फिलिप्पि 3 - Muria Far Western

परमेस्वरना मुने येताना योग्य मन्ता खरोय बुतो

¹ इदेक हे नावोर बायि-दादालोरक, निमाट प्रबुना संगते मन्तोरिट इन्जोर गिरदाते मन्ट! मिकुन असा-असा वने खोटाल करिहवालोरा बारेते कोटसोर मन्तोना ते नाकुन बाराय तकलिप आयो मति इद मिया सुरक्षा साटि मन्ता।

² नयकना लेहका व्यवहार किन्तोर ओर खराब बुतो केवालोर लोकुराताल निमाट हुशार मन्ट, इंगो, ओरक कतनातुन खोटाल रितिते समजेमास पिसाना साटि कतना जरुरि मन्ता इन्जोर विस्वास किस करहान्तोरक ओर लोकुराताल हुशार मन्ट।

³ बाक्याकि परमेस्वरना आत्माता मदतते परमेस्वरना आरादना किस केवल येसु मसिनिगा हजोरपण किस मेन्दुलता पोरो कियानाता बोदायि रिवाजते भरोसा केवोम ओरक खरोय कतना केवाल लोकुरक माक आन्दोम।

⁴ मति नना ते आपुना पोल्लोंगतिगा अनि मानेयना परंपराता वने भरोसा इर परान्तोना। इदाम बाताले पोल्लोते बोरे मानेयना पोल्लोंग अनि मानेयना परंपरातिगा भरोसा इराना इच्चा मन्वारते अदेन ओराताल वने पकाय हजोर योग्य ननाय मन्तोना।

⁵ बाक्याकि नना इब्रानि अवाल-बाबोताल बिन्यामिना गोत्रते जन्मेमातोर खरोय इस्रायेल जातितोर मन्तोना। यहुदि रितिरिवाज अनुसार आटवो दिया नावा कतना आतु। येसु मसिन स्विकार कियानाता मुने मूसाना सबोय नियमतुन पुरा रितिते पालन केवाल परीसि दलते मतोना।

⁶ असके परमेस्वरिन पकाय गिरदा कियाना साटि विचार किस मसिलोकुरा सभातुन पकाय तकलिप हिस मतोना। मूसाना नियमतुन मानेमायानाता द्वारा पुटता दारमिकताता अनुसार नना निरदोष मतोना।

⁷ मति बोव-बोव पोल्लोंग नावा फायदाता मतांग, अवेकुन नना मसिना कारण बेकार समजेमातोना।

⁸ अचोने आयो, नना नावोर प्रबु येसु मसिना बारेते आपुनतुन समजेमायानाता किमत दुसरो सबोयताल हजोर मन्ता इदाम पुन्ज नेन्डवनाह इव सबोय पोल्लोंगतुन वियार लेहका समजेमास ओव सबोयतुन तासिस नष्ट सहेन कितान।

⁹ अनि मूसाना नियमता द्वारा पुटता दारमिकता आयो मति येसु मसिनिगा मन्ता विस्वासता कारण परमेस्वरताल पुटता दारमिकताता अनुसार ओनासंगे उन्दि जिवाते मन्दाना साटि अनि,

¹⁰ येसु मसिन अनि ओना असा जिवेमायानाता लावतुन पुन्दाना,

¹¹ अनि येसु मसि पकाय तकलिप सहेन किस बदाम हातुर अदामे नना वने हास ओना हायानातिगा सहाभागि आस ओदेनते बदाम वने हातोरिगाडाल असा जिवेमायाना अनुभवतिगा अवका इन्जोर नना आशा किन्तोना।

आपुना नेमतिके वितसोर मन्ट

¹² नाकुन इव पोल्लोंग पुटिहच या नना परिपूर्ण आतान इदाम वने आयो मति इद लक्षसाटिय येसु मसि नाकुन आचतोर इन्जोर ओद लक्षतिके अवाना साटि मुने हन्दिला आतोना।

¹³ हे बायि-दादालोरक, नाकुन ओद लक्ष पुटिहतोना इन्जोर नना विचार केवोन। मति नना उन्दि पोल्लो किन्तोना आतांग पोल्लोंग मरिंगस नावा मुने मन्ता ओद लक्षतिगा अवान साटि नना मुने मुने दान्तोना।

¹⁴ अनि परमेस्वर येसु मसिना द्वारा नाकुन केयतुर ओद पकाय महत्वपुर्ण केयनाता अनुसार स्वरगतिगा नावा साटि इरता बक्षिस पुटान साटि ओद लक्षयतिके पकाय ध्यान किस वितसोर दान्तोना।

¹⁵ मावानिगाडाल बचोलोर पका मन्तोर ओर सबोय लोकुरक इदामे विचार किम्ट; अनि इदेना बारेते मिकुन बोदायि दुसरोय विचार मन्दार ते परमेस्वर अदेन वने बराबर समजेकिस हियानुर।

¹⁶ इन्जोर परमेस्वर बाताल मावा साटि तोहतुर अदेना अनुसार माक ताकिकाट।

¹⁷ हे बायि-दादालोरक, नना मियासंग ताकिन्दान अदामे निमाट वने नावा लेहका ताकाट। अनि मिया साटि माक करियस हिता नमुना अनुसार बराबर ताकान्तोरक ओराताल निमाट वने करियाट।

¹⁸ येसु मसि कुरुस पोरो हातुर ओद पोल्लोता वेयरि आस पकाय लोकुरक ताकान्तोर इन्जोर नना पकाय बेरा मिकुन इन्ज मतोना अदामे अव पोल्लोंग इदेक असा वने नना मिकुन किल्स किल्स इन्तोना।

¹⁹ आकरिते परमेस्वर ओरकुन नाश कियानुर, ओरा पोटाय ओरा परमेस्वर मन्ता, ओरक आपुना लज्जाता बुतोतिगा घमेन्ड किन्तोर अनि ओर केवल दरतिता चिजकतिगा चिन्ता किन्तोर।

²⁰ मति मावा खरोय जन्मभुमि ते स्वरगतिगा मन्ता, अनि अगडाल प्रबु येसु मसि मावा पिसवाल आस वायनुर इन्जोर माक पकाय इच्चाते हर हुळसोर मन्तोम।

²¹ ओना हजोर लावते सबोय चिजतुन आपुना अदिकारते किया परान्तोर ओना ओद लावता द्वारा मावा कमजोर मेन्दुलतुन बदलेकिस आपुना महिमाता मेन्दुल लेहका बनेहकियानुर।