Esiteri 5 - Ai Vola Tabu (Vakadewa Makawa Vakavoutaki 2021)

Na Veisureti ni Kana Magiti i Esiteri

¹ Ia e na kenai katolu ni siga sa vakaisulu vakaranadi ko Esiteri, ka la'ki tu e na rara e loma ni nona vale na tui, o koya ka donuya na nona vale na tui. A sa dabe tiko na tui e na nona i tikotiko vakatui e na nona vale, sa donuya na matamata ni vale.

² Ia ko koya na tui ni sa raici Esiteri na ranadi ni sa tu e na rara, a sa kauwaitaki koya, ka sa dodoka vei Esiteri nai titoko koula sa taura tiko e ligana. A sa toro voleka ko Esiteri, ka tara na mua ni titoko.

³ Sa qai kaya vua ko koya na tui, “A cava ko sa vinakata, Esiteri na ranadi? Ka cava na ka ko sa mai kerea? Ena soli ga vei iko, kevaka ka'u na wasea rua kina na noqu matanitu.”

⁴ A sa kaya ko Esiteri, “Kevaka sa vinaka vua na tui, me lako mai e na siga oqo na tui kei Amani me kania na magiti ka'u sa vakarautaka vua.”

⁵ Sa qai kaya na tui, “Me vakusarawataki ko Amani, me caka na ka sa kaya ko Esiteri.” A rau a lako yani na tui kei Amani me kania na magiti sa vakarautaka ko Esiteri.

⁶ A sa kaya vei Esiteri na tui ni sa ia na gunu waini, “A cava na ka ko sa via kerea? Ena soli ga vei iko. Ka cava na ka ko sa masuta? Ena vakayacori ga, ke mani wase rua kina na matanitu.”

⁷ Sa qai kaya ko Esiteri, “Oqo na noqu vakamamasu kei na noqu kerekere:

⁸ Kevaka sa vinakati au na tui, a sa vinakata na tui me solia na ka ka'u sa masuta, ka vakayacora na ka ka'u sa kerea, mo drau lako mai koi kemuni na tui kei Amani ka kania na magiti ka'u na vakarautaka vei kemudrau, au na qai kitaka e na mataka me vaka sa kaya na tui.”

Sa Nakita ko Amani me Vakamatei ko Motekai

⁹ Ni sa qai lako yani ko Amani e na siga ko ya sa marau ka reki na lomana. Ia ni sa raici Motekai ko Amani e na matamata-ni-koro ni tui, ni sa sega ni vakarokorokotaki koya, sa qai cudru sara vei Motekai ko koya.

¹⁰ A sa kinoca ga ko Amani; ia ni sa yaco ki nona vale, sa talaki me kacivi ira na nonai tokani, kei Seresi na watina.

¹¹ A sa tukuna vei ira ko Amani na nona totoka e na vuku ni nona i yau, kei na kena lewe vuqa na luvena, kei na ka kecega sa vakalevulevui koya kina ko koya na tui, kei na nona toroi koya cake me uasivi vei ira na turaga kei ira na nona tamata na tui.

¹² Sa kaya talega ko Amani, “Ko Esiteri talega na ranadi sa sega ni kaya me lako vata kei na tui e dua tale me kana e na magiti sa cakava ko koya, koi au duaduaga. A sa kaya ko koya me'u lako vata kaya na tui e na mataka talega.

¹³ Ia sa ka wale vei au na ka kecega oqo, ni'u sa raici Motekai na Jiu ni sa tiko e na matamata-ni-koro ni tui.”

¹⁴ Sa qai kaya vei koya ko Seresi na watina kei ira kece na wekana, “Me caka mada e dua na kau me limasagavulu na kiupiti na kena cecere, ia e na mataka mo vosa vua na tui me vakalilici kina ko Motekai. Mo qai marau ni ko sa lako kaya na tui ki na magiti.” A sa vinakata ko Amani na ka oqo, a sa kaya me vakaduri cake na kau.