Isikeli 31 - Ai Vola Tabu (Vakadewa Makawa Vakavoutaki 2021)

Na Vuni Sitari Cecere Sara

¹ Ia e nai katinikadua ni yabaki, e nai katolu ni vula, e nai matai ni siga ni vula, sa qai yaco vei au na vosa i Jiova, ka vaka:

² “Ko iko na luve ni tamata, mo kaya vei Fero na tui Ijipita, kivei ira talega na nona lewe vuqa: “Ko sa vakataki cei beka e na nomu levu tiko?

³ Raica, ko koya na kai Asiria sa dua na vu ni sitari mai Lepanoni, sa vakatabana matavinaka ka vakadrauna rugurugua, ka cecere sara; ka sa tu na vusona e loma ni o.

⁴ E na vuku ni wai sa tubu kina me levu, e na vuku ni wai titobu sa cecere kina, ni sa kena uciwai sa drodro volita na wakana, ka sa tala yani na kena soniwai ki na kau kecega ni were.

⁵ E na ka oqo sa cecere cake sara kina ko koya e na kau kecega ni were; ka sa vakalevutaki na tabana ka balabalavu na tabana ni sa levu na wai sa tiko e tolona.

⁶ Era sa cakava na nodra sova na manumanu vuka kecega e na tabana; era sa vakasucu talega na manumanu ni vanua kecega e ruku ni tabana, era sa tiko talega na veimatanitu lelevu kecega e ruku ni yaloyalona.

⁷ A sa rairai vinaka ko koya e na kena levu, ni sa balabalavu na tabana; ka ni sa ti sobu ki na bati ni wai levu na wakana.

⁸ Na sitari e na were ni Kalou sa sega ni qati koya rawa, na damanu talega sa sega ni tautauvata kei na tabana; na ivi talega ni papalagi sa sega ni rawata rawa ni vakatautauvatataki kei na tabana; sa sega e dua na kau e na were ni Kalou me tautauvata kaya e na kena rairai vinaka.

⁹ Au a vakatuburi koya me rairai vinaka ni sa vuqa na tabana, ka sa vuvutaki koya kina na kau kece ni Iteni era sa tu e na were ni Kalou.

¹⁰ “O koya oqo sa kaya kina na Turaga ko Jiova: Ni ko sa laveti iko cake mo cecere, ka sa vakatura na tuvukana ko koya e na maliwa ni tabanikau lalai, ka sa laveti cake na lomana ni sa cecere ko koya,

¹¹ o koya oqo ka'u sa soli koya kina ki na liga i koya na nodra qaqa na veimatanitu. Ni sa ia ko koya, ena ia vakaidina. Ia ni sa ca ko koya, ka'u sa vakasevi koya tani.

¹² A ra sa muduki koya laivi ko ira na kai tani, na nodra bati qaqa na veimatanitu, ka ra sa biuti koya tani. Sa lutu sobu na tabana e na veiulunivanua kei na veibuca kecega, ka sa musuki laivi tu na tabana lalai e na bati ni uciwai kecega ni vanua; ka ra sa lako sobu mai na yaloyalona ko ira kece na kai vuravura, ka ra sa biuti koya.

¹³ E dela ni sitari oqo sa rusa koto ena vakaitikotiko kina na manumanu vuka kecega, ena tiko kece talega e na tabana na manumanu ni vanua.

¹⁴ Me kakua kina ni laveti koya cake ni sa cecere e dua vei ira kece na kau e na bati ni wai, se vakatura cake na tuvukana e na maliwa ni tabanikau, se me tu vakacecere na kau eso, vei ira era gunuva na wai. Ni ra sa soli kece yani ki na mate, me ra la'ki koto e na ruku i vuravura, kei ira na luve ni tamata, era sa lako sobu ki na Qara.

¹⁵ “Sa kaya vakaoqo na Turaga ko Jiova; E na siga ka lako sobu kina ko koya ki bulu ka'u a cakava na somate, au a tabonaka na wai titobu me kenai loloku, ka tarova na kena ua, ka bonota na wai levu. Ia ka'u a vakauqeti Lepanoni me tagicaki koya, ka sa waicala talega e na vukuna na kau kece ni were.

¹⁶ Ka'u a vakayavalata na veimatanitu e na kena rorogo ni nona bale, ni'u sa biuti koya sobu ki bulu kei ira era sa lako sobu ki nai keli. Sa ra qai vakacegui kina mai na ruku i vuravura na kau kecega ni Iteni, na kau digitaki ni Lepanoni, ka vinaka sara, na kau kece sa gunuva na wai.

¹⁷ O ira talega oqo era sa lako sobu kaya ki bulu vei ira era vakamatei e nai seleiwau; kei ira era sa ligana, ka tiko e ruku ni yaloyalona e na kedra maliwa na lewe ni veimatanitu.

¹⁸ “Ko sa qai vakataki cei beka e nai ukuuku kei na kemu levu cake e na kau ni Iteni? Ia dou na kau sobu vata ga kei ira na kau ni Iteni ki na ruku i vuravura. Dou na koto vata ga kei ira sa sega ni cili, kei ira era vakamatei e nai seleiwau. “Sai koya oqo ko Fero kei ira kecega na nona lewe vuqa, sa kaya na Turaga ko Jiova.”