Aisea 18 - Ai Vola Tabu (Vakadewa Makawa Vakavoutaki 2021)

Na Parofisai me Baleti Eciopea

¹ Ulei, na vanua sa vakatabana rorogo, sa koto yani e na tai kadua ni veiuciwai ni Eciopea,

² ka sa dauvakatadumata e wai, io e na waqa kuta e na dela ni wai. Dou lako, na mata totolo, ki na matanitu sa balabalavu ka yago lumilumisa, ki na lewe-ni-vanua sa rerevaki mai liu ka yacova na gauna oqo; ki na matanitu sa dauia na veivakarauti kei na veibuturaki, ka sa wasea na nodra vanua na veiuciwai!

³ Koi kemudou kecega na lewe i vuravura, dou raica, ni sa vakarewataka ko koya na kuila e na veiulunivanua; ia ni sa uvuca na davui ko koya, dou rogoca.

⁴ Ni sa vosa vakaoqo vei au ko Jiova, “Au na tiko ga, ka vakaraica e na noqu i tikotiko me vaka na katakata ni sa siga vinaka e na dela ni co, ka vaka na kabukabu e na vula i katakata.”

⁵ Ia ni sa sega ni cava mai na yabaki, ni sa kubu oti mai na vaini, ka sa vua vinaka mai na sena, ena qai tamusuka ko koya na tabana e nai sele, ka biuta tani na tabana lalai ka taya laivi.

⁶ Era na biu vata ki na manumanu vuka ni ulunivanua kei na manumanu kila ni vanua; ia na manumanu vuka ena kania e na vula i katakata, kei na manumanu kila kecega ni vanua e na vula i liliwa.

⁷ E na gauna ko ya ena kau mai nai cabocabo kivei Jiova mai na matanitu sa balabalavu ka yago lumilumisa, ia mai vei ira na lewe-ni-vanua sa rerevaki mai liu ka yacova na gauna oqo; mai na matanitu sa dauia na veivakarauti kei na veibuturaki, ka sa wasea na nodra vanua na veiuciwai, ki na yasana sa tiko kina na yaca i Jiova-ni-lewevuqa, ki na Ulunivanua ko Saioni.