Aisea 23 - Ai Vola Tabu (Vakadewa Makawa Vakavoutaki 2021)

Ai Tukutuku me Baleti Taia

¹ Na vosa ni parofisai bibi me baleti Taia. Dou qoqolou, na waqa ni Tasisi, ni sa vakalalataki; sa sega na vale, sa sega e dua me curu kina; sa tukuni vei ira mai na vanua ko Kitimi.

² Dou tiko lo, na lewe ni yanuyanu, ko ira na dauveivoli ni Saitoni, era dausokota na wasawasa ko ira na nomuni talai.

³ Ia na sila ni Siori mai na bati ni wai levu, na veika e tamusuki mai na uciwai, oqori ka tubu kina na nona i yau; ka sa nodra koro ni dauveivoli na veimatanitu ko koya.

⁴ Mo madua, Saitoni, ni sa vosa na wasawasa, io na vu ni kena kaukauwa na wasawasa, ka sa kaya, “Au sa sega ni taratara, au sa sega ni vakasucu, au sa sega ni susuga na cauravou, se vakavulica na goneyalewa.”

⁵ Ni sa tukuni ki Ijipita, era na qai rarawa e na vuku ni rogorogo kei Taia.

⁶ Dou lako ki tai kadua ki Tasisi— dou qoqolou, na lewe ni yanuyanu!

⁷ Oqo li na nomudou koro sa daumarau, ko koya ka tubu e na gauna eliu sara, ka sa dau kauti koya vakayawa na yavana me tiko vulagi?

⁸ Ko cei sa lewa oqo me yacovi Taia na dauveibuli, ka ra turaga na nona dauveivoli, ka daurogo e vuravura ko ira na nona tamata dauveivoli?

⁹ Sa nakita oqo ko Jiova-ni-lewevuqa— me muduka na dokadoka ni veika lagilagi kecega, ka vakamadualaki ira kecega sa daudokai e vuravura.

¹⁰ Mo vuabale e nomu vanua me vaka na uciwai, ko iko na goneyalewa ni Tasisi; sa sega tale na kenai tarovi.

¹¹ Sa daudodoka yani na ligana ko koya ki na wasawasa, ka dauyavalata na veimatanitu; sa vakarota ko Jiova e na vuku i Kenani, me vakarusa na kena veikoro kaukauwa.

¹² Ka sa kaya, “Mo kakua tale ni marau, ko iko na goneyalewa sa vaqasei, na luve i Saitoni; mo cavu tu ka lako yani ki Saipurusi— ia ko na sega talega ni vakacegu mai kea.”

¹³ Raica na nodra vanua na kai Kalitia! Na mataqali tamata oqori ka sega ga eliu; ka sa qai tauyavutaka ko Asiria me nodra na manumanu kila; ka ra sa tara na kena veivale cecere, ka vakaduria na kena veivale vakaturaga; ka sa vakarusa ko koya.

¹⁴ Dou qoqolou, na waqa ni Tasisi, ni sa rusa na nomudou koro kaukauwa.

¹⁵ Ia ena yaco e na siga ko ya, ena guileca ko Taia ka vitusagavulu na yabaki, me vaka na gauna ni matanitu e dua. Ni sa oti na yabaki e vitusagavulu, ena qai yaco ki Taia me vaka na kena meke na yalewa dautagane:

¹⁶ “Mo taura na api, la'ki volivolita na koro, ko iko na dautagane sa guilecavi! Qiriqiri vakavinaka ka lagata e vuqa na sere, mo vakananumi kina.”

¹⁷ Ia ni sa oti na yabaki e vitusagavulu, ena qai talevi Taia ko Jiova, ena qai lesu tale mai ko koya ki na nona i voli, ka me ia na dautagane kei na veimatanitu kecega e vuravura.

¹⁸ Ia na nona i yau kei na nona i voli ena tabu me nei Jiova; ena sega ni kumuni vata se maninitaki; ia na nona i yau ena nodra era sa tiko e na mata i Jiova, me ra kana ka mamau ka vakaisulu e na ka veiqati.