Aisea 22 - Ai Vola Tabu (Vakadewa Makawa Vakavoutaki 2021)

Ai Tukutuku me Baleti Jerusalemi

¹ Na vosa ni parofisai me baleta na buca ni raivotu. A cava mada sa tauvi iko, ni ko sa cabe cake kece ki na dela ni veivale?

² Ko iko sa dauyavala, na koro daumasa, na koro daumarau? Ko ira era baleti iko era sa sega ni bale e nai seleiwau, se mate e nai valu.

³ Ko ira kece na nomu turaga era sa dro vata mai na dakai-titi, era sa vauci. Ia ko ira kece era sa kune vei iko era sa vauci vata, era sa dro vakayawa.

⁴ O koya ka'u a kaya kina, “Dou rai tani vei au, ena ka rarawa na noqu tagi; dou kakua ni gu me vakacegui au, e na vuku ni kena vakacacani na goneyalewa ni noqu tamata.”

⁵ Ni sa siga ni kidroa, kei na veibuturaki, kei na taqaya, mai vua na Turaga ko Jiova-ni-lewevuqa e na buca ni raivotu, na siga ni basu bai, kei na tagi ki na ulunivanua.

⁶ A sa cola taga gasau ko ira na Ilama, e na qiqi-ni-valu, kei na tamata, kei na tamata sa vodo ose; ia ko ira na Kiri era sa ucuna nai sasabai mai na kena taga.

⁷ Ka sa yaco, ni sa oso na nomu veibuca vinaka e na qiqi-ni-valu, ka sa tuvai na tamata sa vodo ose vaka ki na matamata-ni-koro.

⁸ Ka sa kau tani na nodra i vakaruru na Juta. Ia ko a qai goleva e na siga ko ya nai yaragi mai na Vale-ni-veikau,

⁹ ka dou sa qai kunea na tiki ni bai ni koro i Tevita sa kabasu, ni sa vuqa; dou sa vakasoqona vata talega na wai ni drano e ra.

¹⁰ Dou sa wilika talega na veivale mai Jerusalemi, ka basuka sobu na veivale eso me vakaukauwataka kina na bai.

¹¹ Ia dou sa cakava nai keli-wai e na maliwa ni bai ruarua me tu kina na wai ni drano makawa. Ia dou sa sega ni golevi koya sa cakava, ka sega ni nanumi koya ka qisia eliu.

¹² Ia e na siga ko ya sa kacivi kemudou na Turaga ko Jiova-ni-lewevuqa mo dou mai tagi ka tagi yaso, ka tasi ulu, ka vakaisulu e nai sulu taga;

¹³ ia ka raica sa ia na reki kei na marau, na moku bulumakau kei na vakamate sipi, na kana manumanu kei na gunu waini. “Me tou kana ka gunu, ni da na mate e na mataka.”

¹⁴ Ia sa tukuna e daligaqu ko Jiova-ni-lewevuqa, “Ena sega sara ni vosoti nai valavala ca oqo ka yacova na nomudou mate,” sa kaya na Turaga, ko Jiova-ni-lewevuqa.

Ai Vakasala vei Sepina

¹⁵ Sa vaka na Turaga ko Jiova-ni-lewevuqa, “Mo lako, la'ki curu mada vua na dauniyau oqo, io vei Sepina, ko koya sa lewa na vale levu, ka kaya:

¹⁶ A cava ko sa mai cakava eke? Ia ko cei na kai nomu sa tiko eke, ni ko sa taya kina na nomu i bulubulu eke, me vaka e dua ka taya na nona i bulubulu e na delana, ka ceuta na nona i tikotiko e na uluvatu?

¹⁷ Raica, ko Jiova ena biuti iko tani sara, ko iko na tamata kaukauwa ka tabonaki iko vakaidina.

¹⁸ Ena vakamoici iko sara, ka rabotaki iko me vaka na ka momokiti ki na vanua rabailevu. Ia ko na mate kina, sa na kau talega kina na qiqi-vakaturaga ko sa dokai iko kina, ko iko ka vu ni veivakamaduataki e na vale ni nomu turaga!

¹⁹ Ia ka'u na vakasevi iko tani mai na nomu i tikotiko, ka vakasivoi iko mai na nomu cakacaka.

²⁰ Ia ena yaco e na siga ko ya, ka'u na kaciva na noqu tamata ko Elaiakimi na luve i Ilikaia,

²¹ ka vakaisulutaki koya e na nomu i sulu, ka vauci koya e na nomu i vau ni sulu, ka'u na lesi koya me lewa na ka ko sa lewa. Ia ena yaco ko koya me tamadra na kai Jerusalemi kei na vale i Juta.

²² Ia ka'u na tauca ki domona nai dola ni vale i Tevita; ena dolava ko koya, ka na sega e dua me sogota; ka sogota, ka na sega e dua me dolava.

²³ Ia ka'u na vakataudeitaki koya me vaka nai vako e na tikina sa dei sara; ena yaco talega mei tikotiko vakaturaga ka vakaiukuuku e na vale i tamana.

²⁴ A ra na rubeca vua nai ukuuku kecega ni vale i tamana, na gone kei na kawa, kei na bilo lalai kecega, mai na bilo ni gunu ka yacova na bilo ni takitaki.

²⁵ Sa kaya ko Jiova-ni-lewevuqa, Ena kau tani e na siga ko ya nai vako sa vakataudeitaki e na tikina sa dei sara, ena tamusuki ka lutu; ia nai yaya ka rube kina ena tamusuki, ni sa tukuna ko Jiova.”