Cakacaka 3 - Ai Vola Tabu (Vakadewa Makawa Vakavoutaki 2021)

Sa Vakabulai na Tamata Lokiloki

¹ Ia erau sa lako vata ko Pita kei Joni ki na vale-ni-soro e na aua sa dauia kina na masumasu, e na kenai kaciwa.

² A sa dua na tamata sa lokiloki mai na kete i tinana sa colati voli, ko koya era sa vakadavora e na veisiga e na mata ni katuba ni vale-ni-soro, sa vakatokai ko Lagilagi, me kere ka-ni-loloma vei ira sa curu ki na vale-ni-soro.

³ Ni sa raici Pita kei Joni ko koya ni rau sa voleka ni curu ki na vale-ni-soro, sa kerekere vei rau me dua na ka-ni-loloma.

⁴ A rau sa vakaraica matua ko Pita kei Joni, ka kaya, “Raici keirau mai.”

⁵ A sa vakaraici rau vinaka ko koya, ni sa nanuma ena rawata mai vei rau e dua na ka.

⁶ Sa qai kaya ko Pita, “A siliva kei na koula e sega ni tu vei au, ia na ka ga sa tu vei au ka’u na solia vei iko. E na yaca i Jisu Karisito na kai Nasareci, tu cake ka lako.”

⁷ Sa qai taura na ligana i matau, a sa tubera cake; sa qai vakaukauwataki sara na yavana kei na nona qurulasawa.

⁸ Sa qai rika cake ko koya ka wavu tu, ka lako voli, a sa curu vata kei rau ki na vale-ni-soro, a sa lako, ka rika, ka vakarokorokotaka na Kalou.

⁹ A sa raici koya ko ira na tamata kecega, ni sa lako voli ka vakarokorokotaka na Kalou,

¹⁰ a ra sa kila ni sai koya ka dautiko e na mata ni katuba ko Lagilagi, mai na vale-ni-soro, me kere ka-ni-loloma. A ra sa rere ka kurabui sara e na vuku ni ka sa qai yaco vua.

Vunau ko Pita e na Varada i Solomoni

¹¹ Ia ni sa tauri Pita kei Joni na tamata lokiloki sa qai vakabulai, era sa cici vata ko ira kecega na tamata kivei iratou ki na varada sa vakatokai Na Varada i Solomoni, a ra sa kurabui vakalevu.

¹² Ia ni sa raica ko Pita, sa kaya vei ira na tamata, “Oi kemudou na Isireli, dou sa kurabui e na ka oqo e na vuku ni cava? Se cava dou sa vakaraici keirau matua kina, me vaka sa neirau kaukauwa se yalododonu keirau sa vakayacora kina vei koya oqo me lako rawa?

¹³ A Kalou i Eparaama, kei Aisake, kei Jekope, a nodra Kalou na noda qase, sa vakarokorokotaka na Luvena ko Jisu, ko koya dou a solia yani, ka cakitaka e na mata i Pailato, ni sa lewa ko koya me sereka.

¹⁴ Ia dou a cakitaki koya na Yalosavasava ka Dodonu, ka masuta me soli vei kemudou e dua na daulaba,

¹⁵ ka dou a vakamatea na Vu-ni-bula, ko koya sa vakatura cake tale mai na mate na Kalou. Keitou sai vakadinadina e na ka oqo.

¹⁶ Ia na yacana, e na vuku ni sa vakabauti na yacana, sa vakaukauwataki kina ko koya oqo, ko koya dou sa raica ka kila; io, ni sa vakabauti koya, sa soli vua na bula vinaka sara oqo e na matamudou vakaaduaga.

¹⁷ “Ia oqo, koi kemudou na veiwekani, au sa kila ni dou a cakava ni dou sa sega ni kila, me vakataki ira talega na nomudou turaga.

¹⁸ Ia na veika oqori sa vakatakila eliu na Kalou, e na gusudra kecega na nona parofita, ni na mate na nona Karisito, ka sa qai vakayacora vakakina ko koya.

¹⁹ O koya mo dou qai veivutuni ka saumaki mai, me vakasavasavataki kina na nomudou i valavala ca,

²⁰ me yaco kina na gauna ni veivakaukauwataki mai na mata ni Turaga, ka me tala yani na Karisito ko koya, io ko Jisu ka vunautaki eliu vei kemudou,

²¹ ko koya e dodonu me tiko mada ga mai lomalagi me yacova na gauna sa vakataucokotaki kina na ka kecega me vaka e vosa kina na Kalou e na gusudra kece na nona parofita yalosavasava e na gauna makawa.

²² Ni sa dina sa kaya ko Mosese, ‘Ena vakatubura cake vei kemudou ko Jiova na nomudou Kalou, mai vei ira na wekamudou, e dua na parofita me vakataki au. Ko koya oqo mo dou na vakarogoca na ka vakaaduaga ena tukuna vei kemudou.

²³ Ia ena yaco, a tamata yadua sa na sega ni vakarorogo vua na parofita ko ya, ena vakarusai tani mai vei ira na tamata.’

²⁴ Ia ko ira talega na parofita kecega, sa kenai vakatekivu ko Samuela kei ira talega sa tarava, ko ira kecega era sa vosa, era sa tukuna eliu na gauna oqo.

²⁵ Oi kemudou sa luvedra na parofita, kei na vosa ni veiyalayalati ka cakava na Kalou vei ira na noda qase, ni sa kaya vei Eparaama, ‘Ena kalougata na veimataqali kecega e vuravura e na vuku ni nomu kawa.’

²⁶ Sa tala na Luvena ko Jisu na Kalou, ka liu vei kemudou, ni sa vakatura cake, me vakalougatataki kemudou, ni sa saumaki kemudou yadua mai na nomudou i valavala ca.”