Filimoni 1 - Ai Vola Tabu (Vakadewa Makawa Vakavoutaki 2021)

¹ Koi au ko Paula, sa vesu tu e na vuku i Karisito Jisu, kei Timoci na wekada, vei Filimoni o koya keirau sa dau lomana, kei na neirau i tokani,

² vei Afia talega na wekada yalewa, vei Akipo talega na neirau i tokani e nai valu oqo, vei ira talega nai soqosoqo lotu era sa tiko e na nomu vale:

³ Me nomudou na loloma, kei na vakacegu, mai vua na Kalou ko Tamada, kei na Turaga ko Jisu Karisito.

Na Loloma kei na Vakabauta nei Filimoni

⁴ Au sa vakavinavinaka vua na noqu Kalou, ni'u sa cavuti iko e na veisiga e na noqu masu;

⁵ ni'u sa rogoca na nomu loloma kei na nomu vakabauta vua na Turaga ko Jisu, kivei ira kece talega era sa lotu;

⁶ me mai kaukauwa na vakabauta sa tu vei iko, me vakatakilai kina na ka kecega e vinaka sa tu vei kemudou, e na vuku i Karisito Jisu.

⁷ Ni sa levu na neitou reki kei na vakacegu e na vuku ni nomu loloma, na wekaqu, ni ko sa vakaceguya na lomadra era sa lotu.

Na Vakamamasu me Baleti Onisimo

⁸ E na vuku ni ka oqo, ka dina ga ni sa rawa me'u doudou vakalevu e na vuku i Karisito me'u vakarota vei iko na ka e kilikili,

⁹ ia e na vinaka cake me'u yavutaka na noqu vakamamasu vei iko e na loloma—koi au, ko Paula, na qase ka sa vesu tiko edaidai e na vuku i Karisito Jisu—

¹⁰ Au sa vakamasuti iko e na vuku ni luvequ, ko Onisimo, o koya ka'u sa vakatubura ni'u sa vesu tu.

¹¹ O koya ka sa sega ni yaga eliu vei iko, ia sa qai yaga sara vei iko oqo, vei au talega.

¹² Au sa qai tala tale vei iko, o koya oqo mo vakacegui koya, ni sa vaka na lewequ dina sara.

¹³ Au sa via taura ga me tiko vei au, me kemui sosomi me sa qaravi au ni'u sa vesu tu e na vuku ni tukutuku-vinaka,

¹⁴ ia ni'u sa sega ni kila na yalomu, au sa sega ni via cakava e dua na ka, me kakua ni vaka na ka ni vakasaurara na nomu loloma, ia me sa lomamu ga kina.

¹⁵ Ni sai koya beka oqo sa lako tani vakalekaleka kina, mo tauri koya tale ka tawa mudu,

¹⁶ me kakua ni vaka na tamata bobula walega, ia me uasivi cake mai na bobula, me wekamu lomani—e vakabibi vei au, ia ka vakaevei na kena levu vei iko, e na ka vakayago kei na ka ni Turaga talega.

¹⁷ Ia oqo, kevaka ko sa okati au ni'u sai tokani, mo vakacegui koya me vakataki au.

¹⁸ Kevaka sa vakacacani iko ko koya e na dua na ka, se sa dua na ka sa dinau kina vei iko, mo vola vei au.

¹⁹ Oi au ko Paula, au sa vola e na ligaqu dina: Au na sauma. Ia ka'u sa sega ni kaya vei iko ni sa dodonu ga mo noqu talega ko iko.

²⁰ Io, noqu i tokani, me'u rekitaki iko mada e na Turaga! Vakaceguya na lomaqu e na vuku i Karisito.

²¹ Ni ka'u sa vakadinata ko na talairawarawa, ka'u sa vola kina vei iko, ni'u sa kila ko na kitaka na ka ka'u sa kaya, ka uasivi cake kina.

²² Mo vakarautaka talega e dua na vale me'u moce kina, ni'u sa nuitaka ni'u na soli lesu vei kemudou e na vuku ni nomudou masu.

Tini ena Loloma

²³ Eratou sa loloma yani vei iko ko Epafira, keirau sa vesu vata kaya e na vuku i Karisito Jisu,

²⁴ kei iratou talega na noqu i tokani, ko Marika, ko Arisitako, ko Timasa, kei Luke.

²⁵ Me tiko kei na yalomudou na loloma ni noda Turaga ko Jisu Karisito. Emeni.