Joni 13 - Ai Vola Tabu (Vakadewa Makawa Vakavoutaki 2021)

Sa Vuya na Yavadratou na Nona Tisaipeli ko Jisu

¹ Ia ni se bera na solevu ni Lako-sivia, ka sa kila ko Jisu sa yaco mai na nona gauna me lako tani yani e vuravura oqo vua na Tamana, ka ni sa lomani ira na nona era sa tiko e vuravura, sa lomani ira ki nai vakataotioti.

² Ia ni ra sa vakayakavi tiko, ni sa vakatubura oti na tevoro e na loma i Jutasa Isikarioti, na luve i Saimoni, me soli koya yani.

³ A sa kila ko Jisu ni sa solia ko Tamana na ka kecega ki na ligana, ka ni sa lako mai vua na Kalou ko koya, a sa lako tale yani vua na Kalou,

⁴ sa tucake mai nai vakayakavi, ka luvata na nona i sulu, ka kauta mai e dua nai solo, ka vauca ki tolona.

⁵ Ni sa oti oqo sa livia na wai ki na dari, ka vakatekivu me vuya na yavadra na tisaipeli, ka solota e nai solo sa vau ki tolona.

⁶ Sa qai lako mai ko koya vei Saimoni Pita, ka sa kaya vua ko koya, “Noqu Turaga, ko ni na vuya li na yavaqu?”

⁷ Sa vosa ko Jisu, ka kaya vua, “A ka ka'u sa kitaka ko sa sega ni kila edaidai, ia mai muri ga ko na qai kila.”

⁸ Sa kaya vua ko Pita, “Kemuni na sega sara ni vuya na yavaqu.” Sa kaya vua ko Jisu, “Kevaka ka'u sa sega ni vui iko, ko sa sega ni rawata e dua na ka vei au.”

⁹ Sa kaya vua ko Saimoni Pita, “Noqu Turaga, me segai walega na yavaqu, a ligaqu talega kei na uluqu.”

¹⁰ Sa kaya vua ko Jisu, “Ko koya sa sili oti, sa yaga vua me vuya na yavana ga, a sa savasava taucoko. Ka dou sa savasava, ia sa segai ni kemudou kece.”

¹¹ Ni sa kilai koya ena soli koya yani, a ka oqo sa kaya kina ko koya, “Dou sa sega ni savasava kece.”

¹² Ni sa qai vuya oti na yavadra, ka sulumaka tale na nona i sulu, sa tiko sobu tale, ka kaya vei ira, “Dou sa kila na ka ka'u sa kitaka vei kemudou, se segai?

¹³ Dou sa vakatokai au me'u Vakavuvuli ka Turaga talega—ka dou sa dina sara, ni'u sa vakakina.

¹⁴ Ia kevaka ka'u sa vuya na yavamudou, koi au na nomudou Turaga kei nai Vakavuvuli, sa dodonu talega mo dou veivui yava vakai kemudou.

¹⁵ Ni'u sa solia e dua nai vakarau vei kemudou, mo dou kitaka vakakina me vaka ka'u sa kitaka oti vei kemudou.

¹⁶ E dina, e dina, au sa kaya vei kemudou, sa sega ni levu na tamata dauveiqaravi ka lailai na nona turaga; se levu ko koya sa talai ka lailai ko koya sa talai koya.

¹⁷ Kevaka dou sa kila na veika oqo, dou sa kalougata kevaka dou sa kitaka.

¹⁸ Au sa sega ni vosa me baleti kemudou kecega; au sa kilai ira ka'u sa digitaka. Ia me vakayacori kina nai Vola Tabu, ‘O koya keirau sa kana madrai vata kaya, sa leqeti au e nai bukubuku-ni-yavana.’

¹⁹ Au sa qai tukuna vei kemudou ni se bera ni yaco mai, mo dou vakabauta ni sai au, ni sa yaco mai.

²⁰ E dina, e dina, au sa kaya vei kemudou, o koya sa vakacegui ira yadua ka'u sa tala, sa vakacegui au; ia ko koya sa vakacegui au, sa vakacegui koya sa talai au mai.”

Sa Tukuna Rawa ko Jisu na Nona Bukiveretaki

²¹ Ni sa vosa oti vakaoqo ko Jisu, sa rarawa na lomana, ka sa vakatakila, ka kaya, “E dina, e dina, au sa kaya vei kemudou, e dua vei kemudou ena soli au yani.”

²² Era sa qai veiraici na tisaipeli, ni ra sa lecava se sa tukuni cei ko koya.

²³ A sa vakararavi e na lomasere i Jisu e dua vei ira na nona tisaipeli—ko koya sa lomana ko Jisu,

²⁴ ka sa deguvacu yani vua ko Saimoni Pita me tarogi Jisu se ko cei sa tukuna tiko ko koya.

²⁵ Ia ko koya sa vakararavi e na lomasere i Jisu, sa kaya vua, “Kemuni na Turaga, ko cei beka ko ya?”

²⁶ Sa kaya ko Jisu, “Sai koya ga ka'u na solia vua na tiki ni madrai oqo ni'u sa tonia.” Ia ni sa tonia oti na tiki ni madrai, sa solia vei Jutasa Isikarioti, na luve i Saimoni.

²⁷ Ia ni sa taura oti na tiki ni madrai, sa qai curumi koya ko Setani. Sa qai kaya vua ko Jisu, “Na ka ko via cakava, mo cakava vakatotolo sara.”

²⁸ Sa sega ni kila e dua vei ira sa tiko me kana, se cava sa vosa kina vakaoqo vua ko koya.

²⁹ Era nanuma eso, me vaka ni sa dautaura tiko na taga i lavo ko Jutasa, ni sa kaya vua ko Jisu, “Volia na veika ena yaga vei keda e na kana vata”; se me solia na ka eso vei ira era dravudravua.

³⁰ O koya oqo, ni sa qai taura oti na tiki ni madrai ko koya, sa lako vakusakusa sara ki tautuba. A sa bogi.

Nai Vakaro Vou

³¹ Ni sa curu oti ki tuba ko koya, sa kaya ko Jisu, “Sa qai vakarokorokotaki oqo na Luve ni Tamata, ka sa vakarokorokotaki na Kalou e na vukuna.

³² Kevaka sa vakarokorokotaki na Kalou e na vukuna, e na vakarokorokotaki koya talega na Kalou e na vukuna vakai koya ga, ka na vakarokorokotaki koya sara.

³³ Na luvequ lomani, au na tiko vakalailai ga kei kemudou. Dou na vakasaqarai au, ia me vaka ka'u a kaya vei ira na Jiu, ka'u sa kaya vaka talega kina vei kemudou, ‘Dou sa sega ni lako rawa ki na vanua ka'u sa lako yani kina.’

³⁴ E dua na vunau vou ka'u sa solia vei kemudou, mo dou veilomani, me vaka ka'u sa lomani kemudou, mo dou veilomani talega vakakina.

³⁵ A ka oqo era na kila kina na tamata kecega ni dou sa noqu tisaipeli, kevaka dou sa veilomani.”

Sa Tukuna Rawa ko Jisu na Veicakitaki i Pita

³⁶ Sa kaya vua ko Saimoni Pita, “Kemuni na Turaga, ko ni sa lako kivei?” Sa kaya vua ko Jisu, “A vanua ka'u sa lako kina, ko sa sega ni muri au rawa kina edaidai; ia mai muri ga, ko na muri au.”

³⁷ Sa kaya vua ko Pita, “Kemuni na Turaga, au sa sega ni muri kemuni rawa edaidai e na vuku ni cava? Au na solia na noqu bula e na vukumuni.”

³⁸ Sa kaya vua ko Jisu, “O na solia li na nomu bula e na vukuqu? E dina, e dina, au sa kaya vei iko, ni se bera ni tagi na toa, ko na cakitaki au vakatolu.