Aisea 33 - Ai Vola Tabu (Vakadewa Makawa Vakavoutaki 2021)

A Masu ni Kere Veivuke

¹ Ena ca ko iko sa dauvakacaca, ia ko a sega ni vakacacani; ko iko talega sa dauveivakaisini, a ra a sega ni vakaisini iko! Ni sa oti na nomu vakacaca, ko na qai vakacacani; ni sa oti na nomu veivakaisini, era na qai vakaisini iko.

² Kemuni Jiova, mo ni lomani keimami mai; keimami sa wawa tiko vei kemuni. Mo ni ligai keimami mada e na veimataka, ia mo ni neimami vakabula e na gauna ni rarawa.

³ Ni sa rogo na ue, era dro na tamata; ni kemuni sa tucake mai, era sa veiseyaki na veimatanitu.

⁴ Ia na nomudou i toki-ni-valu ena kumuni me vaka sa daukumuna na banuve; me vaka na nodra veiladeyaki na vodre ena ladeva vakakina na ka oqori.

⁵ Sa cecere ko Jiova, ni sa tiko mai cake ko koya; sa vakasinaiti Saioni ko koya e na lewa kei na cakacaka dodonu;

⁶ ia ena vakataudeitaka na nomu gauna na vuku kei na yalomatua kei na veivakabulai levu; a rerevaki Jiova, sa nona i yau.

⁷ Raica, ko ira na nodra qaqa era sa kaila e tautuba; era sa tagi vakalevu ko ira na mata ni sautu.

⁸ Sa lala na salatu, sa sega e lakova. Sa voroka ko koya na veidinadinati, sa beca na kena vosa ni yalayala, sa sega ni doka e dua na tamata.

⁹ Sa tagi na vanua, sa ceguoca; sa madua ko Lepanoni, ka sa malai yani; sa vaka na vanua dravuisiga ko Saroni; a sa vakamiraka na drauna ko Pasani kei Kameli.

Sa Vunauci Ira na Meca ko Jiova

¹⁰ “Oqo ka'u sa qai tucake,” sa kaya ko Jiova, “oqo ka'u na sa qai vakalevulevui; oqo ka'u na sa qai vakaceceretaki au.

¹¹ Dou na kunekunetaka na qa ni sila, dou na vakasucuma na vu-ni-sila; a nomudou i cegu, me vaka na bukawaqa, ena kati kemudou.

¹² Ia na veimataqali, era na vaka na lovo ni lase; me vaka na kau vakavotona sa ta era na kama e na bukawaqa.”

¹³ Koi kemudou sa tiko vakayawa, dou rogoca na ka ka'u a cakava; kei kemudou sa tiko voleka, dou vakatakila na noqu kaukauwa.

¹⁴ Sa rere mai Saioni ko ira nai valavala ca; sa sautaninini ko ira na dauveivakaisini. “Ko cei vei keda me na tiko e na bukawaqa daukana voli? Ko cei vei keda me na tiko e na bukawaqa ka tawa mudu?”

¹⁵ Ko koya ga sa dodonu na nona i lakolako, ka sa vosataka na ka dodonu; ko koya sa cata nai yau sa kovei, ka sa bese na ligana ni taura nai solisoli ni veivaqumi, ka sa tabonaka na daligana mai nai rogorogo ni vakadave-dra, ka sa bobo na matana me kakua ni raica na ca,

¹⁶ ko koya oqo ena tiko e na tikina cecere; na nona vale kaukauwa sai koya na bai vatu ni vakaruru; ena soli vua na kena kakana, ia ena sega ni di na mena wai.

Na Nona Vanua na Tui Cecere

¹⁷ Na matamu ena raici koya na tui, ni sa uku cavu tu; ka na kunea na vanua sa yawa sara.

¹⁸ A lomamu ena qai vakananuma ki na ka ni veivakarerei, ka kaya, “Sa evei na vunivola? Sa evei na dauniyau? Sa evei na dauwilika na veivale cecere?”

¹⁹ Ko na sega ni kunea tale na kawa tamata matadei ko ya, na kawa tamata daudredre ni kilai na nodra vosa, na gusu daukaka sa sega ni macala.

²⁰ Mo vakaraici Saioni, na koro ni noda solevu tabu! A matamu ena kunei Jerusalemi, nai tikotiko vinaka, na valelaca sa sega ni kau tani; a kenai latu ena sega sara ni cavu tale, se cavuka e dua na kena dali.

²¹ Ia ko Jiova ka vakaiukuuku ena yaco vei keda mai kea me vaka na vanua ni veiuciwai raba kei na soniwai, ka na sega ni vocetaki kina e dua na waqa, ena sega talega e dua na waqa vakaturaga me lako voli kina.

²² Io ko Jiova sa noda turaga-ni-lewa, ko Jiova sa noda vu ni lawa, ko Jiova sa noda tui; o koya ga ena vakabulai keda.

²³ Sa savu walega na nomu dali; sa dredre ni vakaduria nai vana, era sega ni vakarewataka rawa na laca. Sa qai votai nai yau levu sa tauri; era tokitaka ko ira na lokiloki.

²⁴ Ia na lewe ni koro ena sega ni kaya, “Ka'u sa tauvi mate;” o ira na tamata era sa tiko kina ena vosoti na nodra i valavala ca.