Aisea 57 - Ai Vola Tabu (Vakadewa Makawa Vakavoutaki 2021)

Na Cudruvi ni Nona Qaravi Kalou Tani ko Isireli

¹ Sa yali na tamata yalododonu, ka sa sega e dua sa vakasara ki lomana; ia na tamata yalodina era sa kau tani, ka sa sega e dua sa vakananuma. Ni sa kau tani na yalododonu mai na ca sa bera mai,

² ena curu ki nai vakavakacegu ko koya; era na vakacegu no e na nodra i davodavo, ko ira yadua era sa lako vakadodonu.

³ Ia koi kemudou, dou toro mai ki ke, na luvena na yalewa daucakaisausau, na kawa ni dauyalewa kei na dautagane.

⁴ Kivei cei dou sa ia kina na veivakalialiai? Kivei cei dou sa vakabegusu kina ka dara yame kina? Dou sa sega li ni luve ni dautalaidredre, na kawa daulasu—

⁵ koi kemudou ka sa daukama e na gagano ca e na veioki, kei na ruku ni vunikau bulabula kecega; oi kemudou sa vakamatei ira na luvemudou e na vanua qiqilo, e na ruku ni uluvatu?

⁶ E na vatu yagoyagovinaka ni wai drodro, ko sa votai kina; sai koya, sai koya ga, ka nomu i votavota; ia ki na ka ko ya ko sa sova kina nai sevu, ka vakacabora nai madrali. Me'u sega li ni cudru e na ka oqo?

⁷ E dela ni ulunivanua cecere ka rewa-i-cake ko sa cakava na nomu i mocemoce, io ko sa cabe kina mo vakacaboisoro.

⁸ Ia mai daku ni sogo kei na duru ni katuba ko sa vakaduria kina na nomu i vakananumi; ni ko sa biuti au ka la'ki vakaraitaki iko vua e dua tale, ka sa cabe cake kina; ko sa vakalevutaka na nomu i mocemoce, ka ia na veiyalayalati kei ira; ko sa vinakata na nodra i mocemoce, e na vanua ko sa raica kina.

⁹ Ia ko a lako vua na tui ni ko sa lumuti tu, ka sa vakalevutaka na nomu i lumu; ka sa talai ira na nomu i talaki ki na vanua vakayawa, ka sa vakasisilataki iko sobu ki Etesi.

¹⁰ Ko sa oca e na nomu daulako, ia ko sa sega ni kaya, “Au sa oca walega.” Ko sa qai kunea na kaukauwa ni ligamu; o koya oqo ko sa sega kina ni yalolailai.

¹¹ Ko cei ko a domobula kina ka rerevaka, mo lasu kina? Ia ka sa sega ni nanumi au, ko sa sega talega ni vakasara ki lomamu. Ni'u a galu ga, io mai liu sara, sai koya beka ga ko sa sega ni rerevaki au kina, ne?

¹² Au na vakatakila na nomu yalododonu, kei na nomu cakacaka, ia na ka oqori ena sega ni yaga vei iko.

¹³ Ni ko sa tagi, me ra qai vakabulai iko ko ira na kalou tani ko sa vakasoqona vata! Ena biligi ira kece yani na cagi, ia na mudremudre ena kauti ira tani. Ia ko koya sa vakararavi vei au ena rawata na vanua, ka na taukena na noqu ulunivanua tabu.

Na Yalayala ni Kalou me Veivuke ka Veivakabulai

¹⁴ Ena qai kaya ko Koya, “Dou vakacerea, dou vakacerea, caramaka na sala; kauta tani mai na nodra sala na noqu tamata na ka era tarabe kina.”

¹⁵ Ni sa kaya vakaoqo ko Koya sa cecere ka levu, ka sa tikotiko ga e na gauna tawa mudu, na yacana ko Koya ka Yalosavasava: “Au sa tiko e na tikina cecere ka tabu, kei koya talega sa ramusu ka malumalumu na yalona, me vakabula na yalo i koya sa yalomalumalumu, ka vakabula na lomadra sa bibivoro.

¹⁶ Ni'u na sega ni veileti ka tawa mudu, ka'u na sega talega ni cudru tikoga; ni na qai ceguoca ga e mataqu na yalo, kei na yalo ni tamata ka'u sa bulia.

¹⁷ E na vuku ni nona ca ni sa daukocokoco, ka'u sa cudru; ka'u sa yaviti koya kina, ka'u sa vunitaki au, ka'u sa cudru ga; ka sa vuki tani tiko ko koya ki na sala sa yalona kina.

¹⁸ A nona i valavala ka'u a raica, ia ka'u na vakabulai koya; ka'u na tuberi koya, ka vakasuka tale vua na vakacegu, vei ira talega na kai nona era sa tagi.

¹⁹ Ka'u sa vakatubura na vua ni tebenigusu; na veivinakati tale, na veivinakati tale kei koya sa yawa, kei koya talega sa voleka,” sa kaya ko Jiova; “ia ka'u sa vakabulai koya ga.

²⁰ Ia ko ira na tamata ca era sa vaka na wasawasa seuseua, ni sa sega ni cegu rawa; na kena wai sa kauta tiko mai na qele kei na lolobo.

²¹ Sa sega na vakacegu,” sa kaya na noqu Kalou, “vei ira na tamata i valavala ca.”