Isikeli 28 - Ai Vola Tabu (Vakadewa Makawa Vakavoutaki 2021)

Sa Cudruvi ko Tui Taia ni sa Viavia Kalou

¹ Sa yaco tale vei au na vosa i Jiova, ka vaka:

² “Ko iko na luve ni tamata, mo kaya vua na tui Taia, Sa kaya vakaoqo na Turaga ko Jiova: “Ni sa viavialevu na lomamu, ka ni ko sa kaya talega, ‘Koi au sa dua na kalou; ka'u sa dabe e na nodra i dabedabe na veikalou, e na loma ni wasawasa’, ia ko sa tamata ga, ka ko sa sega ni kalou, ka dina ga ni ko sa vakatauvatana na lomamu kei na loma ni kalou.

³ Raica, sa vuku ko iko ka lialia ko Taniela; sa sega e dua na ka vuni me ra vunia vei iko;

⁴ e na nomu vuku kei na nomu yalomatua ko sa rawata kina na nomu i yau, ka ko sa binia na koula kei na siliva ki na nomu valeniyau.

⁵ Ni sa levu na nomu vuku kei na nomu dauveivoli ko sa vakalevutaka kina na nomu i yau, ia sa viavialevu na lomamu e na vuku ni nomu i yau.

⁶ O koya oqo sa kaya kina na Turaga ko Jiova, Ni ko sa nanuma na lomamu ni sa loma ni kalou;

⁷ raica, au na kauti ira mai vei iko na kai tani, na nodra qaqa na veimatanitu; ka ra na ucuna na nodra i seleiwau me cudruva kina na nomu vuku lagilagi, ka ra na vakacacana na nomu matavinaka.

⁸ Era na biuti iko sobu ki na qara, ia ko na mate me vakataki ira era vakamatei e na loma ni wasawasa.

⁹ Ko na kaya tiko li, ‘Sa kalou koi au’, e na mata i koya sa vakamatei iko, ka dina ga ni ko sa tamata ga, ka sega ni kalou, e na liga i koya sa vakamatei iko?

¹⁰ Na mate era mate kina na tawa cili ko na mate ga kina e na ligadra na kai tani; ni ka'u sa tukuna oqo, sa kaya na Turaga ko Jiova.

A Lele me Baleti Koya na Tui Taia

¹¹ A sa yaco tale mai vei au na vosa i Jiova, ka vaka:

¹² “Ko iko na luve ni tamata, mo lelevaki koya na tui Taia, ka kaya vua, Sa kaya vakaoqo na Turaga ko Jiova: “Sai iko nai vakatakilakila ni ka e taucoko vakaoti, ko sa vutu ni vuku, ko sa lagilagi duaduaga.

¹³ Ko a tiko mai Iteni, na were ni Kalou; ko sa ubi ga e na vatu talei kecega, na saritiusi, na topasa, na taiamodi, na perili, na onikisa, kei na jasipa, na safaia, na emeralita, kei na rupi; ka sa mataitaki oti e na koula na veika ko tuvana kei nai ukuuku sa tu vei iko. Era sa vakarautaki tu e na siga ko a buli kina.

¹⁴ Ko iko na jerupi lumuti sa vakatikori mo dauveivakarurugi; ko a sa tiko e na ulunivanua tabu ni Kalou; ko a dauveilakoyaki voli e na loma ni vatu bukawaqa.

¹⁵ Sa dodonu sara ko iko e na nomu i valavala mai na siga ko a buli kina, me yacova na gauna sa kune kina vei iko na caka cala.

¹⁶ Mai na kena sa rui levu na nomu dauveivoli ko sa vakasinaiti kina e nai valavala kaukauwa, ka ko sai valavala ca; o koya oqo ka'u na vakacacataki iko tani kina mai na ulunivanua ni Kalou, ia ka'u na vakarusai iko tani, na jerupi dauveivakarurugi, mai na loma ni vatu bukawaqa.

¹⁷ Sa laveti cake na lomamu e na vuku ni nomu lagilagi, o sa vakacacataka na nomu vuku ni ko sa matavinaka, ka'u na viritaki iko ki na qele; ka'u na laivi iko tu e matadra na tui, me ra raici iko.

¹⁸ Ni sa levu na nomu caka cala kei na caka cala ni nomu dauveivoli, ko sa vakacacana kina na nomu veiyasana tabu. O koya oqo ka'u na vakayacora kina na bukawaqa mai na kemu maliwa; ka na sa kani iko, ia ka'u na vakamai iko mo sa dravusa e dela i vuravura e matadra kece era raici iko.

¹⁹ O ira kece vei ira na veimataqali era kilai iko era na kidacalataki iko; ko na yaco mo ka ni veivakarerei, ia ko na yali sara.”

Na Parofisaitaki ni Ca me Baleti Saitoni

²⁰ A sa yaco tale vei au na vosa i Jiova, ka vaka:

²¹ “Ko iko na luve ni tamata, mo vakanamata mada ki Saitoni, ka parofisaitaka na ca ena yaco kina,

²² ka kaya, Sa kaya vakaoqo na Turaga ko Jiova: “Raica, koi au ka'u sa veimecaki kei iko Saitoni, ia ka'u na vakacaucautaki e na kemu maliwa. Era na qai kila ni sai au ko Jiova, ni'u na ia na veicudruvi vua, ka sa vakarokorokotaki vua.

²³ Ni'u na vakayacora vua na mate dauveiveitauvi, kei na vakadave-dra ki na nona sala ni koro; ka ra na bale ko ira na mavoa e na kena maliwa e nai seleiwau sa na lauti koya e na veiyasana. Era na qai kila ni sai au ko Jiova.

²⁴ “Ia ena sega tiko e na vale i Isireli e dua na kedra soni dauveilau, se dua na kedra wa-vakavotona e dauveivakararawataki vei ira kece era tiko vakavolivoliti ira, ka beci ira; ka ra na kila ni sai au na Turaga ko Jiova.

Ena Vakalougatataki ko Isireli

²⁵ “Sa kaya vakaoqo na Turaga ko Jiova; Ni'u na vakasoqona oti na vale i Isireli mai vei ira na veimataqali era dui vakasevi kina, ka ni'u sa vakarokorokotaki vei ira e matadra na veimatanitu, era na qai tiko ga e na nodra vanua ka'u a solia vei Jekope na noqu tamata.

²⁶ Ka ra na tiko vakacegu kina, ka tara vale, ka tea na veiloga-ni-vaini; io, era na qai tiko vakacegu, ni'u sa na cudruvi ira oti kece era beci ira ka ra tiko vakavolivoliti ira. Era na qai kila ni sai au ko Jiova na nodra Kalou.”