Isikeli 25 - Ai Vola Tabu (Vakadewa Makawa Vakavoutaki 2021)

Sa Cudruvi Ira na Luve i Amoni na Kalou

¹ A sa yaco tale vei au na vosa i Jiova, ka vaka:

² “Ko iko na luve ni tamata, mo vakanamata mada vei ira na luve i Amoni ka parofisaitaka na ca vei ira.

³ Mo kaya vei ira na luve i Amoni, Mo rogoca na vosa ni Turaga ko Jiova: Sa kaya vakaoqo na Turaga ko Jiova, Ni ko sa vakaueue ki na noqu vale tabu ni sa vakacacani, kei na vanua ko Isireli ni sa lala, kei na vale i Juta ni ra sa vakabobulataki,

⁴ o koya oqo mo kila ni ka'u na soli iko kina vei ira na kai na tokalau me ra taukeni iko. Era na vakatura na nodra vale vakaturaga e tikimu, ka cakava na nodra i tikotiko e tikimu; era na kania na vuata ni nomu vanua, ka gunuva na memu sucu.

⁵ Ia ka'u na vakayacori Rapa me bai ni kameli, kei na nodra vanua na luve i Amoni mei kotokoto ni qele ni sipi. Ia dou na kila ni sai au ko Jiova.

⁶ Ni sa kaya vakaoqo na Turaga ko Jiova: E na vuku ni nomu sa vakasausau ka vakabutubutu ka reki e na yalo e veibeci ka veivakaisini ki na vanua ko Isireli,

⁷ o koya oqo ka'u sa dodoka yani kina na ligaqu vei iko, ka soli iko mo nodra i toki-ni-valu na veimatanitu tani. Au na muduki iko tani mai vei ira na veimataqali, ka vakarusai iko tani mai na veivanua; ka'u na vakawabokotaki iko. Ia ko na qai kila ni sai au ko Jiova.

Na Cudruvi nei Moapi

⁸ “Sa kaya vakaoqo na Turaga ko Jiova: Me vaka ni sa kaya ko Moapi kei Sia, Raica, sa qai vakataki ira kece na veimatanitu na vale i Juta,

⁹ o koya oqo ka'u na dolava kina nai yalayala i Moapi mai na veikoro, io na nona veikoro mai na nona i yalayala, oqori ka uasivi cake e na vanua, ko Peci-jisimoci, kei Peali-mioni kei Kiri-aceimi.

¹⁰ Ia ka'u na solia me ra taukena na kai na tokalau ka me okati vata kina ko ira na luve i Amoni, ka solia me ra taukena. E na ka oqo era na sega ni qai nanumi tale kina na luve i Amoni e na veivanua,

¹¹ ka'u na vakatauca na noqu lewa vei Moapi, ka ra na qai kila kina ni sai au ko Jiova.

Na Cudruvi nei Itomi

¹² “Sa kaya vakaoqo na Turaga ko Jiova: Ni sa cudruva na vale i Juta ko Itomi, ka sa caka cala vakalevu vei ira, ka sa saumi ira ko koya,

¹³ o koya oqo sa kaya kina na Turaga ko Jiova, Au na dodoka talega na ligaqu vei Itomi, ka vakaotia tani mai kina na tamata kei na manumanu. Ia ka'u na vakalalataka sara mai Temani ka yala ki Titana; era na bale e nai seleiwau.

¹⁴ Ia ka'u na vakayacora na noqu cudru vei Itomi e na ligadra na noqu tamata na Isireli; ka ra na cakacaka mai Itomi me vaka na noqu cudru ka vaka na noqu lesa; ka ra na kila na noqu cudru ni veisausaumi, sa kaya na Turaga ko Jiova.

Na Cudruvi nei Filisitia

¹⁵ “Sa kaya vakaoqo na Turaga ko Jiova; Ni ra ia na veicudruvaki na kai Filisitia, ka ra ia na veisausaumi e na yalo dauveibeci, me ra vakarusa e na vuku ni veicati makawa;

¹⁶ o koya oqo sa kaya kina na Turaga ko Jiova; Raica, au na dodoka na ligaqu vei ira na kai Filisitia, ka muduki ira tani na kai Kireci, ka vakarusai ira era vo mai baravi.

¹⁷ Ia ka'u na vakayacora vei ira na noqu cudru ni veisausaumi levu kei na veivunauci vakacudrucudru; ka ra na kila kina ni sai au ko Jiova, ni'u sa vakatauca vei ira na noqu cudru.”