Mathæussa 15 - BÍBLIA

Reint og óreint

¹ Tá komu Farisearar og skriftlærdir úr Jerúsalem til Jesus og søgdu:

² «Hví bróta lærusveinar tínir gamlan fedranna sið? Tí at teir tváa sær ikki um hendurnar, tá ið teir fáa sær at eta.»

³ Men hann svaraði og segði við teir: «Hví bróta eisini tit Guðs boð fyri siðir tykkara?

⁴ Tí at Guð hevur boðið og sagt: «Æra faðir tín og móður tína» og «tann, ið biður ilt fyri faðir ella móður, honum er deyðin vísur.»

⁵ Men tit siga: «Tann, ið sigur við faðir sín ella móður sína: «Hetta, sum tú kundi havt hjálp í av mær, skal vera ein tempulgáva,» honum nýtist ikki at æra faðir sín ella móður sína.»

⁶ Og soleiðis hava tit avtikið Guðs lóg fyri siðir tykkara.

⁷ Tykkara falsarar! Beint hevur Jesaja profeterað um tykkum, tá ið hann segði:

⁸ «Hetta fólkið ærir meg við vørrunum; men hjarta teirra er langt burtur frá mær.

⁹ Men til einkis dýrka tey meg, tá ið tey læra lærdómir, ið eru mannaboð.»

¹⁰ Og hann kallaði mannamúgvurnar til sín og segði við tær: «Hoyrið og fatið!

¹¹ Ikki tað, ið fer inn í munnin, ger menniskjuna óreina; men tað, ið fer út úr munninum, tað ger menniskjuna óreina.»

¹² Tá komu lærusveinarnir til hansara og søgdu við hann: «Veitst tú, at Fariseararnir tóku sær ilt av tí, tá ið teir hoyrdu hesa talu?»

¹³ Men hann svaraði og segði: «Ein og hvør vøkstur, sum himmalski faðir mín ikki hevur sett niður, skal verða slitin upp við rót.

¹⁴ Leggið tit einki í teir! Blindir leiðvísarar eru teir fyri blindum; men tá ið blindur leiðir blindan, tá falla teir báðir í veitina.»

¹⁵ Men Pætur tók til orða og segði: «Grein okkum hetta líknilsi!»

¹⁶ Men hann segði: «Eru tit við so skilaleysir enn?

¹⁷ Skilja tit ikki, at alt tað, ið fer inn í munnin, fer í magan og fer út har, sum tað eigur at fara?

¹⁸ Men tað, ið fer út úr munninum, kemur frá hjartanum, og tað ger menniskjuna óreina.

¹⁹ Tí at úr hjartanum koma út illar hugsanir, manndráp, hordómur, siðloysi, stuldur, rangir vitnisburðir, spottan.

²⁰ Hetta er tað, ið ger menniskjuna óreina; men at fáa sær at eta við ótváaðum hondum, tað ger ikki menniskjuna óreina.»

Hin kánaneiska konan

²¹ Og Jesus fór burtur haðani og helt ferðini móti bygdaløgunum við Týrus og Sidon.

²² Og sí, ein kánaneisk kona kom út um markaskjalini har og rópaði og segði: «Harri, Dávids sonur, miskunna mær! Dóttir mín er stødd í neyð av einum illum anda.»

²³ Men hann ønti henni ikki aftur. Og lærusveinar hansara komu og bóðu hann og søgdu: «Slepp tær frá henni, tí at hon gongur og rópar eftir okkum.»

²⁴ Men hann svaraði og segði: «Eg eri ikki sendur út uttan til teir burturvilstu seyðirnar úr Ísraels húsi.»

²⁵ Men hon kom og fell á knæ fyri honum og segði: «Harri, hjálp mær!»

²⁶ Men hann svaraði og segði: «Tað er ikki vakurt at taka breyðið hjá børnunum og blaka hundunum tað.»

²⁷ Men hon segði: «Satt er tað, Harri, men hundarnir eta tó av molunum, sum detta niður av húsbóndans borði.»

²⁸ Tá svaraði Jesus og segði við hana: «Kona, stór er trúgv tín! Verði tær sum tú vilt!» Og dóttir hennara varð frísk frá teirri somu stund.

Mong verða grødd

²⁹ Og Jesus fór burtur haðani og kom at vatninum í Galileu; og hann gekk niðan á fjallið og settist har.

³⁰ Og stórar mannamúgvur komu til hansara og høvdu við sær lamin, blind, dumm, kryplar og mong onnur; og tey kastaðu tey niður fyri føtur hansara. Og hann grøddi tey;

³¹ so at mannamúgvurnar undraðust, tá ið tey sóu, at tey dummu talaðu, kryplar vórðu heilskapaðir og lamin gingu og blind sóu. Og tey lovaðu Ísraels Guði.

4000 fáa mat

³² Men Jesus kallaði lærusveinar sínar til sín og segði: «Mær tykir hjartaliga synd í hesi mannamúgvu, tí at longu í tríggjar dagar hava tey nú dvølt her hjá mær, og einki hava tey at eta. Og lata tey fara fastandi avstað frá mær, vil eg ikki, fyri at tey ikki skulu fáa maktarloysi á veginum.»

³³ Og lærusveinarnir siga við hann: «Hvaðani skulu vit her í oyðimørk fáa so mong breyð, at vit kunnu metta eina slíka mannamúgvu?»

³⁴ Og Jesus sigur við teir: «Hvussu mong breyð hava tit?» Men teir søgdu: «Sjey, og nakrar fáar smáfiskar.»

³⁵ Og hann beyð mannamúgvuni at seta seg niður á jørðina;

³⁶ og hann tók tey sjey breyðini og fiskarnar og takkaði og breyt tey sundur og fekk lærusveinunum, og lærusveinarnir góvu mannamúgvuni.

³⁷ Og tey fingu sær øll at eta og vórðu mett; og tað, ið varð til avlops av molum, hentaðu teir upp í sjey fullar tægur.

³⁸ Men tey, ið ótu, vóru fýra túsund menn, umframt konur og børn.

³⁹ Og hann læt mannamúgvurnar fara avstað, og fór tá inn í bátin og kom til bygdaløgini við Magadan.