Aisea 35 - Ai Vola Tabu (Vakadewa Makawa Vakavoutaki 2021)

Na Nodra Vakalesui ki Saioni na Vakabulai

¹ Ena reki e na vuku ni ka oqo na vanua lala kei na vanua mamaca; ia na vanua dravuisiga ena marau, ka se me vaka na rosi.

² Ena se ka beta, ena reki talega, ka na marau ka ia na sere. Ena soli kina nai ukuuku vaka-Lepanoni, ka na lagilagi vakataki Kameli kei Saroni. Era na raica nai ukuuku i Jiova, kei na cecere ni noda Kalou.

³ Dou vakaukauwataka na ligadra era malumalumu, ka vakataudeitaka na durudra sa sautaninini.

⁴ Dou kaya vei ira era yalolailai, “Dou kaukauwa, dou kakua ni rere! Raica na nomudou Kalou. Ena yaco mai na veisausaumi, na veisausaumi sa ia na Kalou; ena lako mai ko koya ka vakabulai kemudou.”

⁵ Ena qai rai na matadra na mataboko, ka rogo na daligadra na didivara.

⁶ Ena qai ladelade na lokiloki me vaka na me kila, ka sere na yamedra na galu. Ni na vure cake mai na wai e na vanua lala, kei na uciwai e na vanua dravuisiga.

⁷ Ia na nuku kata ena yaco me drano, kei na qele mamaca mei vurevure ni wai; na nodra tikina na wolifa, era daukoto kina, ena vanua veigasau ka veikuta.

⁸ Ia ena tu e kea e dua na sala cecere, ka na vakatokai Na Sala Tabu; ena sega ni lakova e dua sa sega ni savasava, ena lako vata ko Koya kei ira era sa muria na sala, ia ko ira na tamata sesewa era na sega ni lako sese kina.

⁹ Ena sega kina e dua na laione, se dua na manumanu daukata me cabeta, se me kune kina; ko ira ga era sa vakabulai era na lako voli kina.

¹⁰ Ia ko ira sa vakabula ko Jiova era na lesu mai, ka tadu mai ki Saioni ka sere lako; ena nodra i sala na reki tawa mudu; era na taukena na reki kei na marau, ka na dro tani yani na rarawa kei na tagi.