Hoore Haala
Dewtere Ester na haala ko waɗi wakkati laamu kaananke Jerjes. Jerjes oon na laaminoo leydi Persi hitaande 484 faa yotti nde 464 fadde Almasiihu e warude. Laamu Persi na yaajunoo sanne, gilla leydi Tirkii faro gorgal faa yaade leydi Indiya faro lettugal yotto leydi Etiyopi faro horɗoore.
Kaananke Nebukannejar halkiino leydi Yahuuda de yaari Yahuudiyankooɓe maccangaaku gilla duuɓi 100 fadde Jerjes e laamaade. Ammaa gaɗa duuɓi 70 maccangaaku maɓɓe, kaananke Koores hokki haajaaɓe yeccaade leydi muɓɓen fuu laawol koota Yahuuda fodde no winndiraa ley dewtere Isira. Ammaa Yahuudiyankooɓe heewɓe keddake leydi Persi e leyɗe goɗɗe ɗe Persi laamii dow muɓɓen. Ɓe nganaano maccuɓe katin, wooɗi du, woɓɓe maɓɓe laatake yimɓe tedduɓe ley laamu nguun. Woodii du lenyi banyuɗi Yahuudiyankooɓe de torri ɗum'en.
Dewtere Ester na fillanoo en kabaaru Yahuudiyankooɓe ɗiɗo: ɗum woni Mordakay e ɓii bappaanyo muuɗum Ester, heddinooɓe ley huɓeere Suus laamorde e Haman, Agaagiyanke ganyo lenyol Yahuuda, howruujo kaananke ɓurɗo fuu teddude ley suudu laamordu. Haman oon adiino aadi halkude lenyol Yahuudiyankooɓe fuu, ammaa kujje keewɗe ngaɗiri baawɗe Laamɗo de kaɗi anniya makko oon tabitinde.
Ley dewtere nde, en nji'an ko Mordakay e Ester fuu wanaa ko wo yimɓe ɓe ngalaa feloore, ammaa Joomiraaɗo nawtorake ɓe faa hisina lenyol Yahuudiyankooɓe halkere de hiɓɓina fodoore muuɗum dow neldude kisinoowo.
Ko woni ley dewtere nde
— Segilagol (1:1–2:23)
— Ceergal Wasti dee kaananke Jerjes (1:1-22)
— No Ester laatorii dee kaananke (2:1-23)
— No Mordakay hisiniri yonki kaananke (2:19-23)
— No Haman fodorii halkude Yahuudiyankooɓe (3:1-15)
— No Mordakay e Ester ndarorii faa ndanna lenyol muɓɓen (4:1–8:7)
— No Yahuudiyankooɓe keɓiri jaalorgal (9:1-19)
— No hiiro Purim tabintiniraa (9:20-31)
— No Mordakay laatorii neɗɗo tedduɗo sanne (10:1-3)
Dewtere Ester
