Joni 12 - Ai Vola Tabu (Vakadewa Makawa Vakavoutaki 2021)

Lumuti ko Jisu Mai Pecani

¹ Sa vo e ono na bogi me qai ia na solevu ni Lako-sivia, sa qai lako mai ko Jisu ki Pecani, sa tiko kina ko Lasarusa, ka mate eliu ko koya ka vakatura cake tale mai na mate ko koya.

² A ra sa cakava kina na kenai vakayakavi. A sa qarava ko Marica, a sa dua vei ira sa kana vata kaya ko Lasarusa.

³ Sa qai kauta mai ko Meri e dua na paudi waiwai talei sara, a narita dina, ka lumuta na yava i Jisu, ka solota na yavana e na drau ni uluna. Sa vakasinaiti na vale e nai boi ni waiwai.

⁴ Sa qai kaya e dua vei ira na nona tisaipeli, ko Jutasa Isikarioti, ko koya ena soli koya yani,

⁵ “Ena cava sa sega ni volitaki na waiwai oqo e na pene e tolu na drau, ka soli vei ira na dravudravua?”

⁶ Sa sega ni nona nanumi ira na dravudravua, sa vosa kina vakaoqo ko koya, e na vuku ga ni sa daubutako, ka taura na taga i lavo, a sa kauta na ka sa biu kina.

⁷ Sa qai kaya ko Jisu, “Laivi koya ga, sa maroroya na ka oqo ko koya ki na siga ka'u na bulu kina.

⁸ Era sa tiko vakadua kei kemudou ko ira na dravudravua, ia koi au, ka'u sa sega ni tiko vakadua kei kemudou.”

Na Bukiveretaki i Lasarusa

⁹ Ia sa lewe vuqa sara vei ira na Jiu, ni ra sa kila sa tiko mai kina ko koya, era sa lako mai, sa segai e na vuku i Jisu ga, ka me ra raici Lasarusa talega, ko koya ka vakatura cake tale mai na mate ko koya.

¹⁰ Ia ko ira na bete levu era sa bose vata me ra vakamatei Lasarusa talega,

¹¹ ni ra sa lewe vuqa na Jiu sa lako yani e na vukuna, ka vakabauti Jisu.

Na Curu Vakatui ki Jerusalemi

¹² E na mataka e lewe vuqa sara era sa lako mai ki na kana vata, ni ra sa rogoca sa lako mai ki Jerusalemi ko Jisu.

¹³ Era sa kauta na drau ni niu-sawa, a ra sa lako yani me veitavaki kaya, ka kacivaka, “Osana! Sa kalougata ko koya sa lako mai e na yaca ni Turaga— na nodra Tui na Isireli!”

¹⁴ Ia ko Jisu, ni sa kunea e dua na luve ni asa, sa vodoka, me vaka sa volai,

¹⁵ “Oi kemuni sa toka mai Saioni, kakua ni rere. Raica, sa lako mai na nomuni Tui, ka sa vodo tiko e na dua na luve ni asa!”

¹⁶ Ia na veika oqo era sa sega mada ni kila ko ira na nona tisaipeli, ia ni sa vakarokorokotaki oti ko Jisu, era sa qai nanuma ni sa volai ko koya e na veika oqo, a ra sa kitaka vua na veika oqo.

¹⁷ Ko ira na lewe vuqa era sa tiko kaya ni sa kacivi Lasarusa mai nai bulubulu, ka vakaturi koya cake tale mai na mate, era sa tukuna.

¹⁸ E na vuku ni ka oqo sa veitavaki kaya talega na lewe vuqa, ni ra sa rogoca sa cakava na ka-mana oqo ko koya.

¹⁹ O ira na Farisi era sa qai kaya vakai ira, “Dou sa kila beka ni dou sa sega ni rawata e dua na ka? Raica, sa muri koya na kai vuravura kecega.”

Era Vakasaqarai Jisu Eso na Kai Kirisi

²⁰ Ia sa so mai na veimatanitu tani, era sa lako cake mai ki na solevu me ra sokalou.

²¹ Ko ira oqo era sa lako mai vei Filipe, a kai Pecisaita e Kalili, ka tarogi koya, ka kaya, Keitou via raici Jisu, saka.

²² Sa lako ko Filipe ka tukuna vei Adriu; ia koi rau ko Adriu kei Filipe, erau sa tukuna vei Jisu.

²³ A sa vosa vei rau ko Jisu, ka kaya, “Sa qai yaco mai na gauna me vakarokorokotaki kina na Luve ni Tamata.

²⁴ E dina, e dina, au sa kaya vei kemudou, kevaka ena sega ni mate na vua ni sila ni sa lutu ki na qele, sa tiko duaduaga; ia kevaka sa mate, sa vua vakalevu.

²⁵ O koya sa lomana na nona bula, ena vakayalia, ia ko koya sa cata na nona bula e vuravura oqo, ena maroroya ki na bula tawa mudu.

²⁶ Kevaka sa qaravi au e dua, me muri au ga, ia na vanua ka'u sa tiko kina, ena tiko talega kina ko koya sa qaravi au. Ia kevaka sa qaravi au e dua, ena vakarokorokotaki koya ko Tamaqu.

Sa Tukuna Tiko na Nona Mate ko Jisu

²⁷ “Sa qai rarawa na lomaqu. Ia ka cava me'u kaya? — ‘I Tamaqu, ni vakabulai au mai na aua oqo’? Ia e nai naki oqo ka'u sa lako mai kina ki na aua oqo.

²⁸ I Tamaqu, ni vakarokorokotaka na yacamuni.” Sa qai voqa mai e dua na domo mai lomalagi, “Au sa vakarokorokotaka, ka'u na vakarokorokotaka tale.”

²⁹ Ko ira na lewe vuqa ka tiko ka rogoca, era sa kaya sa kurukuru. Sa kaya eso tale, “Sa dua na agilosi sa vosa vei koya.”

³⁰ Sa vosa ko Jisu, ka kaya, “Sa sega ni lako mai na vosa oqo e na vukuqu, e na vukumudou ga.

³¹ Oqo na gauna me lewai kina ko vuravura; oqo na gauna me biu kina ki tautuba na tui ni vuravura oqo.

³² Ia koi au, ni'u sa laveti cake mai vuravura, ka'u na vakayarayarataki ira na tamata kecega kivei au.”

³³ A sa vosataka na ka oqo ko koya me vakatakila na mataqali mate ena mate kina ko koya.

³⁴ Sa kaya vua na lewe vuqa, “Keimami a rogoca mai na vunau ni sa tiko vakadua na Karisito. Ia ko sa kaya vakacava, Ena laveti cake na Luve ni Tamata? Ko cei na Luve ni Tamata oqo?”

³⁵ Sa qai kaya vei ira ko Jisu, “Sa tiko vakalailai ga vei kemudou na rarama. Dou lako ni sa tu vei kemudou na rarama, de yacovi kemudou na butobuto. Ia ko koya sa lako e na butobuto, sa sega ni kila se sa lako kivei.

³⁶ Ni sa tu vei kemudou na rarama, dou vakabauta na rarama, mo dou yaco me luve ni rarama.” Sa vosataka na veika oqo ko Jisu, ka qai lako yani, ka vunitaki koya vei ira.

Na Nodra Tawa Vakabauta na Tamata

³⁷ Ia e dina ga sa cakava ko koya e matadra e vuqa na cakacaka mana, a ra sa sega ga ni vakabauti koya,

³⁸ me vakayacori kina na ka sa kaya ko Aisea na parofita, ka vaka, “I Jiova, ko cei sa vakabauta na neitou i tukutuku? A sa vakatakilai vei cei na liga i Jiova?”

³⁹ A ka oqo era sa sega kina ni vakabauta rawa, ni sa kaya talega ko Aisea,

⁴⁰ “Sa vakamatabokotaka na matadra ka vakaukauwataka na lomadra ko koya, me kakua ni rai na matadra, ka kila na lomadra, ka saumaki mai— ka me'u vakabulai ira.”

⁴¹ Sa vosataka na veika oqo ko Aisea, ni sa raica na nona i serau, ka tukuni koya.

⁴² Ia sa lewe vuqa vei ira talega na turaga era sa vakabauti koya, ia, e na vukudra na Farisi, era sa sega ni tukuna, de ra sa vakatatabui mai na valenilotu;

⁴³ ni ra sa vinakata vakalevu me vakarokorokotaki ira ko ira na tamata, ka vakalailai ga me vakarokorokotaki ira na Kalou.

Na Veilewai mai na Vosa i Jisu

⁴⁴ Sa qai kaci ko Jisu, ka kaya, “O koya sa vakabauti au, sa sega ni vakabauti au ga, sa vakabauti koya talega sa talai au mai.

⁴⁵ Ia ko koya sa raici au, sa raici koya sa talai au mai.

⁴⁶ Au sa lako mai ki vuravura me'u kena rarama, me kakua ni tiko e na butobuto ko koya yadua sa vakabauti au.

⁴⁷ Ia kevaka e dua sa rogoca na noqu vosa, ka sega ni vakabauta, au sa sega ni lewai koya; ni'u sa sega ni lako mai me'u lewai ira na kai vuravura, me'u vakabulai ira ga na kai vuravura.

⁴⁸ Sa dua sa lewai koya sa biuti au, ka sega ni vakabauta na noqu vosa, a vosa ka'u sa vosataka, sai koya oqo ena lewai koya e na siga mai muri.

⁴⁹ Ni'u sa sega ni vosa vakataki au, ia ko Tamaqu sa talai au mai, sa vakarota vei au na ka me'u kaya, kei na ka me'u tukuna.

⁵⁰ Ia ka'u sa kila sa vu ni bula tawa mudu na nona i vakaro. O koya ga, e na ka kecega ka'u sa vosataka, au sa vosa me vaka na ka sa kaya vei au ko Tamaqu.”