Joni 16 - Ai Vola Tabu (Vakadewa Makawa Vakavoutaki 2021)

¹ “Au sa vosataka na veika oqo vei kemudou, mo dou kakua ni vakatarabetaki.

² Era na vakatabui kemudou mai na veivalenilotu. Ia ena yaco mai na gauna, era na nanuma kina ko ira yadua sa vakamatei kemudou ni ra sa qarava kina na Kalou.

³ Ia na veika oqo era na kitaka vei kemudou, ni ra sa sega ni kilai Tamaqu se koi au.

⁴ Ia na veika oqo ka'u sa tukuna vei kemudou, ka ni sa yaco mai na gauna, dou na nanuma kina ni'u a tukuna vei kemudou. “Au a sega ni tukuna eliu vei kemudou na veika oqo, e na vuku ni'u a tiko vata kei kemudou.

Na Cakacaka ni Yalo Tabu

⁵ Ia oqo ka'u sa qai lako yani vei koya sa talai au mai, ka sa sega mada ni tarogi au e dua vei kemudou, ‘O sa lako kivei?’

⁶ Ia ni'u sa tukuna vei kemudou na veika oqo, sa luvuci e na rarawa na lomamudou.

⁷ Ia ka'u sa tukuna ga vei kemudou na ka dina: e yaga vei kemudou me'u lako yani, ni na sega ni lako mai vei kemudou na Dauveivakacegui, kevaka ka'u sa sega ni lako yani. Ia kevaka ka'u sa lako yani, ka'u na talai koya kivei kemudou.

⁸ Ia ni sa lako mai ko koya, ena vakatakila kivei ira na kai vuravura nai valavala ca, kei na ka dodonu kei na lewa:

⁹ me baleta nai valavala ca, ni ra sa sega ni vakabauti au;

¹⁰ me baleta na ka dodonu, ni'u sa lako vei Tamaqu, ka dou na sega ni raici au tale;

¹¹ me baleta na tau ni lewa, ni sa lewai na turaga ni vuravura oqo.

¹² “Sa vuqa na ka sa vo me'u tukuna vei kemudou, ia dou sa sega ni colata rawa edaidai.

¹³ Ia ni sa lako mai ko koya, na Yalo Tabu na vu ni ka dina, ena tuberi kemudou ki na ka kecega e dina; ni na sega ni vosa vakataki koya, ia na ka kecega ena rogoca, ena vosataka, ka na vakatakila vei kemudou na veika ena yaco mai muri.

¹⁴ Ena vakarokorokotaki au ko koya, ni na kauta na veika e noqu ka vakatakila vei kemudou.

¹⁵ Sa noqu na veika kecega sa nei Tamaqu. A ka oqo ka'u a kaya kina, ni na kauta ko koya na veika sa noqu, ka vakatakila vei kemudou.

Na Rarawa ena Vuki me Reki

¹⁶ “Sa vo vakalailai, dou na qai sega ni raici au; ka vo tale vakalailai, dou na qai raici au; ka ni'u sa lako vei Tamaqu.”

¹⁷ Ka so vei ira na nona tisaipeli era kaya kina vakai ira, “A cava na ka oqo sa kaya vei keda ko koya, ‘Sa vo vakalailai ga, dou na qai sega ni raici au, ka vo tale vakalailai, dou na qai raici au’; ka, ‘Ni'u sa lako vei Tamaqu’?”

¹⁸ A ka oqo era sa kaya kina, “A cava na ka oqo sa kaya ko koya, ‘Sa vo vakalailai’? Eda sa sega ni kila na ka sa kaya ko koya.”

¹⁹ A sa kila ko Jisu ni ra sa via tarogi koya, sa qai kaya vei ira, “Dou sa veitarogi li e na ka ka'u a kaya, ‘Sa vo vakalailai, dou na qai sega ni raici au, ka vo tale vakalailai, dou na qai raici au’?

²⁰ E dina, e dina, au sa kaya vei kemudou, dou na tagi ka tagiyaso, ia ko vuravura ena reki. Ena rarawa na lomamudou, ia na rarawa ni lomamudou ena vuki me reki.

²¹ Ni sa taratara na yalewa sa rarawa, e na vuku ni sa yaco na nona siga, ia ni sa sucu na gone, sa sega ni nanuma tale na rarawa, e na vuku ni marau ni sa sucu mai e dua na tamata ki vuravura.

²² Sa qai rarawa oqo na lomamudou, ia ka'u na raici kemudou tale, ena qai reki na lomamudou, ka na sega e dua ena kovea na nomudou marau.

²³ Ia e na siga ko ya dou na sega ni tarogi au e na dua na ka. E dina, e dina, au sa kaya vei kemudou, a ka kecega dou na kerea vei Tamaqu e na yacaqu, ena solia vei kemudou ko koya.

²⁴ Dou a sega ni kerea eliu e dua na ka e na yacaqu. Dou kerekere, dou na qai rawata, me levu sara na nomudou marau.

Au sa Vakamalumalumutaki Vuravura

²⁵ “Au a tukuna vei kemudou na veika oqo e na vosa vakatautauvata. Ia sa na lako mai na gauna ka'u na sega tale ni vosa vei kemudou e na vosa vakatautauvata, ka'u na vakatakila vakamacala vei kemudou na veika nei Tamaqu.

²⁶ E na siga ko ya dou na kerekere e na yacaqu, ia sa sega ni yaga me'u tukuna vei kemudou, ni'u na masuti Tamaqu e na vukumudou;

²⁷ ni sa lomani kemudou na Tamaqu, ni dou sa lomani au, ka vakadinata ni'u sa lako mai vua na Tamaqu.

²⁸ Au sa lako mai vei Tamaqu, ka lako mai ki vuravura; au sa biuti vuravura tale, ka lako vei Tamaqu.”

²⁹ Sa kaya vua ko ira na nona tisaipeli, “Raica, ko sa qai vosa vakamacala, ka sega ni vosataka na vosa vakatautauvata.

³⁰ Keitou sa qai kila ko sa kila na ka kecega, ka sega ni yaga vua e dua na tamata me tarogi iko; na ka oqo keitou sa vakadinata kina ni ko sa lako mai vua na Kalou.”

³¹ Sa kaya vei ira ko Jisu, “Dou sa qai vakabauta, ne?

³² Raica, sa lako mai na gauna, io, sa qai yaco mai, dou na dui veiseyaki kina, a tamata yadua ki nona vale, ka dou na laivi au me'u tiko duaduaga. Ia ka'u sa sega ni tiko duaduaga ni keirau sa tiko vata kei Tamaqu.

³³ A veika oqo ka'u sa tukuna vei kemudou, mo dou rawata na vakacegu e na vukuqu. Dou na kunea e vuravura na rarawa; ia mo dou vakacegu; au sa vakamalumalumutaki vuravura.”