2 Tui 2 - Ai Vola Tabu (Vakadewa Makawa Vakavoutaki 2021)

Sa Kau Cake ki Lomalagi ko Ilaijia

¹ A sa yaco ni sa voleka ni kauti Ilaijia cake ki lomalagi ko Jiova e na covulaca, erau a lesu tiko mai Kilikali ko Ilaijia kei Ilaisa.

² A sa kaya vei Ilaisa ko Ilaijia, “Mo tiko mada ga eke; ni sa talai au ki Peceli ko Jiova.” A sa kaya ko Ilaisa, “Me vaka sa bula ko Jiova, ka sa bula na yalomu, ka'u na sega ni laivi iko.” A rau sa lako sobu ki Peceli.

³ Ia sa lako mai vei Ilaisa ko ira na luvedra na parofita mai Peceli, ka ra sa kaya vua, “O sa kila beka ni na kauti koya tani na nomu turaga mai vei iko edaidai ko Jiova?” A sa kaya ko koya, “Io, au sa kila; dou tiko lo ga.”

⁴ A sa kaya vua ko Ilaijia, “Ko iko Ilaisa, mo tiko mada ga eke, ni sa talai au ko Jiova ki Jeriko.” A sa kaya ko koya, “Me vaka sa bula ko Jiova, ka sa bula na yalomu, ka'u na sega ni laivi iko.” A rau sa lako ki Jeriko.

⁵ Ia sa toro vei Ilaisa ko ira na luvedra na parofita mai Jeriko, ka kaya vua, “O sa kila beka, ni na kauta tani na nomu turaga mai vei iko edaidai ko Jiova?” A sa kaya ko koya, “Io, au sa kila; dou tiko lo ga.”

⁶ A sa kaya vua ko Ilaijia, “Mo tiko mada ga eke; ni sa talai au ko Jiova ki na Joritani.” A sa kaya ko koya, “Me vaka sa bula ko Jiova, ka sa bula na yalomu, ka'u na sega ni laivi iko.” A rau sa lako ruarua yani.

⁷ Ia era lewe limasagavulu vei ira na luvedra na parofita era sa lako talega, ka ra la'ki tu vakayawa me ra vakararai, ni rau sa tucake ruarua tu e na bati ni Joritani.

⁸ A sa qai taura na nona i tutuvi ko Ilaijia, ka lobia, ka yavita na wai; a sa tawase vaka ka vaka na wai, ka rau sa lako kina ki tai kadua e na dela ni qele mamaca.

⁹ Ia ni rau sa yaco ki tai kadua, sa qai kaya vei Ilaisa ko Ilaijia, “Mo kerea mada na ka me'u cakava vei iko, ni'u se bera ni kau tani mai vei iko.” A sa kaya ko Ilaisa, “Kerekere me vakaruataki mada vei au nai votavota ni yalo sa tu vei iko.”

¹⁰ Ka sa kaya ko koya, “Sa ka dredre na ka ko sa kerea; ia, kevaka ko na raici au ni'u sa kau tani tiko mai vei iko, ena yaco vakakina vei iko; ia kevaka e segai, ena sega ni vakakina.”

¹¹ Ia ni rau sa lako tiko, ka veivosaki, raica, sa dua na qiqi bukawaqa ka so na ose bukawaqa sa tawasei rau, ka sa lako cake ki lomalagi ko Ilaijia e na covulaca.

¹² A sa raica tiko ko Ilaisa ka sa tagi cake, ka kaya, “I tamaqu, i tamaqu! Na nodra qiqi ni valu na Isireli kei ira na kena daunivodo ose!” A sa sega tale ni raici koya. A sa qai taura na nona i sulu ka dresulaka me rua na tikina.

Sa Sosomitaki Ilaijia ko Ilaisa

¹³ A sa taura cake nai tutuvi i Ilaijia ka lutu mai vua, ka lesu tale, ka la'ki tu e na bati ni Joritani.

¹⁴ A sa taura ko koya nai tutuvi i Ilaijia ka lutu mai vua, ka yavita kina na wai, ka sa kaya, “Sa evei ko Jiova, na Kalou i Ilaijia?” Ia ni sa yavita oti na wai, a sa tawase na wai vaka ka vaka, ka sa lako ki tai kadua ko Ilaisa.

¹⁵ Ia ni ra sa raica ko ira na luvedra na parofita era a tu me vakararai mai Jeriko, era sa kaya, “Sa sobu vei Ilaisa na yalo i Ilaijia.” A ra sa la'ki tavaki koya, ka ra sa cuva vua ki na qele.

¹⁶ A ra sa kaya vua, “Raica, sa tiko kei keitou na nomu tamata e le limasagavulu na tamata kaukauwa; me ra lako mada, ka vakasaqarai koya na nomu turaga; de kauti koya cake beka na Yalo i Jiova, ka biuti koya ki na dua na ulunivanua, se ki na dua na qakilo.” A sa kaya ko koya, “Sega, dou kakua ni talai ira.”

¹⁷ Ia ni ra sa cikevi koya tikoga ka sa la'ki madua kina ko koya, sa qai kaya, “Ia dou talai ira ga.” A ra sa tala na tamata e le limasagavulu; a ra sa vakasaqarai koya ka bogi tolu, ka sega ni kunea.

¹⁸ A ra sa lesu tale vua ni sa tiko ga mai Jeriko ko koya, ka sa kaya vei ira ko koya, “Au sa sega beka ni kaya vei kemudou, ‘Dou kakua ni lako’?”

Sa Cakava na Veika Mana ko Ilaisa

¹⁹ A sa kaya vei Ilaisa ko ira na lewe ni koro ko ya, “Raica mada, sa toka vinaka na koro oqo, me vaka sa raica tiko na noqu turaga; ia ka sa ca na wai, ka sa sega ni vuavuai na qele.”

²⁰ A sa kaya ko koya, “Dou kauta mai vei au e dua na tavaya vou, ka biuta kina na masima.” A ra sa kauta vua.

²¹ A sa lako yani ko koya ki nai vurevure ni wai, ka biuta kina na masima, ka kaya, “Sa vosa vakaoqo ko Jiova, Au sa vakavinakataka na wai oqo; ena sega tale mai kina e muri na mate se na tawa vuavuai.”

²² A sa vinaka mai na wai ka yacova na gauna oqo, me vaka na vosa ka sa cavuta ko Ilaisa.

²³ A sa lako cake mai kea ko koya ki Peceli; ia ni sa lako cake tiko e na sala, sa curu mai na koro eso na gone tagane, ka vakalialiai koya, ka kaya vua, “Mo lako cake, na ulu cou! Mo lako cake, na ulu cou!”

²⁴ A sa gole ki muri ko koya, ka raici ira, ka vatonaki ira e na yaca i Jiova. A sa lako yani e rua na bea yalewa mai na veikau ka rau basuraki ira e le vasagavulu-ka-rua na gone tagane.

²⁵ A sa lako tani mai kea ko koya ki na Ulunivanua ko Kameli, ka sa qai lesu mai kea ki Samaria.