Tobit 8 - Fulfulde DC Bible

¹ Nde ɓe timmini nyaamgo e yargo, ɓe ngiɗi waalaago. Ɓe njahri suka nder suudu waaleteendu.

² Tobiyas siftori bolle Rafayel, o losi nder booro maako heŋre e ɓernde liiŋgu, o wa'ti ɗum dow ƴulɓere sarado.

³ Uureeŋgol liiŋgu farti ginnawol, ngol doggi nder henndu haa Misra. Rafayel tokki ngol, naŋngi ngol, haɓɓi ngol law bee callalluuji.

⁴ Nde saaro'en ndilli, ɓe maɓɓi suudu waaleteendu. Tobiyas ummi dow leeso, wi'i Saraatu: “Umma, debbo am giɗaaɗo, sey en ngaɗa do'a, en toro Jawmiraawo, o enɗa en, o ayna en.”

⁵ Saraatu ummi, ɓe puɗɗi toraago Jawmiraawo ngam o ayna ɓe. Ndaa ko Tobiyas wi'i nder tornde muuɗum: “Yettoore woodani ma, Allah mo kaakiraaɓe amin. Koo moy maŋgta innde ma nder zamanuuji garanɗi! Tagle haa asama e dow lesdi fuu maŋgte haa foroy!

⁶ A tagi Aadama, a hokki mo Hawwa, debbo maako, haa o walla mo e ɓe njogotira. Haa maɓɓe ɓiɓɓe Aadama fuu iwi. An wi'i: Ɗum wooɗaay haa neɗɗo wona feere mum. Mi waɗanan mo balloowo, pottananɗo mo.

⁷ Jonta, Jawmiraawo, naa ngam suuno mi ɓaŋi debbo oo, ammaa ngam gooŋgaaku heedi ma. Yurmin mo e yurminam min boo, waɗ min njooɗodo haa foroy haa min naywida.”

⁸ Ɓe ɗiɗo fuu ɓe mbi'i hawtaade: “Aamiina, aamiina!”

⁹ Nden ɓe mbaali.

¹⁰ Yeeso seɗɗa, Raguyel ummi, ewni huuwooɓe mum ngam wasgo yenaande, ngam o numi: “To suka maayi, yimɓe njalan, ɓe kuɗan min.”

¹¹ Nde ɓe timmini wasgo yenaande, Raguyel warti saare, o ewni debbo maako

¹² o wi'i mo: “Nel korɗo nder suudu waaleteendu, o laara to Tobiyas ɗon bee yoŋki. To o maayi en uwa mo, taa goɗɗo annda ɗum sam.”

¹³ Ɓe maatini korɗo, ɓe ndokki mo pittirlayel kuɓɓaaŋgel, ɓe maɓɓiti parewal. Korɗo nasti, tawi ɗiɗo fuu nder ɗoyŋgol tedduŋgol.

¹⁴ O wurti, o anndini ɓe: “O geeto, sey jam!”

¹⁵ Nden Raguyel yetti Allah mo asama, wi'i: “A maŋgteteeɗo Allah am, laaɓa-ɓerɗe'en fuu maŋgtete, maŋgtoore woodani ma haa foroy!

¹⁶ Mi ɗon maŋgte ngam a seyni yam masin, ko kulanmi laataaki. A yurmini min fodde yurmeende ma ɗuuɗnde.

¹⁷ A maŋgteteeɗo ngam a yurmini ɓiɓɓe ɗiɗo gorko e debbo wajjuɓe ɓe'e. Jawmiraawo, mo'an ɓe e aynu ɓe. Hebbin ngeendam maɓɓe bee seyo e mo'ere maaɗa.”

¹⁸ Raguyel wi'i huuwooɓe muuɗum, ɓe maɓɓa yenaande.

Nyaamduuji ɓaŋgal

¹⁹ Raguyel ƴami debbo muuɗum defana mo nyaamdu ɗuuɗndu. O suɓti na'i ɗiɗi, jawɗi nayi nder tokkere maako, defooɓe taki ɗum. Nii ɓe puɗɗiri taaskara ɓaŋgal.

²⁰ Raguyel ewni Tobiyas, wi'i mo: “Nder balɗe sappo e nayi, a dillataa. A jooɗoto haa saare am ngam nyaamgo e yargo, a seynan ɓiɗɗo am debbo, ngam o yarno boneeji ɗuuɗɗi!

²¹ Nden mi hokkete reeta maral am, a hooran ɗum jam haa baaba ma. To min maayi, min e debbo am, on keɓan reeta jawdi am luttundi boo. Tiɗɗin ɓernde ma, ɓiŋngel am! Min e debbo am Edna saaro'en maaɗa, min kaɓɓi amaana bee maaɗa e bee debbo ma diga jonta haa foroy. Tiɗɗin ɓernde ma, ɓiŋngel am!”