Aisea 31 - Ai Vola Tabu (Vakadewa Makawa Vakavoutaki 2021)

Ena Vakarurugi Jerusalemi na Kalou

¹ Ena ca ko ira era sa lako sobu ki Ijipita me kerea na veivuke; ka vakararavi ki na ose kei na qiqi-ni-valu, ni ra sa ka levu; kei ira na tamata i valu e dauvodo ose, ni ra sa kaukauwa sara; a ra sa sega ni golevi Koya na Yalosavasava ni Isireli, a ra sa sega ni qaravi Jiova!

² Ia ka sa vuku talega ko Koya ka na vakayacora na ca, ena sega ni vakasuka lesu na nona vosa; ia ena tucake ka valuta na vale ni tamata i valavala ca, kei na nodra dauniveivuke na daucaka cala.

³ Ia na kai Ijipita era sa tamata ga, ka sega ni Kalou; a nodra ose talega sa vakayago, ka sega ni vakayalo. Ni sa qai dodoka yani na ligana ko Jiova, ena qai bale ko koya sa veivuke, kei koya talega sa vukei, ka ra na bale vata kecega.

⁴ Ni sa kaya vakaoqo vei au ko Jiova, “Me vaka na laione se na luve ni laione sa kudruva na kena e taura, ka—ni sa kailavaki mai nai vakatawa e vuqa me mai vala kaya— sa sega ni rere mai na domo ni nodra kaikaila se vakamalumalumu e na vuku ni nodra vakosakosa, ena lako sobu mai kina ko Jiova-ni-lewevuqa me mai vala e na vuku ni Ulunivanua ko Saioni kei na kena ulu-ni-koro.

⁵ Me vaka na manumanu vuka sa vakaruruga na luvena ena vakarurugi Jerusalemi vakakina ko Jiova-ni-lewevuqa; ena vakaruruga ka vakabula, ena vakavoca ka vueta.”

⁶ Dou lesu mai vei koya era sa vuki tani vakalevu kina na Isireli.

⁷ Ni ra na dui biuta na tamata yadua e na siga ko ya na nona matakau siliva, kei na nona matakau koula, na ka ka cakava na ligamudou dou sa cala kina.

⁸ “Ena qai bale ko Asiria ka segai e na nona i seleiwau na qaqa; ena kani koya ga nai seleiwau ka sega ni nona e dua na tamata; ena dro tani ga ko koya mai nai seleiwau, ia ko ira na nona cauravou era na rawai.

⁹ A nona koro-ni-valu talega ena biuta ki muri ko koya ni sa rere; a kena turaga era na rerevaka na kuila,” sa kaya ko Jiova, ko koya sa tu mai Saioni na nona bukawaqa, kei na nona lovo mai Jerusalemi.