Cakacaka 16 - Ai Vola Tabu (Vakadewa Makawa Vakavoutaki 2021)

Sa Lako Vata kei Rau ko Paula kei Sailasa ko Timoci

¹ Sa qai tadu ko Paula ki Tapi ka vakakina ki Lisitira. Ka raica, sa tiko kina e dua na tisaipeli, ko Timoci na yacana, a luve ni yalewa ni Jutia sa vakabauta; ia sa kai Kirisi na tamana.

² A sa rogo vinaka ko koya oqo vei ira na veiwekani mai Lisitira kei Ikoniona.

³ Sa vinakati koya ko Paula me rau lako kaya; a sa kauta mada ka ciliva, e na vukudra na Jiu era sa tiko e na yasana ko ya, ni ra sa kila kecega sa kai Kirisi na tamana.

⁴ Ia ni rau sa lakova na veikoro, erau sa tukuna vei ira, me ra vakabauta nai vakaro ka lesia ko ira nai apositolo kei ira na qase sa tiko mai Jerusalemi.

⁵ A sa vakataudeitaki vakakina na veisoqosoqo lewe ni lotu e na vakabauta, a ra sa tubu talega e na veisiga me ra lewe vuqa.

Na Raivotu i Paula Mai Tiroa

⁶ Erau sa lako curuma na vanua ko Firijia kei Kalatia, ka ni sa tarovi rau na Yalo Tabu me rau kakua ni vunautaka na vosa mai Esia.

⁷ Ni rau sa yaco mada ki Misia, erau sa vakatovolea sara me lako ki Picinia, ia sa sega ni vakatara vei rau na Yalo i Jisu.

⁸ A rau sa sivi Misia, ka lako sobu ki Tiroa.

⁹ A sa rairai vei Paula e na bogi na raivotu: ni sa tucake tu e dua na kai Masitonia, ko koya sa vakamasuta, ka kaya, “Lako mai ki Masitonia, mo vukei keimami.”

¹⁰ Ia ni sa raica oti na raivotu ko koya, keitou sa vakatovolea sara me lako ki Masitonia, ni keitou sa vakataudeitaka dina sara ni sa kacivi keitou na Turaga me keitou laki vunautaka vei ira nai tukutuku-vinaka.

Na Veisau nei Litia

¹¹ Ia ni keitou sa vakarewa mai Tiroa, keitou sa soko yani ki Samoceresa, ka ia e na mataka ki Niapoli,

¹² ia mai kea ki Filipai, a koro levu e na yasayasa vaka-Masitonia ko ya, a koro vaka-Roma. Ka keitou a tiko e na koro ko ya ka bogi vica.

¹³ Ia e na Siga ni Vakacecegu keitou sa lako ki nai bili ni koro e na bati ni uciwai, ki na yasana keitou nanuma sa dauia kina na lotu masumasu, ka keitou sa tiko sobu, ka vosa vei ira na yalewa era sa soqoni vata kina.

¹⁴ A sa vakarogoca e dua na yalewa ko Litia na yacana, mai na koro ko Ceataira, sa dauvolitaka nai sulu lokaloka, ko koya sa daulotu vua na Kalou. A sa dolava na yalona na Turaga, ka sa vakabauta kina ko koya na veika sa tukuna ko Paula.

¹⁵ Ia ni sa papitaisotaki ko koya, kei ira talega na nona lewe-ni-vuvale, sa vakamamasu ko koya, ka kaya, “Kevaka dou sa vakatulewataka ni’u sa dina vua na Turaga, dou curu mai ki na noqu vale, ka tiko kina.” A sa cikevi keitou sara ko koya.

Na Vakabulai nei Litia mai Filipai

¹⁶ A sa yaco, ni keitou sa lako ki na yasana sa ia kina na masumasu, keitou sa sota kei na dua na vada sa tiko vua na yalo i Paiconi, ko koya sa dauvakavutuniyautaki iratou vakalevu na nona turaga e na nona parofisai vakailasu.

¹⁷ A sa muri Paula kei keitou ko koya oqo, a sa qoqolou, ka kaya, “Eratou sa tamata ni Kalou Cecere Sara ko iratou na tamata oqo, a ratou sa vakatakila vei kemudou na sala ni bula.”

¹⁸ A sa bogi vuqa ka kitaka tiko na ka oqo. A sa qai rarawa na loma i Paula, a sa rai vuki, ka kaya vua na yalo, “Au sa vakarota vei iko e na yaca i Jisu Karisito mo lako tani mai vua.” A sa lako tani sara e na tiki-ni-siga ko ya.

¹⁹ Ia ni sa raica ko iratou na nona turaga ni sa takali na ka eratou a vakararavi kina me rawa kina na nodratou i yau, eratou sa tauri Paula kei Sailasa, ka yarataka ki na rara ni veivoli vei ira na turaga.

²⁰ Ni rau sa kau ki na mataveilewai, eratou sa kaya, “Oi rau na tamata oqo, erau Jiu, erau sa vakatubu leqa tiko e na noda koro,

²¹ ka vakarota nai valavala eso sa sega ni dodonu vei keda me da vakabauta, se muria, ni da sa kai Roma.”

²² Era sa qai veitokoni mai na lewe vuqa me ra saqati rau, ka ra sa luvata na nodrau i sulu ko ira na mataveilewai ka vakarota me rau warolaki.

²³ Ia ni ra sa warolaki rau vakalevu, era sa qai biuta ki na valeniveivesu, a ra sa vakarota vua nai vakatawa me rau yadravi matua.

²⁴ Ko koya nai vakatawa, ni sa vakaroti vakaoqo, sa biliraki rau ki na tiki ni valeniveivesu e loma, ka sa vesuka matua sara na yavadrau e nai vesu kau bibi.

²⁵ Ia ni sa lomaloma ni bogi na vanua, sa masu ko Paula kei Sailasa, ka sere vua na Kalou; a ra sa rogoci rau ko ira na tamata sa vesu tu.

²⁶ A sa tavuki vakalevu vakasauri na vanua, a sa yavala kina na yavu ni valeniveivesu. A sa tadola vakasauri kecega nai sogo ni katuba, a sa sereki yadua na kedrai vesu na tamata.

²⁷ A sa yadra mai na moce nai vakatawa ni valeniveivesu, ia ni sa raica sa tadola tu nai sogo ni katuba ni valeniveivesu, sa ucuna na nona i seleiwau, ka sa vakarau me vakamatei koya, ni sa nanuma era sa dro ko ira na tamata sa vesu tu.

²⁸ Ia sa qai kaci e na domo levu ko Paula, ka kaya, “Kakua ni ko vakaleqai iko, ni keitou sa tiko kecega oqo.”

²⁹ Sa qai kaci ko koya me kau mai na cina, a sa rika ki loma, a sa sautaninini mai, a sa cuva sobu vei Paula kei Sailasa,

³⁰ a sa kauti rau ki tuba, ka kaya, “Oi kemudrau na turaga, a cava me’u kitaka me’u bula kina?”

³¹ A rau sa kaya, “Vakabauta na Turaga ko Jisu Karisito, ko na bula kina, kei ira talega na nomu lewe-ni-vuvale.”

³² A rau sa tukuna vua na vosa ni Turaga, vei ira kece talega era sa tiko e nona vale.

³³ A sa kauti rau ko koya e na tiki-ni-bogi ko ya, a sa quaraka na we ni kuita; a sa papitaisotaki sara, ko koya kei ira kecega na nona lewe-ni-vuvale.

³⁴ Ia ni sa kauti rau ki nona vale sa tauca na kakana e matadrau, a sa reki vakalevu, ni sa vakabauta na Kalou, kei ira kecega na nona lewe-ni-vuvale.

E Rau sa Sereki Mai Valeniveivesu ko Paula kei Sailasa

³⁵ Ia ni sa siga mai, era sa tala na ovisa ko ira na mataveilewai, ka kaya, “Sereki rau na tamata oqori me rau lako.”

³⁶ A sa tukuna vei Paula na vosa oqo nai vakatawa ni valeniveivesu, “Sa talaki mai na mataveilewai mo drau sereki. Drau qai cavu tu, ka lako e na vakacegu.”

³⁷ Ia sa kaya vei ira ko Paula, “Era sa warolaki keirau e matadra na lewe-ni-vanua, ka ra sa sega ni veilewaitaki keirau mada eliu, ia keirau sa kai Roma koi keirau, ka ra sa biuti keirau ki na valeniveivesu; ia oqo era sa qai via biuti keirau vakavuni, oi? Me kakua sara! Laiva me ra lako ga mai ka kauti keirau yani ki tuba.”

³⁸ A ra sa tukuna na vosa oqo ko ira na ovisa vei ira na mataveilewai, ka ra sa qai rere ni ra sa rogoca erau sa kai Roma.

³⁹ A ra sa lako mai ka vakamasuti rau, ka kauti rau ki tuba, ka vakamamasu me rau biuta na koro.

⁴⁰ A rau sa qai lako tani mai na valeniveivesu, ka curu ki na vale i Litia; ia ni rau sa sotavi ira na veiwekani, erau sa vakayaloqaqataki ira, ka qai lako yani.