Joni 11 - Ai Vola Tabu (Vakadewa Makawa Vakavoutaki 2021)

Na Mate i Lasarusa

¹ Ia sa dua na tamata sa tauvi-mate, ko Lasarusa, na kai Pecani, a nodrau koro ko Meri kei Marica na tuakana.

² Ia ko Meri oqo sa lumuta na Turaga e na waiwai, ka solota na yavana e na drau ni uluna, a sa tauvi-mate na ganena ko Lasarusa.

³ Oqo sa talaki kina vei koya koi rau na ganena, ka kaya, “Kemuni na Turaga, raica, ko koya ko sa lomana sa tauvi-mate.”

⁴ Ia ni sa rogoca ko Jisu, sa kaya, “Ena sega ni ciba e na mate oqo ko koya, ia ena vakarokorokotaki kina na Kalou, ena vakarokorokotaki talega kina na Luve ni Kalou.”

⁵ A sa daulomani Marica ko Jisu, kei tacina, kei Lasarusa.

⁶ Ni sa qai rogoca ko koya ni sa tauvi-mate, sa tiko bogi rua tale e na tikina ko ya.

⁷ Sa oti oqo sa qai kaya vei ira na tisaipeli, “Me da lako tale ki Jutia.”

⁸ Sa kaya vua ko ira na tisaipeli, “Vakavuvuli, era a via vakaviriki iko edaidai walega e na vatu ko ira na Jiu; ia ko sa baci lako tale ki na tikina ko ya?”

⁹ Sa kaya ko Jisu, “Sa sega li ni tinikarua na aua e na dua na siga? Kevaka sa lako e dua e na siga, sa sega ni tarabe ko koya, ni sa raica na rarama kei vuravura oqo.

¹⁰ Ia kevaka sa lako e dua e na bogi, sa tarabe ko koya ni sa sega ni tu vua na rarama.”

¹¹ Sa vosataka na ka oqo ko koya, ia ka oti sa qai kaya vei ira, “Sa moce na wekada ko Lasarusa; ia ka'u sa lako me'u vakayadrati koya.”

¹² Sa qai kaya ko ira na nona tisaipeli, “Kemuni na Turaga, kevaka sa moce ga ko koya, ena bula.”

¹³ Ia sa vosataka na nona mate ko Jisu, ka ra sa nanuma sa vosataka ko koya na vakacegu ni moce.

¹⁴ Sa qai tukuna vakamacala vei ira ko Jisu, “Sa mate ko Lasarusa.

¹⁵ Ia ka'u sa reki e na vukumudou ni'u a sega ni tiko kina, mo dou vakabauta. Ia me da lako ga vua.”

¹⁶ Sa qai kaya ko Tomasi, o koya sa vakatokai ko Titimo, vei ira na nona i caba na tisaipeli, “Me da lako talega, me da mate vata kaya.”

Ko Jisu na Tucake Tale kei na Bula

¹⁷ Ni sa lako mai ko Jisu, sa qai kila ni sa koto bogi va ko koya e nai bulubulu.

¹⁸ A sa voleka ki Jerusalemi ko Pecani, a kena yawa e rua beka na maile.

¹⁹ Ia sa lewe vuqa na Jiu era a lako mai kivei Marica kei Meri, me ra vakacegui rau e na vuku ni ganedrau.

²⁰ Ni sa qai rogoca ko Marica sa lako mai ko Jisu, sa laki tavaki koya, ia sa tiko ga e vale ko Meri.

²¹ Sa qai kaya vei Jisu ko Marica, “Kemuni na Turaga, kevaka ko ni a tiko eke, sa sega ni ciba na ganequ.

²² Ia ka'u sa kila ena solia vei kemuni edaidai na Kalou na ka kecega ko ni sa kerea vua na Kalou.”

²³ Sa kaya vua ko Jisu, “Ena tucake tale na ganemu.”

²⁴ Sa kaya vua ko Marica, “Au sa kila ena tucake tale ko koya e na siga mai muri era na tucake tale kina na mate.”

²⁵ Sa kaya vua ko Jisu, “Oi au na vu ni tucake-tale kei na vu-ni-bula. Ko koya sa vakabauti au, kevaka sa mate, ena bula ga,

²⁶ ia ko koya yadua sa bula ka vakabauti au, ena sega sara ni mate. Ko sa vakadinata na ka oqo, se segai?”

²⁷ Sa kaya vua ko koya, “Io, na Turaga, au sa vakadinata ni sa Karisito koi kemuni, na Luve ni Kalou, ko koya sa dodonu me lako mai ki vuravura.”

Sa Tagi ko Jisu

²⁸ Ia ni sa vosa vakaoqo ko koya, sa lako yani, ka kaciva lo na tacina ko Meri, ka kaya, “Sa lako mai nai Vakavuvuli, a sa tarogi iko.”

²⁹ Ni sa qai rogoca ko koya, sa cavu tu sara, ka lako yani vua.

³⁰ (A se bera ni curu ki na koro ko Jisu, sa tiko ga e na vanua erau sa veitata kina kei Marica.)

³¹ Ko ira na Jiu era sa tiko vata kei Meri e vale ka vakacegui koya voli, ni ra sa raica sa tucake sara ko koya ka lako yani, era sa qai muri koya, ni ra nanuma, Sa lako ki nai bulubulu ko koya me tagi mai kea.

³² Ni sa qai yaco ko Meri ki na vanua sa tiko kina ko Jisu, ka raici koya, sa cuva sobu ki na yavana, ka kaya vua, “Kemuni na Turaga, kevaka ko ni a tiko eke, ke a sega ni ciba na ganequ.”

³³ Ni sa qai raica ko Jisu na nona tagi, kei na nodra tagi na Jiu era sa lako vata kaya mai, sa vutugu ko koya e na yalona, a sa rarawa na lomana,

³⁴ ka kaya, “Evei na vanua dou buluti koya kina?” Era sa kaya vua, “Turaga, ni lako mai mo ni raica.”

³⁵ Sa tagi ko Jisu.

³⁶ Era sa qai kaya na Jiu, “Raica na kena levu ni nona loloma vei koya!”

³⁷ Ia eso vei ira sa kaya, “Sa sega beka ni rawata ko koya oqo, ko koya sa dolava na mata ni mataboko, me lewa talega me kakua ni mate na tamata oqo?”

Vakabulai Tale Mai na Mate ko Lasarusa

³⁸ Sa qai vutugu tale e na yalona ko Jisu, ka lako mai ki nai bulubulu. Ia sa dua na qara-vatu, ka sa kenai sogo e dua na vatu.

³⁹ Sa kaya ko Jisu, “Dou kauta tani na vatu.” Sa kaya vua ko Marica, a gane i koya sa mate, “Kemuni na Turaga, sa na bona ko koya, ni sa qai bogi va na nona mate.”

⁴⁰ Sa kaya vua ko Jisu, “Au a sega li ni kaya vei iko, ni ko na raica na kaukauwa ni Kalou, kevaka ko sa vakabauta?”

⁴¹ Era sa qai kauta tani na vatu. A sa ta cake ko Jisu, ka kaya, “Na Tamaqu, au sa vakavinavinaka vei iko ni ko a rogoci au mai.

⁴² Ia ka'u sa kila ni ko sa rogoci au tikoga, ia ka'u sa vosa e na vukudra na tamata sa tiko eke, me ra vakadinata ni ko sa talai au mai.”

⁴³ Ia ni sa vosa oti vakaoqo, sa kaci e na domo levu, “Lasarusa, lako mai!”

⁴⁴ Ia ko koya ka mate sa lako mai, ka viviraki tu na ligana kei na yavana e nai sole ni mate, ka viviraki na uluna e na dua nai tavoi. Sa kaya vei ira ko Jisu, “Dou sereki koya, ka laiva me lako.”

Na Bukiveretaki i Jisu

⁴⁵ A ra sa lewe vuqa vei ira na Jiu sa lako mai vei Meri, ni ra sa raica na ka sa kitaka ko Jisu, era sa vakabauti koya.

⁴⁶ Ia ko ira eso sa lako yani vei ira na Farisi, ka tukuna vei ira na ka sa cakava ko Jisu.

⁴⁷ Sa qai soqoni vata ko ira na bete levu kei ira na Farisi me ra bosea, a ra sa kaya, “A cava mada me da kitaka? Ni sa cakava na cakacaka-mana e vuqa na tamata oqo.

⁴⁸ Kevaka eda sa weletaki koya vakaoqo, era na vakabauti koya na tamata kecega, era na qai lako mai na kai Roma ka kovea na noda koro kei na noda matanitu.”

⁴⁹ A sa dua vei ira, ko Kaiafa, ko koya sa bete levu e na yabaki ko ya, sa kaya vei ira, “Dou sa sega ni kila e dua na ka,

⁵⁰ se vakananuma ni sa yaga vei keda me mate e dua na tamata e na vukudra na tamata, ka me kakua ni rusa na matanitu taucoko.”

⁵¹ A sa sega ni vosataka na ka oqo ko koya vakataki koya, ia ni sa bete levu e na yabaki ko ya, sa parofisai ko koya ni na mate ko Jisu e na vuku ni matanitu ko ya,

⁵² ka segai e na vuku ni matanitu duaduaga ko ya, me vakasoqoni ira vata talega na luve ni Kalou era sa duiveiseyaki me ra dua bau.

⁵³ Mai na siga ko ya era sa qai bosei koya me ra vakamatea.

⁵⁴ O koya oqo sa sega kina ni lako votu tiko ko Jisu e na kedra maliwa na Jiu, a sa lako yani mai kea ki na vanua sa voleka ki na vanua lala, ki na dua na koro na yacana ko Ifereimi, a sa tiko kina kei ira na nona tisaipeli.

⁵⁵ A sa voleka na nodra solevu ni Lako-sivia na Jiu, a ra sa lewe vuqa sa lako cake ki Jerusalemi, mai vanua, ni se bera na solevu ni Lako-sivia, me ra vakasavasavataki ira.

⁵⁶ A ra sa qai vakasaqarai Jisu, ka veivosaki vakai ira ga, ni ra sa tu e na vale-ni-soro, “A cava dou vakananuma? Ena lako mai ko koya ki na solevu se segai?”

⁵⁷ Ia sa vakarota ko ira na bete levu kei ira na Farisi, kevaka e dua sa kila na vanua sa tiko kina ko koya, me tukuna mai, me ra qai tauri koya.