Harmljóðini 5 - BÍBLIA

Fimti songur

¹ Harri, hav í huga forløg vár, hygg og gev tær far um, hvussu vit verða háðað!

² Arvaleivd okkara lutaðist øðrum, hús okkara fremmandum.

³ Faðirleys vit eru, eiga ongan góðan, móðir okkara situr einkja.

⁴ Vatnið, sum vit drekka, verða vit at keypa, fyri brennið mega vit gjalda.

⁵ Okið okkum nívir, lúgvaðir vit eru, fáa onga hvíld.

⁶ Egyptalandi vit rættu hond, Assurs landi, til tess at mettast við breyði.

⁷ Fedrar várir, ið syndaðu, eru ikki longur til, og vit bera syndir teirra.

⁸ Trælir okkum valda, eingin okkum bjargar úr hondum teirra.

⁹ Vit vinna okkum føðsluna við ótta fyri oyðimarkar svørði.

¹⁰ Hold várt er vorðið sum ovnur, sviðið av hungursloganum.

¹¹ Konur hava teir skemt í Zion, ungmoyggjar í Júda borgum.

¹² Høvdingar tóku teir og hongdu, ellismonnum sýndu teir onga virðing.

¹³ Unglingar bóru kvørnina, sveinarnir nigu undir viðarbyrðum.

¹⁴ Hinir elstu hvurvu úr borgarliðunum, unglingarnir lættu av streingjaleiki.

¹⁵ Horvin er gleðin úr hjarta várum, dansur okkara broyttur í sorg.

¹⁶ Krúnan er fallin av høvdi várum, vei okkum, vit hava syndað!

¹⁷ Av tí er hjarta okkara sjúkt, tessvegna dapraðust eygu okkara;

¹⁸ vegna Zions fjall, sum liggur í oyði, har revarnir reika um.

¹⁹ Men tú, Harri, valdar um ævir, títt hásæti stendur ætt eftir ætt.

²⁰ Hví vilt tú ævinliga okkum gloyma, siga okkum burtur allar dagar?

²¹ Vend okkum aftur til tín, Harri, tá koma vit aftur, lat dagar okkara aftur verða eins og í forðum!

²² Ella hevur tú havnað okkum med alla, er eingin endi á tíni vreiði móti okkum?