Aisea 52 - Ai Vola Tabu (Vakadewa Makawa Vakavoutaki 2021)

Me Reki ko Saioni

¹ Mo yadra mai, mo yadra; vakaisulutaki iko e na nomu kaukauwa, i Saioni! Mo vakaisulutaki iko e na nomu i sulu vakaiukuuku, i Jerusalemi, na koro tabu; ni na sega tale ni curumi iko ko ira na sega ni cili kei ira na dukadukali.

² Ceburaka tani vei iko na kuvu-ni-soso, tucake, mo la'ki tiko, Jerusalemi! Sereka tani nai vau ni domomu, ko iko na goneyalewa ni Saioni na bobula!

³ Ni sa kaya vakaoqo ko Jiova: “Dou a volitaki wale; ia dou na voli tale ia ka sega e nai lavo.”

⁴ Ni sa kaya vakaoqo na Turaga ko Jiova, “Era sa lako sobu eliu ko ira na noqu tamata ki Ijipita, me ra tiko vulagi kina; ia ko Asiria sa vakasaurarataki ira wale.

⁵ Ia oqo, a cava me'u cakava eke,” sa kaya ko Jiova, “ni ra sa kau tani walega na noqu tamata, ko ira ka lewai ira era kaikaila,” sa kaya ko Jiova, “ka sa vosavakacacataki ga na yacaqu e na veisiga kecega?

⁶ O koya oqo era na kila ga kina na yacaqu na noqu tamata; o koya oqo era na kila kina e na siga ko ya ni sai au oqo sa kaya, Raici au!”

⁷ Sa ka lagilagi e na ulunivanua na yava i koya sa kacivaka mai nai tukutuku vinaka, sa vakarogoya mai na tiko sautu, sa kauta mai nai tukutuku vinaka ni veika vinaka, ka vakarogoya mai na veivakabulai, ka sa tukuna mai ki Saioni, “Sa nona na lewa na nomu Kalou!”

⁸ A domodra na nomu i vakatawa era sa tabalaka na domodra, era ia vata na nodra kaila; ni ra na raica e na matanavotu ni sa lesu mai ki Saioni ko Jiova.

⁹ Dou lagata mai na sere ni marau, dou kaikaila vata, na veiyasana lala ni Jerusalemi; ni sa vakacegui ira na nona tamata ko Jiova; ka sa vakabulai Jerusalemi.

¹⁰ Sa vakaraitaka mai ko Jiova na ligana tabu e matadra na veimatanitu kecega; ia nai yalayala kecega kei vuravura ena kunea na bula sa mai vei koya na noda Kalou.

¹¹ Dou lako, dou lako, lako tani eke! Dou kakua ni tara na ka sa sega ni savasava; dou lako tani mai vua; dou savasava mai, koi kemudou ka kauta nai yaya nei Jiova.

¹² Ni na sega ni vakariri na nomudou lako tani, ia dou na sega ni dro ni dou sa lako tu; ni na liutaki kemudou ko Jiova, ka veitaqomaki talega mai dakumudou na Kalou ni Isireli.

Nai Talai Daurarawa

¹³ Raica, ena cakacaka vakavuku ko koya na noqu tamata, ena vakalevulevui ka vakacaucautaki, ia ena cecere sara.

¹⁴ Me vaka era kurabuitaki iko na lewe vuqa— ni sa vakacacani vakalevu na matana, ka sa sega ni vaka nai rairai ni tamata, kei na yagona talega me sega ni vakataki ira na luve ni tamata—

¹⁵ ena vakakina na nona kureitaka na veimatanitu e vuqa; era na galu ko ira na tui e na vukuna; ni ra na kunea na ka sa sega ni tukuni vei ira, kei na ka era sa sega ni rogoca era na kila.