2 Tui 23 - Ai Vola Tabu (Vakadewa Makawa Vakavoutaki 2021)

Sa Tarova ko Josaia na Qaravi Kalou Tani

¹ A sa talaki ko koya na tui, ka sa soqoni vata vua ko ira kecega na qase ni Juta kei Jerusalemi.

² A sa lako cake ki na vale i Jiova ko koya na tui, kei ira vata kaya na Juta kecega kei ira kecega na kai Jerusalemi, kei ira na bete, kei ira na parofita, kei ira kecega na tamata, ko ira na lalai kei ira na turaga. A sa wilika e daligadra na vosa kecega ni Vola ni Veiyalayalati ka sa kune e na vale i Jiova.

³ A sa tu e nai tutu na tui ka kitaka na veiyalayalati e na mata i Jiova, ni ra na muri Jiova, ka vakabauta na nona i vakaro kei na nona vunau kei na nona i lesilesi e na lomadra taucoko, kei na yalodra taucoko, ni ra na vakataudeitaka talega na vosa ni veiyalayalati oqo sa volai e nai vola oqo. A ra sa vakaitavi e na veiyalayalati ko ira kecega na tamata.

⁴ A sa vakarota na tui vei Ilikaia na bete levu kei ira na bete lalai kei ira era vakatawa na katuba me ra kauta tani mai na vale i Jiova nai yaya kecega sa qaravi kina ko Peali, kei na kalouyalewa ni veikau, kei na kalokalo kecega ni lomalagi. A sa vakama mai nai bili i Jerusalemi e na veiwere mai Kitironi, ka sa kauta na kena dravusa ki Peceli.

⁵ A sa vakasivoi ira na bete vakatevoro ko koya, ko ira ka ra lesia na tui Juta me vakama na ka boi vinaka e na veitikina cecere e na veikoro ni Juta, kei na veivanua sa voliti Jerusalemi; o ira talega era vakama na ka boi vinaka vei Peali, ki na mata-ni-siga kei na vula, kei na kalokalo daulako kei na kalokalo kecega ni lomalagi.

⁶ A sa kauta tani na kalouyalewa ni veikau mai na vale i Jiova, ki taudaku i Jerusalemi, ki na uciwai ko Kitironi, ka vakama mai na uciwai ko Kitironi, ka vakavurumemeataka me tautauvata kei na kuvu-ni-qele, ka biuta na kena kuvu ki na dela ni nodra i bulubulu na luvedra na lewe-ni-vanua.

⁷ A sa basuraka sobu na nodra veivale era valavala vaka-Sotoma, ka sa tu voleka ki na vale i Jiova, ka sa talia mai kina ko ira na yalewa nai sulu eso ki na kalouyalewa ni veikau.

⁸ A sa kauta tani ko koya na bete kecega mai na veikoro e Juta, ka vakavelavelataka na veitikina cecere era a vakama kina na ka boi vinaka ko ira na bete, mai Kipa ka yaco ki Peri-sepa, ka basuraka sobu na veitikina cecere mai na matamata-ni-koro sa tu mai nai curucuru ki na matamata-ni-koro nei Josua, na turaga ni koro, ka sa tu ki nai mawi ni matamata-ni-koro.

⁹ Ia sa sega ni lako cake ko ira na bete ni veitikina cecere ki nai cabocabo-ni-soro i Jiova mai Jerusalemi, a ra sa kania ga na madrai sa sega ni vakaleveni e na kedra maliwa na wekadra.

¹⁰ A sa vakacacani Tofeci ko koya, mai na nodra buca na luve i Inomi, me kakua kina na tamata me vakacabora na luvena tagane se na luvena yalewa e loma ni bukawaqa vei Moloke.

¹¹ A sa kauta tani na ose era vakacabora ki na mata-ni-siga ko ira na tui Juta, mai nai curucuru ki na vale i Jiova, ka voleka ki na vale i Necani-meleki na mata, sa tu mai nai bili, ka sa vakama e na bukawaqa na qiqi sa vakacabori ki na mata-ni-siga.

¹² A sa basuraka sobu na tui nai cabocabo-ni-soro sa tu mai na dela ni taba loma-ni-vale e cake i Easi, na kena era a cakava na tui Juta, kei nai cabocabo-ni-soro ka cakava ko Manasa e na rara vakabai ruarua ni vale i Jiova, ka talaraka sobu mai kea, ka biuta na kedra kuvu ki na uciwai ko Kitironi.

¹³ Ia sa vakacacana na tui na veitikina cecere sa tu e na mata i Jerusalemi, ki na ceva ni ulunivanua ni veivakacalai ka cakava ko Solomoni na tui Isireli vei Asetoreci, na nodra ka vakasisila na kai Saitoni, vei Kimosi talega, na nodra ka vakasisila na Moapi, kei Milikomi, na nodra ka vakasisila na luve i Amoni.

¹⁴ A sa musumusuka ko koya na veimatakau, ka taya sobu na veikalou-yalewa ni veikau, ka vakasinaita na nodra tikina e na sui ni tamata.

¹⁵ Ia nai cabocabo-ni-soro mai Peceli, na tikina cecere ka cakava ko Jeropoama na luve i Nipati, o koya ka vakaivalavalacataki ira na Isireli—a sa basuraka sobu ko koya, ka vakama na tikina cecere, ka vakavurumemeataka me kuvu-ni-qele, ka vakama na kalouyalewa ni veikau.

¹⁶ Ni sa vuki ko Josaia, a sa kunea na veibulubulu sa tiko mai kea mai na ulunivanua. Ka sa talaki ko koya, ka kauta mai na sui mai na veibulubulu, ka vakama e na dela ni cabocabo-ni-soro, ka vaqeleqelewataka, me vaka na vosa i Jiova sa tukuna na tamata ni Kalou, o koya ka tukuna eliu na veika oqo.

¹⁷ A sa kaya ko koya, “Ai bulubulu cava oqori ka'u sa raica?” A ra sa kaya vua ko ira na lewe ni koro, “Nai bulubulu ni tamata ni Kalou, o koya ka lako mai Juta, ka tukuna na veika oqo ko sa qai cakava ki nai cabocabo-ni-soro mai Peceli.”

¹⁸ A sa kaya ko koya, “Dou laiva ga; me kakua na tamata me yavalata na nona sui.” A ra sa vakalaiva na nona sui, kei na sui ni parofita ka lako mai Samaria.

¹⁹ A sa biuta tani ko Josaia na veivale ni sokalou kece talega ni veitikina cecere e na veikoro mai Samaria, na kena era a cakava ko ira na tui Isireli me cudru kina ko Jiova, ka sa kitaka kina me vaka na ka kecega ka kitaka ko koya mai Peceli.

²⁰ A sa vakamatei ira kecega na bete ni veitikina cecere, ka tiko mai kea, e na dela ni veicabocabo-ni-soro, ka vakama e deladra na sui ni tamata; a sa lesu tale ki Jerusalemi.

Vakaroti me Qaravi na Solevu ni Lako-sivia

²¹ A sa vakaroti ira na tamata kecega na tui, ka kaya, “Dou ia na solevu ni Lako-sivia vei Jiova na nomudou Kalou, me vaka sa volai e nai Vola ni Veiyalayalati oqo.”

²² Sa sega vakaidina ni caka e dua na solevu ni Lako-sivia me vakaoqo mai na nodra gauna na turaganilewa ka ra lewai ira na Isireli, se e nodra gauna kecega na tui Isireli, se na tui Juta;

²³ ia sa caka e Jerusalemi na solevu ni Lako-sivia oqo e na kenai katinikawalu ni yabaki i Josaia na tui.

Na Veiveisau Tale Eso ka Vakayacora ko Josaia

²⁴ Ia ko ira era sa daucurumi, kei ira era sa dauveinita, kei na veimatakau, kei na veika vakasisila era sa soro kina, kei na ka vakasisila kecega sa kune e na vanua nei Juta kei Jerusalemi, sa kauta tani ko Josaia, me vakataudeitaka kina na vosa ni vunau sa volai e nai vola sa kunea ko Ilikaia na bete e na vale i Jiova.

²⁵ A sa sega e dua na tui ka bula eliu me sa tautauvata kaya, me golevi Jiova e na lomana taucoko, kei na yalona taucoko, kei na nona kaukauwa kece, me vaka na vunau taucoko i Mosese; a sa sega ni tubu e muri e dua me tautauvata kaya.

²⁶ Ia sa sega ni vuki tani ko Jiova mai na katakata ni nona cudru levu sa waqawaqa kina na nona cudru vei ira na Juta, e na vuku ni veivakacudrui kecega ka vakacudrui koya kina ko Manasa.

²⁷ A sa kaya ko Jiova, “Au na kauti ira tani talega na Juta mai na mataqu, me vaka ka'u a kauti ira tani na Isireli, ka biuta na koro oqo ko Jerusalemi, ka'u a digitaka, kei na vale ka'u a kaya kina, Ena tiko mai kina na yacaqu.”

Mate ko Josaia e nai Valu

²⁸ Ia na kena vo ni cakacaka i Josaia, kei na ka kecega sa kitaka ko koya, sa sega li ni volai e nai Vola ni Veika sa Caka e na Nodra Gauna na Tui Juta?

²⁹ E na nona gauna, a sa lako cake ko Fero-niko na tui Ijipita me veivala kei tui Asiria mai na uciwai ko Uferetisi. A sa la'ki vala kaya ko Josaia na tui; ia ni sa raici koya ko Fero-niko, a sa vakamatei koya mai Mekito.

³⁰ A sa vakavodoki koya mai Mekito ko iratou na nona tamata ni sa mate, ka kauta ki Jerusalemi, ka buluta e na nona i bulubulu. Ia era sa kauti Jioaasi na luve i Josaia, ka lumuti koya, ko ira na lewe-ni-vanua, ka buli koya me tui, mei sosomi kei tamana.

Sa Tui Juta ko Jioaasi

³¹ Sa ruasagavulu-ka-tolu na yabaki i Jioaasi ni sa buli me tui, ka sa lewa tiko mai Jerusalemi ka vula tolu. Ia na yaca i tinana ko Emutali, na luve i Jeremaia mai Lipina.

³² A sa daucaka ca ko koya e na mata i Jiova, me vaka na ka kecega ka cakava ko ira na nona qase.

³³ A sa vesuki koya ko Fero-niko mai Ripila, e na vanua ko Emaci, ka me kakua ni tui tiko mai Jerusalemi; ka lavaka vei ira na lewe-ni-vanua e dua na drau na taledi siliva, ka dua na taledi koula.

³⁴ A sa buli Elaiakimi na luve i Josaia ko Fero-niko me tui, mei sosomi kei Josaia na tamana, ka vukica na yacana me ko Jioiakimi, ka kauti Jioaasi tani. A sa lako ko koya ki Ijipita, ka mate kina.

³⁵ A sa solia na siliva kei na koula vei Fero ko Jioiakimi; ia ka sa lavaka ki na vanua nai vakacavacava, me soli nai lavo me vaka na vosa i Fero. Sa lavaka ko koya na siliva kei na koula vei ira na lewe-ni-vanua, me vaka era dui rawata, me solia kina vei Fero-niko.

Sa Tui Juta ko Jioiakimi

³⁶ Sa ruasagavulu ka lima na yabaki i Jioiakimi ni sa buli me tui, a sa lewa tiko mai Jerusalemi ka yabaki tinikadua. Ia na yaca i tinana ko Siputa, na luve i Petaia na kai Ruma.

³⁷ A sa daucaka ca ko koya e na mata i Jiova, me vaka na ka kecega era cakava ko ira na nona qase.