Aisea 15 - Ai Vola Tabu (Vakadewa Makawa Vakavoutaki 2021)

Na Vosa ni Parofisai Bibi kei Moapi

¹ Oqo na vosa ni parofisai bibi kei Moapi. Ni sa vakarusai e na bogi ko Ari, sa vakanomodi ko Moapi, ni sa vakarusai e na bogi ko Kiri, sa vakadigagalu ko Moapi.

² Era sa cabe cake ki na burekalou, ki Taiponi talega ki na veiyasana cecere, me tagi; e dela i Nipo kei Metipa sa tagi yaso ko Moapi. Sa tasi na uludra kecega, sa tasi laivi na kumidra kecega.

³ E na nodra saqata ni koro era sulumaka nai sulu taga; era na qoqolou kecega e dela ni nodra veivale, e na nodra rara talega, ka tagi vakalevu sara.

⁴ Ia ena tagi ko Esiponi kei Elale, ena rogo yani ki Jeasa na domodrau; o koya oqo sa qoqolou kina nai valu i Moapi; sa rarawa na yalona e lomana.

⁵ Sa tagi na lomaqu e na vuku i Moapi; era sa dro ki Soa nai se, me vaka na luve ni bulumakau sa yabaki tolu. Era sa tagi lako ni ra sa cabe ki Luici, io e na sala ki Oroneimi era tabalaka na tagi ni veivakarusai;

⁶ ni sa di na wai ni Nimirimi; a sa malai na co, ka sa yali na buroro, sa sega na ka e bulabula.

⁷ Ia na ka era sa rawata kei na nodra i yaya, era sa kauta yani ki na tai kadua ni soniwai ni veiwilou.

⁸ Ni sa volivolita nai yalayala kei Moapi na kena tagi; sa rogo na kena qoqolou ki Ekileimi, ki Pieri-elimi talega.

⁹ Ni sa sinai e na dra na wai ni Timona; ni'u na kauta mai kivei Timona eso tale na ka— na laione me baleti ira na kai Moapi sa dro bula, vei ira na vo-ni-bula sa vo tiko e na vanua.