Aisea 6 - Ai Vola Tabu (Vakadewa Makawa Vakavoutaki 2021)

A Raivotu kei na Kacivi nei Aisea

¹ E na yabaki sa mate kina ko Usaia na tui ka'u a raica na Turaga ni sa tiko e nai tikotiko vakaturaga, sa cecere ka toka sara ki cake, a sa robota na vale-ni-soro na nona i tini yara.

² Era sa tu e cake vua ko ira na serafimi. Sa yaono na tabadratou: e rua sa tabonaka kina na matana, e rua sa tabonaka kina na yavana, ka rua sa vuka kina.

³ A ra sa veikaciyaki, ka kaya: “E dodonu, e dodonu, e dodonu, ko Jiova-ni-lewevuqa; sa sinai ko vuravura taucoko e na nona i serau.”

⁴ A sa yavala nai lago ni katuba e na domo i koya sa kaci, ka sa vakasinaiti na vale e na kubou.

⁵ Au a qai kaya, “Isa koi au! Ni'u sa ca! Ni'u sa tamata tebenigusu qeleqelewa, ka'u sa tiko talega kei ira na tamata tebenigusu qeleqelewa; ia sa raica na Tui ko Jiova-ni-lewevuqa na mataqu!”

⁶ Sa qai vuka mai vei au e dua vei ira na serafimi, a sa taura e ligana na qilaiso sa waqa tu, sa kauta e nai saga-ni-buka mai nai cabocabo-ni-soro.

⁷ A sa tara kina na gusuqu, ka kaya, “Raica, sa tau oqo ki na tebenigusumu; sa takali na nomu caka cala, ka sa vosoti na nomu i valavala ca.”

⁸ Au a qai rogoca na domo ni Turaga, ni sa kaya, “Ko cei me'u tala, ia ko cei ena lako e na vuku i keitou?” Au a qai kaya, “Koi au oqo. Mo ni talai au!”

⁹ A sa kaya ko koya, “Mo lako, ka kaya vei ira na tamata oqo: “ ‘Dou na rogoca tiko, ka lecava ga; ia dou na raica tikoga, ka sega ga ni kunea.’

¹⁰ Mo vakabibitaka na yalodra na tamata oqo, ka vakadidivarataka na daligadra, ka cakava me bobo na matadra; de ra rai e matadra, ka rogo e na daligadra, ka kila e na lomadra, ka saumaki mai, ka ra vakabulai.”

¹¹ Au a qai kaya, “Kemuni na Turaga, me cava na kena dede?” A sa kaya ko koya: “Me lala mada na veikoro me sega na lewena, kei na veivale me sega na tamata e tiko kina, kei na vanua me lala didi;

¹² me yacova ni sa kauti ira vakayawa tani na tamata ko Jiova, ka sa levu na tikina e biu laivi e loma ni vanua.

¹³ Ia ke sa na vo tu kina na kenai katini, a ra na lesu mai, me vakarusai tale, me vaka na paini se na oki, ni sa musuki sobu ka sa bula tu na vuna.” Sa na vakakina na kawa tabu e na vuna na kena bula tu.