Aisea 37 - Ai Vola Tabu (Vakadewa Makawa Vakavoutaki 2021)

Sa Taro Vakasala vei Aisea ko Esekaia na Tui

¹ Ia ni sa rogoca ko Esekaia na tui, sa qai dresulaka na nona i sulu, ka ubi koya e nai sulu taga, ka la'ki curu ki na vale i Jiova.

² Ka sa talai Elaiakimi, ko koya sa lewa na vale levu, kei Sepina na vunivola, kei iratou sa qase vei ira na bete, ka ratou sa vakaisulu e nai sulu taga kivei Aisea na parofita na luve i Emosi.

³ A ratou sa kaya vua, “Sa kaya vakaoqo ko Esekaia, ‘Sa siga ni veivakararawataki oqo, kei na veivunauci, kei na vosaveivakacacataki; ni sa voleka ni sucu ko ira na gone, ka sega na kaukauwa me ra vakasucumi kina.

⁴ Ena rogoca beka ko Jiova na nomu Kalou na vosa kecega i Rapisake, ko koya sa tala mai ko tui Asiria na nona turaga me vosavakacacataka na Kalou bula, ka na sauma na vosa sa rogoca ko Jiova na nomu Kalou; o koya mo qai masu kina e na vukudra na lewe lailai era vo tiko.’ ”

⁵ Ka sa qai lako vei Aisea ko iratou nai talaki i Esekaia na tui.

⁶ A sa kaya vei iratou ko Aisea, “Dou kaya vakaoqo vua na nomudou turaga. ‘Sa vaka ko Jiova, Mo kakua ni rere e na vuku ni vosa ko sa rogoca, sa ratou vosavakacacataki au kina ko iratou na nona tamata na tui Asiria.

⁷ Raica, ka'u na liwavi koya e na cagi, ia ena rogoca ko koya e dua na rogorogo, ka na lesu yani ki na nona vanua; ia ka'u na vakabalei koya e nai seleiwau e na nona vanua.’ ”

⁸ Ka sa lesu yani ko Rapisake, a sa kunei tui Asiria ni sa vala tiko kei Lipina; ni sa rogoca eliu ko koya ni sa lako tani mai Lakisi.

⁹ Ka sa rogoca ko koya na tui ni sa kainaki e na vuku i Tiraka, na tui Eciopea, ka vaka, “Sa mai veivala kei iko ko koya.” Ia ni sa rogoca na ka oqo, sa qai tala tale eso na tamata vei Esekaia, ka kaya,

¹⁰ “Dou kaya vakaoqo vei Esekaia na tui Juta, ‘Me kakua ni vakaisini iko na nomu Kalou, ko koya ko sa vakararavi kina, ni sa kaya, Ena sega ni soli ko Jerusalemi ki na liga i tui Asiria.

¹¹ Raica, ko sa rogoca oti na ka era sa cakava na tui Asiria ki na veivanua kecega, ni ra sa vakarusa sara; ia ko na vakabulai beka ko iko?

¹² Era sa vakabula li ko ira na nodra kalou na veivanua ka vakarusa ko iratou na noqu qase, io ko Kosani, kei Arani, kei Resefi, kei ira na luve i Iteni era tiko mai Tilasari?

¹³ Sa evei ko tui Emaci, kei tui Apati, kei na tui ni koro ko Sifaveimi, kei Ena, kei Iva?’ ”

Na Masu i Esekaia

¹⁴ A sa taura nai vola ko Esekaia mai na ligadratou nai talaki, ka wilika; ka sa lako cake ko Esekaia ki na vale i Jiova, ka sa tevuka e na mata i Jiova.

¹⁵ Ka sa qai masu ko Esekaia e na mata i Jiova, ka kaya,

¹⁶ “Kemuni Jiova-ni-lewevuqa, na neimami Kalou na Isireli, koi kemuni sa tiko e na tadrua ni jerupi, sai kemuni na Kalou duaduaga, ni veimatanitu kecega kei vuravura; koi kemuni ka buli lomalagi kei vuravura.

¹⁷ Kemuni Jiova, mo ni vakalakala daligamuni, ka vakarorogo. Kemuni Jiova, mo ni rai mada mai, ka raica; ka rogoca na vosa i Senakaripi, ko koya sa talatala mai me vosavakacacataka na Kalou bula.

¹⁸ Sa dina sara, i Jiova, ni ko iratou na tui Asiria eratou sa vakarusa na lewe ni veivanua kei na nodra vanua,

¹⁹ ka ratou sa biuta ki na bukawaqa na nodra kalou. Ni ra sa sega ni kalou na veika oqo, na cakacaka walega ni liga ni tamata—na kau kei na vatu—ka ra sa vakarusai kina.

²⁰ Ia oqo, Jiova na neimami Kalou, mo ni vakabulai keimami mada mai na ligana, me kila kina na veimatanitu kecega e vuravura ni sai kemuni duaduaga ko Jiova na Kalou dina.”

Nai Tukutuku i Aisea ki Vua na Tui

²¹ A sa talaki vei Esekaia ko Aisea na luve i Emosi, ka kaya: “Sa vosa vakaoqo ko Jiova, na noda Kalou na Isireli: Me vaka ni ko sa masu vei au e na vuku i Senakaripi na tui Asiria,

²² oqo na vosa sa tukuna ko Jiova e na vukuna: “ ‘Na goneyalewa na luve i Saioni sa beci iko, ka dredrevaki iko ko koya; sa kurea vei iko na uluna mai dakumu na goneyalewa ni Jerusalemi.

²³ “ ‘Ko sa vosavakacacataki cei, ka vakalialia? Ia vei cei beka ko sa tabalaka na domomu, ka ta cake kina e na matamu ca? Vei Koya ga na Yalosavasava i Isireli!

²⁴ Ko sa vosavakacacataki koya na Turaga e na gusudra na nomu talai, ni ko sa kaya, E na noqu qiqi-ni-valu e vuqa, ka'u sa cabeta na kena cecere ni veiulunivanua, ki na yasa i Lepanoni; ia ka'u na taya sobu na kena veisitari balabalavu, kei na kena veidamanu vinaka; ka'u na yacova na kenai yalayala cecere sara, kei na kena veikau bulabula.

²⁵ Ka'u sa kelia ka gunuva na wai, ka vakadiva e na qeteqete ni yavaqu na uciwai kecega ni Ijipita.

²⁶ “ ‘Ko sa sega beka ni rogoca ni'u sa nakita makawa sara oqo? Ka ni'u a lesia e na gauna mai liu na veika oqo ka'u sa qai vakayacora, ka na yaco kina mo cakava me bukebuke walega na veikoro sa vakabai.

²⁷ O koya era sa malumalumu kina na lewena, era sa yalolailai ka taqaya; era sa vaka na co ni vanua kei na co bulabula sa qai rovu, na co mai na dela ni vale, kei na sila sa malai ni sa sega ni tubu cake.

²⁸ “ ‘Ia ka'u sa kila na nomu tiko, kei na nomu curu ki tuba, kei na nomu curu ki loma, kei na nomu cudru levu vei au.

²⁹ Ia ni sa lako cake mai ki na daligaqu na nomu cudru vei au, kei na nomu viavialevu, ka'u na qai qilata kina na ucumu e na noqu i qila, ka vakaciqira na noqu i tarovi ki na gusumu; ia ka'u na vakasukai iko yani e na sala ko a lako mai kina.’

³⁰ “Ia oqo na kenai vakadinadina vei iko, Dou na kania e na yabaki oqo na ka sa tubu walega; e na kenai karua ni yabaki dou na kania na ka sa tubu walega mai kina. Ia e na kenai katolu ni yabaki dou kaburaka, ka tamusuka, ka tea eso na loga-ni-vaini, ka kania na vuana.

³¹ Ia ko ira na vo-ni-bula e na vale i Juta era na tei sobu tale, ka vua ki cake.

³² Ni na lako tani mai Jerusalemi na vo-ni-bula, kei ira era dro bula mai na Ulunivanua ko Saioni. Ena rawata na ka oqo na lomakatakata i Jiova-ni-lewevuqa.

³³ “O koya sa kaya kina vakaoqo ko Jiova e na vuku i tui Asiria, Ena sega ni curu mai ki na koro oqo, se vanataka kina e dua na gasau, se mai tu kina vakaisasabai, se viri suva kina.

³⁴ Na sala sa lako mai kina, ena lesu tale kina, ka na sega ni curu ki na koro oqo, sa kaya ko Jiova.

³⁵ Ia ka'u na vakaruruga na koro oqo me'u vakabula e na vukuqu, e na vuku talega i Tevita na noqu tamata.”

Na Vakadrukai kei na Mate i Senakaripi

³⁶ Ka sa lako yani na agilosi i Jiova, ka yavita e na nodra i tikotiko ni valu na kai Asiria e dua na drau ka walusagavulu ka lima na udolu. Ia ni ra sa sou e na mataka, raica, era sa mate sara kecega.

³⁷ A sa lesu tani ko Senakaripi na tui Asiria, ka la'ki tiko mai Ninive.

³⁸ Ia ni sa soro tiko e na bure i Nisiroki na nona kalou, erau sa vakamatei koya e nai seleiwau koi rau na luvena ko Etirameleki kei Saresa, ka rau sa dro bula ki na vanua ko Aminia. Sa qai buli me tui ko Esa-atoni na luvena, me kenai sosomi.