Isikeli 2 - Ai Vola Tabu (Vakadewa Makawa Vakavoutaki 2021)

Na Raivotu ni Vola Vivigi

¹ A sa kaya vei au ko koya, “Ko iko na Luve ni tamata, mo tucake e na yavamu, ka'u na qai vosa vei iko.”

² A sa curumi au na yalo ni sa vosa vei au ko koya, ka sa vakaturi au e na yavaqu, ka'u sa qai rogoci koya sa vosa vei au.

³ A sa kaya vei au ko koya, “Ko iko na luve ni tamata, au sa talai iko vei ira na Isireli, ki na dua na matanitu dauvuki sa vuki tani vei au. O ira kei na nodra qase era sa talaidredre vei au, ka yacova sara na siga oqo.

⁴ Ni ra sa gone vosalevu ka yalokaukauwa. Au sa talai iko vei ira; ia mo kaya vei ira, ‘Sa kaya vakaoqo na Turaga ko Jiova.’

⁵ Ia ko ira, se ra na vakarorogo, se ra na kakua, (ni ra sa vale dautalaidredre,) era na kila ga ni sa dua na parofita ka tiko e na kedra maliwa.

⁶ Ia ko iko, na luve ni tamata, mo kakua ni rerevaki ira; kakua talega ni ko rerevaka na nodra vosa, ia sa kau vakavotona ga kei na soni sa tiko kei iko, ka ko sa tiko vata talega kei na batibasaga. Ia mo kakua ni rerevaka na nodra vosa, a matadra talega mo kakua ni ko rerevaka, ia era sa matatamata dautalaidredre ga.

⁷ Ia mo tukuna ga vei ira na noqu vosa, se ra na vakarorogo, se ra na kakua; ni ra sa dautalaidredre vakalevu.

⁸ “Ia ko iko, na luve ni tamata, mo rogoca na ka ka'u sa kaya vei iko; mo kakua ni talaidredre me vaka na vale dautalaidredre ko ya; mo dalaga, ka kania na ka ka'u sa solia vei iko.”

⁹ Ia ni'u a vakaraica, raica, sa dua na liga sa dodo mai vei au; ka raica, sa tu kina e dua nai vola vivigi.

¹⁰ A sa tevuka e mataqu; a sa volai e loma e dakuna talega, ka sa volai kina na lele, kei na tagi yaso, kei na vakaulei.