फिलिप्पि 1 - Muria Far Western

अभिवादन

¹ मसि येसुनोर सेवा केवालोरक पोलुस अनि तिमुथियुस फिलिप्पि सहेरतिगा मन्वालोर मसि येसुनिगा विस्वास किन्तोरक सबोय पवित्र लोकुरक अनि मसिलोकुरा सभाता मुक्यालोरक अनि ओरकुन मदत केवालोर सेवक लोकुरकुन साटि इद पत्र कोटान्तोरोम।

² मावोर बाबो परमेस्वर अनि प्रबु येसु मसिनिकेडाल मिकुन दया-माया अनि सुख-शान्ति पुटसोर मनि।

पोलुसना प्रार्थना

^3-5 निमाट येसु मसिना सोबाता पोल्लोतुन केन्जुन विस्वास कितोरक ओद पहलेय दियाताल नेन्डवनाह निमाट सोबाता पोल्लो वेहान साटि नावासंग मतोरिट। इन्जोर नना मिकुन आलिहिस मावा परमेस्वरतुन दरोज धन्यवाद किन्तोना। अनि निमाट सबोय लोकुरक साटि गिरदाते प्रार्थना किसोर मन्तोना।

⁶ इन्जोर, परमेस्वर मियागा सोबाय सेवा कियाना सुरु कितोर, ओर अदेन येसु मसिना असा मल्स वायानावनाह कियानुर अनि ओना असा मल्स वायानाते ओद बुतो पुरा आयार इन्जोर नाकुन इद पोल्लोता बारेते भरोसा मन्ता।

⁷ इदाम मिया सबोय लोकुरा बारेते विचार कियाना नावा साटि बेस मन्ता, बाक्याकि नना मुनेटाल अनि इदेक जेहलदिगा मन्दान अनि येसु मसिना सोबाता पोल्लोता खरोयता बारेते इगा वळकाना बेरा अदेन विरोद केवालोराताल परमेस्वरना सोबाता पोल्लोता रक्षण कितान, अनि ओद बेरा निमाट सबोय लोकुरक नावासंग परमेस्वरना दयाते मुनेटाल अनि इदेक वने नावासंग मन्दिट इन्जोर निमाट सबोय लोकुरक नावा पकाय मायातोर मन्तोरिट।

⁸ येसु मसिना मयाते मिया सबोय लोकुरकुन हुळान साटि नावा पकाय इच्चा मन्ता इन्जोर परमेस्वर गवाह मन्तोर।

⁹ मिया मया परमेस्वरना बारेता खरोय ग्यान अनि सबोय परिस्थितिता खराब अनि खरोयतुन समजेमायान परिपूर्ण बुद्धितासंग असा वने पकाय बरसोरिंग हनि,

¹⁰ इदाम निमाट सोबाय अनि खराबतुन समजेमास दरोज भलायितुन आचोर हन्ट अनि मसिना असा मल्स वायाना दियांगवनाह आपुना जिवनते पवित्र बनेमास बोरायि मिकुन दोष हेमाकिर,

¹¹ अनि येसु मसिताल पुटिहच परमेस्वरना मुने येताना योग्य बुतोंगता सोबाय गुणक आपुना जिवनते येचुन आपुना बुतोते प्रगट कियाकिट अनि अदेनते परमेस्वरना महिमा अनि स्तुति आसोर मनि इन्जोर नना इद प्रार्थना किन्तोना।

पोलुस जेहलतिगा मन्तोर ते वने येसुना सोबाता पोल्लो वेहिन्तोर

¹² हे बायि-दादालोरक, नावागा बाताल आता अदेनतेय येसु मसिना सोबाता पोल्लो पकाय फयलेमात इन्जोर निमाट वने पुन्ट इदाम नावा इच्चा मन्ता।

¹³ अदामे रोमि देशतोर हजोर राजालना राजवाळाता सबोय सयनिक लोकुरक अनि पिसतोर सबोय लोकुरकनिगा नना मसिना सेवाता कारण जेहलते मन्तोना इन्जोर समजेमातोरक।

¹⁴ अनि विस्वासि लोकुरकनिकेडाल पकाय लोकुरक नना जेहलदिगा मन्तोना इद कारणते प्रबु येसुनिगा असा पकाय हिमत किस येसुना सोबाता पोल्लो बिना वरेते वेहान्तोरक।

¹⁵ ओरागाडाल हुचुलोर लोकुरक हेवा अनि होंगता कारणते मसिना सोबाता पोल्लो वेहान्तोर मति दुसरो हुचुलोर लोकुरक सोबाय विचारते येसु मसिना बारेता सन्देश हिन्तोर इन्जोर खरोय पोल्लो मन्ता।

¹⁶ मसिना सोबाता पोल्लोता रक्षण कियान साटि नना इगा जेहलतिगा मन्तोना इन्जोर पुन्जुन येर लोकुरक मयाते इदाम किन्तोरक।

¹⁷ मति दुसरो हुचुलोर लोकुरक खरोयतासंग आयो मति हेवा अनि होंगते आपुनतुन हजोर तोहाना साटि मसिना सन्देशतुन वेहान्तोरक। इदेनते नाकुन जेहलतिगा पकाय तकलिप हियान साटि ओरक विचार किन्तोर।

¹⁸ ते वने बाताल आतु? खराब मन्दे आयो या खरोय मन्दे आयो मति मसिना सन्देश ओरक वेहान्तोरक इदेनते नना गिरदा मन्तोना अनि असा गिरदा आसोर मनका।

¹⁹ इन्जोर मिया प्रार्थना अनि येसु मसिना आत्माता मदते नावा पिसहानाता कारण आयार इदाम नना खरोय पुन्तोना।

मसि साटि पोलुस दरोज जिवित मन्तोर

²⁰ अदाम नना बोदायि पोल्लोते लज्जा आयोन आयका। मति नना जिवित मनका या नना हायका ते वने येसु मसि नावा जिवनतिगा मुनेटाल लेहकाय इदेक वने हजोर आयनुर इन्जोर नना पकाय हिमते आशा किन्तोना।

²¹ बाक्याकि नना जिवित मनका ते मसि साटि जिवित मनका, अनि ओर नाकुन हव्कनुर ते नाकुन ओद फायदा मन्ता।

²² मति नावा मेन्दुलते इद दुनियातिगा जिवित मनका ते येसु मसिन साटि पकाय फायदाता बुतो किया परान्तोना इन्जोर इव रन्डास पोल्लोतिगाडाल बोद पोल्लो आचका इदाम नना पुनोन।

²³ जिवित मनका या हायका इव रन्डु पोल्लोता नडुम नना हिरकतोना। मति हासुन स्वरगतिगा मसिना हेरे मन्दाना इन्जोर नना पकाय इच्चा किन्तोना, खरोय इदे पकाय सोबाय मन्ता।

²⁴ मति इद दुनियाते मिया मदत साटि जिवित मन्दाना पकाय जरुरि मन्ता।

²⁵ इंगो! मिया सबोय लोकुरा विस्वासता बरसाना अनि मिकुन गिरदा पुटाना साटि नना असा वने मियासंग जिवित मनका इन्जोर नना खरोय पुन्तोना।

²⁶ इदाम नना असा मिया हेरे मल्स वायका असके मसि येसुनिगा मिया नावा बारेते हजोरपण पकाय बरसाना कारण आयार।

येसु मसिना सोबाता पोल्लो वेहान साटि पकाय बुतो किम्ट

^27-28 इदेक ते निमाट इद पोल्लोतिगा ध्यान किम्ट, निमाट येसु मसिना सोबाता पोल्लोता अनुसार जिवेमाम्ट। इदाम निमाट जिवेमायकिट ते नना मिया हेरे वास मिकुन हुळका या लक मन्जुन वने मिया बारेता गिरदाता पोल्लो केन्ज परान्तोना; अनि येसुना सोबाता पोल्लोता विरोद केवाल वेयरि लोकुरा मुने वने बोदे पोल्लोता बिना वरेते मन्ज निमाट सबोय लोकुरक उन्दि विचार अनि उन्दि जिवा आस सोबाता पोल्लोता विस्वास साटि पकायि बुतो किन्तोरिट इन्जोर नना केन्जिला परान्तोना। मिकुन परमेस्वरताल पुटता इद हिमत मिया पिसानाता अनि ओरा नाशता वने चिन्ह मन्ता।

²⁹ बाक्याकि केवल येसु मसिनिगा विस्वास कियाना आयो मति ओना साटि पकायि तकलिप सहेनकियाना वने मिकुन विशेषाल आशिरवाद मन्ता।

³⁰ अनि येसु मसिना साटि मन्ता नावा पकाय तकलिप निमाट हुळतोरिट। अनि नना इदेक वने अदामे मन्तोना इन्जोर निमाट केन्जतोरिट। अनि इदेक माक सबोय लोकुरकुन नावा लेहका पकाय तकलिपते मन्ता।