Jeremaia 39 - Ai Vola Tabu (Vakadewa Makawa Vakavoutaki 2021)

Sa Kabai ko Jerusalemi ka Bale

¹ E nai kaciwa ni yabaki i Setekaia na tui Juta, e nai katini ni vula, sa lako mai ko Nepukanesa na tui Papiloni kei na nona mataivalu kecega ki Jerusalemi, a ra sa buku na druadrua ni koro.

² E nai katini kadua ni yabaki i Setekaia, e nai kava ni vula, e nai kaciwa ni siga ni vula, sa kabai na koro.

³ A ra sa curu mai ko ira na tamata turaga kecega nei tui Papiloni, ka tiko e na matamata-ni-koro e loma, io ko Nakali-sarisa, kei Samikarinipu, kei Sasikimi, kei Rapi-sarisi, kei Nakali-sarisa, kei Rapi-maki, kei ira kece na tamata turaga nei tui Papiloni sa vo tiko.

⁴ Ia ni sa raici ira ko Setekaia na tui Juta, kei ira kece na tamata i valu, era sa qai dro, ka lako tani e na koro e na bogi, e na sala ni nona were na tui, ki na matamata-ni-koro e na tadrua ni bai ruarua; a sa curu yani ko koya e na sala ki na buca.

⁵ Ka sa vakasavi ira na mataivalu ni kai Kalitia, ka vauci Setekaia e na buca mai Jeriko. Ia ni ra sa tauri koya, era sa kauti koya cake vei Nepukanesa na tui Papiloni ki Ripila e na vanua ko Emaci, a sa lewai koya mai kea ko koya.

⁶ Ia ko tui Papiloni sa qai vakamatei iratou na luve i Setekaia e matana mai Ripila; ko ira kece talega na turaga ni Juta sa vakamatea ko tui Papiloni.

⁷ Ia sa leuta tani ko koya na mata i Setekaia, a sa vesuki koya e na sinucodo, me kauti koya ki Papiloni.

⁸ Ia ko ira na kai Kalitia era sa vakama e na bukawaqa na vale-ni-tui, kei na nodra vale na tamata, ka ra sa basuka sobu na bai kei Jerusalemi.

⁹ Ia na kena vo ni tamata era tiko e na koro, kei ira era sa vuki vua, kei ira na kena vo ni tamata, sa kauti ira ko Nipusaretani na kavetani ni valu i vakatawa, ki Papiloni.

¹⁰ Ia eso vei ira na dravudravua, sa sega na nodra ka, sa vakalaiva tu yani e na vanua ko Juta ko Nipusaretani na kavetani ni valu i vakatawa, a sa solia vei ira na veiloga-ni-vaini kei na veiwere e na gauna ko ya.

Sa Sereki ko Jeremaia ka sa Nanumi Epeti-meleki

¹¹ Ia ko Nepukanesa na tui Papiloni sa vakaroti Nipusaretani na kavetani ni valu i vakatawa e na vuku i Jeremaia, ka kaya,

¹² “Mo kauti koya, ka vakaraici koya vinaka, ka mo kakua ni cakava vua e dua na ka ca; ia mo cakava ga vua me vaka na ka sa kaya vei iko ko koya.”

¹³ A ra sa talaki ko Nipusaretani na kavetani ni valu i vakatawa, kei Nipusasipani, kei Rapi-sarisi, kei Nakali-sarisa, kei Rapi-maki, kei ira kece na tamata turaga nei tui Papiloni;

¹⁴ io era sa talaki, ka kauti Jeremaia mai na lomanibai ni valeniveivesu, ka soli koya vei Kitalaia na luve i Eaikami, na luve i Savani, me kauti koya ki na nona vale, ka sa tiko vata ga ko koya kei ira na tamata.

¹⁵ Ia sa yaco na vosa i Jiova vei Jeremaia ni sa sogolati tiko ko koya e na lomanibai ni valeniveivesu, ka vaka,

¹⁶ “Mo la'ki vosa vei Epeti-meleki na kai Eciopea, ka kaya, ‘Sa kaya vakaoqo ko Jiova-ni-lewevuqa, na Kalou ni Isireli; Raica, au na vakayacora na noqu vosa ki na koro oqo me ca, me sega ni vinaka; ia ena yaco ga e matamu e na siga ko ya.

¹⁷ Ia ka'u na vakabulai iko e na siga ko ya, sa kaya ko Jiova, io ko na sega ni soli ki na ligadra na tamata ko sa rerevaka.

¹⁸ Ni'u na vakabulai iko vakaidina, ia ko na sega ni bale e nai seleiwau, ia na nomu bula ga ena nomu i toki-ni-valu, ni ko sa vakararavi vei au, sa kaya ko Jiova.’ ”