फिलिप्पि 2 - Muria Far Western

मसिना नम्रता अनि महानता

¹ मसिनासंग पकाय सोबाय संबन्द मन्तोरिट इन्जोर निमाट हिमते मन्तोरिट। अनि मसिना मयाते मन्तोरिट इन्जोर मिकुन शान्ति मन्ता। अनि पवित्र आत्माता द्वारा मिक दुसरो लोकुरासंग संगत मन्ता। अनि मिया मया अनि दया दुसरो लोकुरक साटि मन्ता।

² इन्जोर निमाट उन्दि मन्दते, उन्दि मयाते, उन्दिय विचारते मन्ज अनि उन्दिय इच्चाते मन्दाना; इदाम नावा गिरदा पुरा किम्ट।

³ केवल आपुना फायदा साटि अनि आपुना हजोरपण साटि बारायि बुतो केमाट मति आपुनतुन हुळिलोर बनेमास दुसरोन आपुनताल हजोर समजेमास सबोय बुतोतुन किम्ट।

⁴ निमाट सबोय लोकुरक केवल आपुनाय भलायता बारेते आयो मति दुसरोना भलायता बारेते वने चिन्ता किम्ट।

⁵ मसि येसुना ओदे स्वभाव मियागा वने मनि।

⁶ ओर परमेस्वरना सबोय स्वभाव अनि गुणतोर मतोर ते वने परमेस्वरनासंग तुल्य मन्दाना ओद अदिकारतिगा मन्दान साटि विचार केवोर आस ओद अदिकारतुन तासितुर।

⁷ अनि ओर आपुनतुन दासता लेहका हुडलोर बनेकिस मानेय आस जनम आतुर अनि मानेय आस जिवेमातुर।

⁸ अनि ओर आपुनतुन हुडलोर बनेकितुर अनि परमेस्वरना आग्या मानेमास ओर हायाना सहेन कितुर। इंगो! कुरुस पोरोता पकाय तकलिपता हायाना सहनकियाना वनाह परमेस्वरना आग्यातुन इचोन मानेमायवाल आतुर।

⁹ इन्जोर परमेस्वर ओन सबोयताल पोरो पकाय हजोर बनेहकिस उपिहतुर अनि सबोय पोरोयतिगा पकाय हजोर पोरोय ओन हितुर।

¹⁰ इन्जोर स्वरगतिगा अनि दरतितिगा अनि दरतिता अडिय मन्तोरक ओरक सबोयलोरक येसुना पोरोयते मिन्डांग टेके किस,

¹¹ सबोय लोकुरक येसु मसिये प्रबु आन्दुर इन्जोर मानेमास बाबो परमेस्वरना हजोरपण साटि वळकिला पहाजे।

दुनियातिगा वेळिचि लेहका मान्जाट

¹² इन्जोर हे नावोर प्रिय गोतियालोरक, निमाट दरोज आग्या मानेमासोर वातोरिट। अनि अदामे इदेक नावा लक मन्ज वने निमाट आग्यातुन असा वने पकाय मानेमासोर मन्ट। अनि वरियसोर अनि कसिंगसोर सोबाय बुतो किसोर परमेस्वर मिकुन हिता पिसहानाता सोबाय गुणतुनतुन तोहाट।

¹³ बाक्याकि परमेस्वरे आपुना इच्चाते मिया मन्दिगा ओना गिरदाता पोल्लोंग कियान साटि इच्चा अनि लाव हिन्तोर।

^14-15 चतराल अनि हेकळ लोकुरा नडुम निमाट परमेस्वरना निरदोष अनि पवित्र बालकना गुण तोहिला पहाजे। इन्जोर बोदे बुतो कियानपा मन्दे बळबळेमास अनि विवादते केमाट। इदाम कियाकिट ते बोरे मिकुन दोष लावे केवोर आयनुर। चतराल अनि हेकळ लोकुरा नडुम अन्दकारता जागादिगा बदाम वेळिचि मान्जता अदाम लेहका निमाट परमेस्वरना पोल्लो वेहच इद दुनियातिगा ताकसोर मन्ट।

¹⁶ इदाम निमाट कियाकिट ते नना मिया साटि किता ओद सबोय बुतो अनि मेहनत बेकार हनो इन्जोर येसु मसिना असा मल्स वायाना दियांग इद हुळस मिया हजोरपण किया परका।

¹⁷ मति प्रबुना पोरोयता मिया विस्वासता कारण निमाट किता ओद सोबाता सेवा परमेस्वर साटि उन्दि बलिदान लेहका मन्ता। परमेस्वर साटि इमान्दारिते ओद सोबाय सेवा किसोर मन्दाना साटि नावा जिवा वने बलिदान हियाला पकाय गिरदा मन्तोना। अनि मिया सबोयसंग गिरदा किन्तोना।

¹⁸ इंगो, अदामे निमाट वने गिरदाते मन्ट अनि नावासंग गिरदा किम्ट।

तिमुथियुस पोलुसनासंगे सेवा किन्तोर

¹⁹ प्रबु येसुना इच्चा मन्दार ते नना तिमुथियुसिन मिया हेरे सान्डे लोहका इदाम विचार किन्तोना। ओर मलस वायानपा मिया बारेता गिरदाता पोल्लो वेहाना केन्जुन नाकुन शान्ति पुटि इन्जोर नना ओन लोहका।

²⁰ बाक्याकि खरोय मन्दते मिया मदत कियान साटि नाकुन तिमुथियुसिन लेहका दुसरो बोरे मानेय हिलेर।

²¹ बाक्याकि दुसरो सबोय लोकुरक केवल आप-आपुना सोबाय साटि बुतोते मन्तोर मति येसु मसिना इच्चाता अनुसार बोरे बुतो केवोर।

²² मति तिमुथियुसिन अदाम आयो; वरोर मरि आपुना बाबोनसंग बुतो किन्तोर लेहका ओर येसु मसिना सोबाता पोल्लो वेहान साटि नावासंग मेहनत किस ओना सोबाय स्वभावतुन तोहतोर इन्जोर निमाट वने पुन्तोरिट।

²³ इन्जोर नाकुन इगा जेहलतिगा बाताल आयार ओद समजेमास सान्डे ओन मिया हेरे लोहका इदाम नना आशा किन्तोना।

²⁴ अनि नना वने सान्डेय मिया हेरे वायका इन्जोर प्रबुनिगा नाकुन भरोसा मन्ता।

इप्पफ्रुदितुस

²⁵ मति येसु मसिना विस्वासते नावोर तमो लेहका मन्तोर, ओर मावा संगे बुतो केवाल, अनि परमेस्वरना सोबाता पोल्लोतुन वेहान साटि नावासंग वरोर सयनिक लेहका बुतो किन्तोर, नावा जरुरि पोल्लोतिगा नाकुन मदत कियान साटि निमाट लोहतोर दूत इपफ्रुदितुसतुन इदेक मिया हेरे वापस लोहाना जरुरि मन्ता इदाम नना समजेमान्तोना।

²⁶ बाक्याकि ओर निमाट सबोय लोकुरकुन हुळान साटि पकाय इच्चा किन्तोर अनि निमाट ओना बिमारिता बारेते केन्ज मतोरिट इन्जोर ओर पकाय चिन्ताते मन्तोर।

²⁷ इंगो, ओर हायनुर इचोन पकाय बिमारि ते मतोर ते वने परमेस्वर ओनागा दया कितुर अनि केवल ओनाय पोरो आयो मति नाकुन दुःखतिगा दुःख पुटमाकि इन्जोर नावागा वने दया कितुर।

²⁸ इन्जोर निमाट ओन असा मिलेमास गिरदा आम्ट अनि ओना बारेते नावा वने दुःख कमि आयि इन्जोर नना ओन मिया हेरे वापस लोहान साटि पकाय इच्चा किन्तोना।

²⁹ इन्जोर प्रबुनिगा पकाय गिरदाते निमाट ओन मानेमायकिट, अनि ओना लेहका परमेस्वरना सेवा केवालोर लोकुरकुन आदर किम्ट।

³⁰ बाक्याकि ओर आपुना जिवनते दोखा सहेनकिस मसिना बुतो किसोर किसोर हायनुर अचोन बिमारिते आतोर। इदाम निमाट नावा साटि किया परविट ओद सेवातुन ओर इगा नावा संगे मन्ज नाकुन हितुर।