na nodra ovisa na Jiu, era sa qai tauri Jisu, ka vesuki koya,

¹³ ka ra sa tubera mada eliu vei Anasa; ni sa vugoi Kaiafa, ko koya sa bete levu e na yabaki ko ya.

¹⁴ Ia ko Kaiafa oqo, sai koya ka vakavulici ira na Jiu, ni sa yaga me mate e dua na tamata e na vukudra na tamata.

Sa Cakitaki Jisu ko Pita

¹⁵ A rau sa muri Jisu, ko Saimoni Pita ka dua tale na tisaipeli. A sa kilai na tisaipeli ko ya vua na bete levu, a rau sa curu vata kei Jisu ki na vale ni bete levu.

¹⁶ A sa tu e tautuba ko Pita ka voleka ki na katuba. Sa qai curu yani na tisaipeli kadua, ko koya sa kilai vua na bete levu, a sa vosa vua na yalewa sa vakatawa na katuba, a sa vakacurumi Pita.

¹⁷ Sa qai kaya vei Pita na vada sa vakatawa na katuba, “Ko iko beka talega na tisaipeli ni tamata oqo?” Sa kaya ko koya, “Oi au e segai.”

¹⁸ A sa tu mai kina ko ira sa dauveiqaravi kei ira na ovisa, a ra sa vakawaqa na buka ni sa liliwa, a ra sa tatalai. A sa tu vata kei ira ko Pita, ka tatalai.

Vaqaqai Jisu na Bete Levu

¹⁹ Sa qai tarogi Jisu na bete levu e na vukudra na nona tisaipeli, e na nona i vakavuvuli talega.

²⁰ Sa kaya vua ko Jisu, “Au a vosa votu ki vuravura. Au a vakavuvuli tikoga e na veivalenilotu, kei na vale-ni-soro, era sa daulako kina ko ira kece na Jiu. Ia ka'u sa sega ni kaya vuni e dua na ka.

²¹ A cava ko sa tarogi au kina? Tarogi ira era sa daurogoca, se cava ka'u a kaya vei ira. Raica, era sa kila na ka ka'u a dau kaya.”

²² Ia ni sa vosa oti vakaoqo ko koya, e dua vei ira na ovisa sa tu voleka, sa sabici Jisu e na ligana, ka kaya, “Ko sa vosa vakacava vakaoqo vua na bete levu?”

²³ Sa kaya vua ko Jisu, “Kevaka ka'u sa vosa vakaca, vakatakila na kena ca. Ia kevaka e vinaka, ko sa sabici au e na vuku ni cava?”

²⁴ Ia ko Anasa sa talai koya, ni sa vesu tu, vei Kaiafa na bete levu.

Sa Cakitaki Jisu tale ko Pita

²⁵ Ia sa tu ko Saimoni Pita, ka tatalai. Era sa qai kaya vua, “Ko iko beka talega sa dua vei ira na nona tisaipeli?” Sa cakitaka ko koya, ka kaya, “Oi au e segai.”

²⁶ E dua vei ira na tamata ni bete levu, a weka i koya sa taya laivi na daligana ko Pita, sa kaya, “Au a sega beka ni raici kemudrau vata kaya e na were?”

²⁷ Sa qai cakitaka tale ko Pita, a sa tagi sara na toa.

Ko Jisu ena Mata i Pailato

²⁸ Era sa qai kauti Jisu tani mai vei Kaiafa ki na vale ni veilewai. A sa mataka caca. Ia ko ira era sa sega ni curu ki na vale ni veilewai, me ra kakua ni vakadukadukalitaki, ka me ra ia na kana vata ni Lako-sivia.

²⁹ Sa qai curu yani vei ira ko Pailato, ka kaya, “A cava na ka ca dou sa beitaka vua na tamata oqo?”

³⁰ Era sa vosa ka kaya vua, “Kevaka sa sega ni tamata ca ko koya oqo, keitou sa sega ni soli koya yani vei iko.”

³¹ Sa qai kaya vei ira ko Pailato, “Dou kauti koya, ka lewai koya me vaka na nomudou lawa.” O koya era sa kaya kina vua ko ira na Jiu, “E sega ni tara vei keimami me vakamatea e dua na tamata.”

³² (Oqo me vakayacori kina na vosa ka tukuna ko Jisu, ni sa vakatakila nai valavala ni mate ena mate kina.)

³³ Sa qai curu tale ki na vale ni veilewai ko Pailato, ka kacivi Jisu, ka kaya vua, “O iko na nodra Tui na Jiu, se segai?”

³⁴ Sa kaya vua ko Jisu, “Ko sa vosataka li na ka oqo vakataki iko, se sa tukuni au vakaoqo vei iko ko ira na tani?”

³⁵ Sa kaya ko Pailato, “Oi au beka na Jiu? Ko ira na kai nomu kei ira na bete levu, era sa soli iko mai vei au. A cava ko a cakava?”

³⁶ Sa kaya ko Jisu, “Sa sega ni vakavuravura na noqu matanitu. Kevaka sa vakavuravura na noqu matanitu, era na qai vala na noqu tamata, me'u kakua ni soli yani vei ira na Jiu. Ia oqo, sa sega ni vu eke na noqu matanitu.”

³⁷ Sa qai kaya vua ko Pailato, “Ko iko bagi na tui?” Sa kaya ko Jisu, “Ko sa kaya ni'u sa tui. A ka oqo ka'u sa sucu mai kina, ia na ka oqo ka'u sa lako mai kina ki vuravura oqo, me'u dautukuna na ka dina. O koya yadua sa vakabauta na ka dina, sa rogoca na noqu vosa.”

³⁸ Sa kaya vua ko Pailato, “A cava na ka dina?” Ia ni sa vosa oti vakaoqo, sa curu tale yani vei ira na Jiu, ka kaya vei ira, “Au sa sega ni kunea vua e dua nai valavala ca.

Sa Tauci na Lewa me Mate ko Jisu

³⁹ Ia sa dua na nomudou i valavala, me'u sereka e dua vei kemudou e na solevu ni Lako-sivia. Dou sa vinakata kina, se segai, me'u sereka vei kemudou na nodra Tui na Jiu?”

⁴⁰ Era sa qai qoqolou tale, ka kaya, “Me kakua ga na tamata oqo, ko Parapa ga!” Ia sa tamata daubutako ko Parapa.