Aisea 40 - Ai Vola Tabu (Vakadewa Makawa Vakavoutaki 2021)

Na Vosa ni Veivakacegui vei Ira na Tamata ni Kalou

¹ Dou vakacegui ira, dou vakacegui ira na noqu tamata, sa kaya na nomudou Kalou.

² Dou cavuta na vosa ni veivakacegui ki Jerusalemi, ka tagicaka vua, ni sa oti na nona gauna ni oca, ni sa buluti na nona caka cala, ni sa ciqoma ko koya mai na liga i Jiova me rauta vakarua na nona i valavala ca kecega.

³ Sa rogo na domo ni dua sa kacikaci e loma ni vanua lala, “Dou caramaka na sala i Jiova, cakava me dodonu e loma ni vanua na salatu ni noda Kalou.

⁴ Ena vakaceceretaki na buca kecega, ka na vakalolovirataki na ulunivanua kei na vanua cecere kecega; na tikina sa veve ena vakadodonutaki, kei na tikina sukusukura ena vakalogalogavinakataki.

⁵ Ena qai vakarairaitaki mai nai ukuuku i Jiova, ka ra na raica vata na tamata kecega, ni sa cavuta oqo na gusu i Jiova.”

⁶ Sa vosa mai e dua ka vaka, “Mo kaci mada!” A sa kaya ko koya, “A cava me'u kacivaka?” Sa vaka na co ga na tamata kece, ka sa vaka na se ni co na kedrai ukuuku kecega;

⁷ sa daumalai na co, a sa daumira na sena, ni sa uvuca nai cegu i Jiova; e dina era sa vaka na co na tamata.

⁸ Sa daumalai na co, a sa daumira na sena, ia na vosa ni noda Kalou ena tudei ka tawa mudu.

⁹ Mo cabeta na ulunivanua cecere, ko iko Saioni, ka kacivaka mai nai tukutuku vinaka; mo tabalaka vakaukauwa na domomu, ko iko Jerusalemi, ka kacivaka mai nai tukutuku vinaka; mo tabalaka, kakua ni ko rere; kaya ki na veikoro e Juta, “Raica, na nomudou Kalou!”

¹⁰ Raica, ena lako vakaukauwa mai na Turaga ko Jiova, ia na ligana ena lewa e na vukuna; na kenai sau ena solia sa tiko ga vua, kei na ka ni nona cakacaka e matana.

¹¹ Ena vakani ira na nona qele ni sipi me vaka nai vakatawa; ena keveti ira na luve ni sipi e na ligana, ka kauti ira voli e na lomaserena; ko ira era vakasucuma tiko na luvedra ena tubera voli vakamalua ko koya.

Na Kalou Vakasakiti nei Isireli

¹² O cei sa vakarautaka na wai e na qeteqete ni ligana, ka vakarautaka na lomalagi e nai qaqalo ni ligana, ka kumuna vata e nai vakarau na qele kei vuravura, ka vakarautaka e nai vakarau ni bibi na veiulunivanua, kei na veiulu-ni-koro e nai vakarau-ni-ka?

¹³ Ko cei sa kila rawa na Yalo i Jiova, se ko cei me nona i vakavuvuli me vakavulici koya?

¹⁴ Erau sa bose vata kei cei, se ko cei sa vakavukui koya, ka vakavulici koya e nai valavala ni lewa? Ko cei sa vakavulici koya me kila-ka, se ko cei sa vakatakila vua na sala ni vuku?

¹⁵ Raica, na veimatanitu era sa vaka ga e dua na turu ni wai e nai takitaki, ka vaka na kuvu-ni-soso e na dari ni vakarau; raica, sa tomika ko koya na veiyanuyanu me vaka sa ka lailai sara.

¹⁶ Ia na kau mai Lepanoni, sa sega ni rauta me buka; ka sa lailai talega na kena manumanu mei soro kama.

¹⁷ A veimatanitu kece sa vaka na ka walega vua; io, sa nanumi me ka lailai vei koya ka levu na ka sa sega, ka sa ka wale sara ga.

¹⁸ Ia dou na qai vakatautauvatataka na Kalou kei cei, se dou na vakatauvatani koya kei na cava?

¹⁹ A matakau ceuceu?—Sa bulia e dua na matai, ka dua na matai ni koula sa botana e na koula, ka sa bulia na kena taube siliva.

²⁰ Ko koya sa dravudravua ka sa dredreta na vakacaboisoro oqo, sa digitaka ga na kau sa sega ni vuca rawa; ka sa qai qara e dua na matai vuku me cakava e dua na matakau sa sega ni yavala rawa.

²¹ Dou sa sega beka ni kila? Dou sa sega li ni rogoca? Sa sega beka ni tukuni vei kemudou mai liu? Dou sa sega ni kila mai na gauna sa tauyavutaki kina ko vuravura?

²² Sai koya ga sa tiko mai cake ka toka e ra ko vuravura, ia na lewena era sa vaka na vodre; sai koya ga sa tevuka, me vaka nai ubi levu, na mata-ni-lagi; ka birika, me vaka na valelaca, mei tikotiko;

²³ sai koya ga sa vakasivoi ira sara na tui; ia ko ira na turaganilewa kei vuravura sa cakava ko koya me ka wale sara.

²⁴ Era sega ni tei dina, era sega ni kaburaki dina, sa sega ni tei sobu dina ki na qele na wakadra; ka sa uvuci ira walega ko koya, a ra sa malai, ia na covulaca ena kauti ira tani me vaka na qa ni sila.

²⁵ Ia dou na qai vakatauvatani au kei cei, se me keirau vakatautauvatataki kei cei? sa kaya ko Koya na Yalosavasava.

²⁶ Dou ta cake, ka rai yani: Ko cei ka bulia na ka oqori? Ko koya sa kauta vakamataivalu mai na kedrai vavakoso, ka sa kacivi ira kecega e na yacadra; ka ni sa levu na nona kaukauwa, ka sa daugumatua sara, sa sega e dua sa yali.

²⁷ A cava ko sa vosa kina, ko iko Jekope, ka mo kaya, ko iko Isireli, “Sa vuni tu na noqu sala vei Jiova, kei na noqu dodonu sa sega ni kauwaitaka na noqu Kalou?”

²⁸ Ko sa sega beka ni kila? Ko sa sega ni rogoca? Sa Kalou ka tawa mudu ko Jiova, ko koya ka bulia nai yalayala kei vuravura. Ena sega ni malumalumu se oca ko koya; ka sa sega ni dikevi rawa na nona vuku.

²⁹ Sa dausolia na kaukauwa vei ira era sa malumalumu, ia ena vakalevutaka na kaukauwa vei ira era sa sega ni gumatua rawa.

³⁰ Io, era na malumalumu ka oca ga na cauravou, a ra na bale sara na tamata bula;

³¹ ia ko ira era sa waraki Jiova era na vakaukauwataki tale, era na cabe cake me vaka era vakatabana vakaikeli, era na cici ka sega ni oca, era na lako tu ka sega ni malumalumu.