Cakacaka 13 - Ai Vola Tabu (Vakadewa Makawa Vakavoutaki 2021)

E Rau sa Digitaki ka Talai ko Panapasa kei Saula

¹ A sa tiko vei ira nai soqosoqo lotu mai Anitioki eso na parofita kei nai vakavuvuli, ko iratou ko Panapasa, kei Simione, na yacana talega ko Nikeri, kei Lusiu na kai Kirini, kei Manaini, ko koya erau sa susugi vata kei Eroti na turaga, kei Saula.

² Ia ni ratou sa cakacaka vua na Turaga, ka lolo tiko, sa kaya na Yalo Tabu, “Lesi rau mai vei au ko Panapasa kei Saula ki na cakacaka ka’u sa kacivi rau kina.”

³ Ni ratou sa lolo ka masu oti, eratou sa qai tabaki rau e na ligadratou, a ratou sa talaki rau yani.

Mai Saipurusi

⁴ Ia koi rau oqo ni sa vakatalai rau na Yalo Tabu, erau sa lako ki Selusia; a rau sa qai soko tani mai kina ki Saipurusi.

⁵ Ia ni rau sa tiko mai Salamisa, erau sa vunautaka na vosa ni Kalou e na nodra veivalenilotu na Jiu. A sa veivuke vei rau ko Joni.

⁶ Ia ni ratou sa lakova taucoko na yanuyanu ka yaco ki Pafo, eratou sa qai kunea e dua na dauvakadraunikau, a parofita vakailasu, a Jiu, a yacana ko Pari-Jisu.

⁷ Erau sa tiko vata kei na kovana ni vanua, ko Serikiu Paula, a tamata yalomatua, ko koya sa kacivi Panapasa kei Saula, a sa via rogoca na vosa ni Kalou.

⁸ Ia sa tarovi rau ko Elima na dauvakadraunikau (oqo nai balebale ni yacana), ka sa vakatovolea me saumaka tani na kovana me kakua ni vakabauta.

⁹ Ia ko Saula, ko koya talega ko Paula, ni sa sinai e na Yalo Tabu, sa vakaraici koya matua

¹⁰ ka sa kaya, “Ko iko ka sinai e na dauveivakaisini kece kei na ca kecega, a luve ni tevoro, a meca ni ka kecega e dodonu, ko na sega beka ni muduka na nomu dauvukica nai naki dodonu ni Turaga?

¹¹ Ka mo rogoca oqo—sa bikai iko na cudru ni Turaga, ko na mataboko kina, mo sega ni raica rawa na mata-ni-siga me oti mada na siga eso.” A sa lutu vakasauri vei koya na kabukabu kei na butobuto, ka sa vakayayamo voli ni sa vakasaqara eso me tuberi koya.

¹² Ni sa qai raica na kovana na ka sa yaco, sa vakabauta, ni sa kurabui e nai vakavuvuli ni Turaga.

Ko Paula kei Panapasa mai Anitioki e Pisitia

¹³ Ni sa biuti Pafo ko Paula kei iratou sa lako vata kaya, eratou sa soko sara ki Perika mai Pamifilia. A sa biuti rau ko Joni, ka lesu tale ki Jerusalemi;

¹⁴ ia ni rau sa lako tani e Perika, erau sa yaco yani ki Anitioki mai Pisitia. A rau sa curu ki na valenilotu e na Siga ni Vakacecegu, ka rau sa tiko sobu.

¹⁵ Ia ni sa wili oti nai vola ni vunau kei ira na parofita, sa qai talaki vei rau ko ira na turaga ni valenilotu, ka kaya, “Oi kemudrau na veiwekani, kevaka e tu vei kemudrau e dua na vosa ni vakavuvuli vei ira na tamata, tukuna ga mai.”

¹⁶ Sa qai tucake ko Paula, a sa vakatabataba, ka kaya: “Oi kemuni na Isireli, kei kemuni sa rerevaka na Kalou, ni vakarorogo mai.

¹⁷ Na nodra Kalou na tamata oqo, io na nodra na Isireli, sa digitaki ira oti na noda qase, ka sa vakalevui ira na tamata, ni ra sa tiko vulagi mai na vanua ko Ijipita, ka sa kauti ira mai kina e na ligana kaukauwa.

¹⁸ Ia ni sa vosota ko koya na nodra i valavala e na loma ni vanua lala ka yabaki vasagavulu.

¹⁹ Ni sa vakawabokotaka oti na matanitu e vitu e na vanua ko Kenani, sa qai vota vei ira na nodra vanua.

²⁰ Sa oti oqo, sa qai lesia eso na turaganilewa ka yabaki va na drau ka limasagavulu, a sa yacovi Samuela na parofita.

²¹ Sa oti oqo, era sa qai gadreva me dua na nodra tui; a sa soli Saula vei ira na Kalou, ko koya sa luve i Kisi, a tamata e na yavusa i Penijamini, ka yabaki vasagavulu.

²² Ia ni sa kauti koya tani, sa qai vakatuburi Tevita me nodra tui; a sa tukuni koya talega, ka kaya, ‘Au sa kunei Tevita na luve i Jese, a tamata sa vaka na lomaqu, ko koya ena cakava kecega na noqu lewa.’

²³ Mai na nona kawa, me vaka na vosa ni yalayala, sa vakatubura na Kalou vei ira na Isireli nai Vakabula, ko Jisu.

²⁴ Ni se bera na nona lako mai, a sa vunautaka taumada ko Joni na papitaiso ni veivutuni kivei ira kecega na Isireli.

²⁵ Ia ni sa vakaotia tiko na nona cakacaka ko Joni, sa kaya, ‘Kemuni sa nanuma se ko cei koi au? Au sa sega ni o koya. Ka raica, e dua sa muri au mai, ia nai vava ni yavana, ka’u sa sega ni yaga me’u sereka.’

²⁶ “Oi kemuni na veiwekani, na kawa i Eparaama, kei ira kecega vei kemuni sa rerevaka na Kalou, sa talai vei keda na vosa ni bula oqo.

²⁷ Ko ira era sa tiko mai Jerusalemi, kei na nodra turaga, ni ra sa sega ni kilai koya, se na nodra vosa na parofita sa wili e na veisiga ni vakacecegu, era sa vakayacora ni ra sa lewai koya me mate.

²⁸ Ka sa dina era sa sega ni kunea e dua na ka sa dodonu me mate kina, ia era sa masuti Pailato me vakamatei ko koya.

²⁹ Ia ni ra sa vakayacora oti na ka kecega sa volai e na vukuna, era sa kevutaka sobu mai na kau, ka buluta e na dua nai bulubulu.

³⁰ A sa vakaturi koya cake tale mai na mate na Kalou;

³¹ ka bogi vuqa sa rairai kina ko koya vei ira era a lako vata kaya mai Kalili ki Jerusalemi, a sa dautukuni koya ko ira oqori vei ira na tamata.

³² Ia keirau sa tukuna vei kemuni nai tukutuku vinaka ni yalayala ka caka vei ira na qase,

³³ ni sa vakayacora na Kalou vei keda na luvedra, ni sa vakatuburi Jisu cake tale ko koya; me vaka na ka sa volai e nai karua ni Same, ‘Ko iko na Luvequ, au sa vakatuburi iko e na siga oqo.’

³⁴ Ia e na vuku ni sa vakaturi koya cake mai na mate, me kakua ni vuca tale, sa kaya vakaoqo ko koya, ‘Au na solia vei kemudou na veika sa yalataki dina vei Tevita.’

³⁵ Ka sa kaya talega kina ko koya e na dua tale na Same, ‘O na sega ni laiva na nomu Le dua sa yalosavasava me vuca mai.’

³⁶ Ia ko Tevita, ni sa qarava oti na nona i tabatamata me vaka na lewa ni Kalou, sa qai moce, a sa buluti vata kei ira na nona qase, a sa vuca mai;

³⁷ ia ko koya sa vakatura cake tale na Kalou, sa sega ni vuca mai.

³⁸ O koya oqo mo ni kila, na veiwekani, ni sa vunautaki vei kemuni na kena vosoti nai valavala ca e na vukuna oqo;

³⁹ e na vukuna talega sa vakadonui kina ko ira kecega era sa vakabauta, e na ka kecega, ko ni sa sega ni vakadonui rawa kina e na vunau i Mosese.

⁴⁰ O koya oqo mo ni qai raici kemuni vinaka, de yaco vei kemuni na ka sa vosa kina ko ira na parofita:

⁴¹ ‘Raica, koi kemudou sa daubeca, ia mo dou kidacala ka rusa, ni’u sa kitaka e dua na cakacaka e na nomudou gauna, a cakacaka dou na sega sara ni vakadinata, kevaka sa dua e tukuna vei kemudou.’ ”

⁴² Ia ni ra sa curu tiko yani, era sa kerekere me vunautaki vei ira na vosa oqo e na Siga ni Vakacecegu sa tarava mai.

⁴³ Ia ni ra sa suka tani ko ira na soqoni vata, sa lewe vuqa na Jiu kei na tamata sa lotu vaka-Jiu, era sa muri Paula kei Panapasa, e rau sa vosa vei ira, ka vakarota vei ira, me ra taura deivaka na loloma ni Kalou.

⁴⁴ Ia e na Siga ni Vakacecegu sa muri, sa vo vakalailai me oti kecega na lewe ni koro ni ra sa soqoni vata me rogoca na vosa ni Kalou.

⁴⁵ Ia ni ra sa raica ko ira na Jiu era sa lewe vuqa, era sa sinai e na vuvu, a ra vakalasuya na veika sa tukuna ko Paula, ka vosavakacacataka.

⁴⁶ A rau sa qai doudou ko Paula kei Panapasa, ka kaya, “E dodonu ga me vunautaki eliu vei kemudou na vosa ni Kalou. Ia ni dou sa biuta tani vei kemudou, ka lewai kemudou mo dou sega ni yaga mo dou bula tawa mudu, raica, keirau sa lako vei ira sa matanitu tani.

⁴⁷ Ni sa vakarota vakakina vakaoqo vei keitou na Turaga, ‘Au sa vakaturi iko mo nodra rarama na veimatanitu, mo yaco mo vu ni bula ki nai yalayala kei vuravura.’ ”

⁴⁸ Ia ni ra sa rogoca ko ira sa matanitu tani, era sa reki, a ra sa vakarokorokotaka na vosa ni Turaga; ia sa vakabauta ko ira kece era sa vakarau tu me vinakata na bula tawa mudu.

⁴⁹ A sa kuruvaki na vosa ni Turaga ki na veiyasana kecega oqori.

⁵⁰ A ra sa vakauqeti ira na yalewa lotu, kei ira na marama, kei ira na turaga ni koro, ko ira na Jiu, a ra sa vakatubura na dauveivakacacani vei rau ko Paula kei Panapasa, ka vakasevi rau tani e na nodra yasana.

⁵¹ A rau sa kureitaka vei ira na soso mai na yavadrau, a rau sa lako ki Ikoniona.

⁵² Ia ko ira sa lotu era sa sinai e na marau kei na Yalo Tabu.